Makətūbə̄ kə́ nge ko̰ jōó ń Pol ndang adə̄ Tesalonik gə̄ ní 1
1
Pol rāā Tesalonik gə̄ lápə́ya
1I Pol nin̄ kə Silas ō, Timote ō n əlan̄ kə makətūbūú adə̄n̄ Egəlijə kə́ Tesalonik tə́ ń ɓoo naā kə Bɔbə̄jí Nə́ɓāá ō, kə Kɔ́ɔ̄ɓē Jeju *Kərist ō ní.
2Ādə̄ Bɔbə̄jí Nə́ɓā nin̄ kə Kɔ́ɔ̄ɓē Jeju Kərist rāān̄ kem majə sesí ō, sɔlə̄n̄ kemsí ō.
Sarya kə́ kəndā dɔ danaá tām̄ yā ndɔ̄ reē Kərist tə́
3Ngákó̰ó̰jí gə̄, majə kadə̄ jə-ndadə̄ Nə́ɓā ngándáńg tām̄ yāsí tə́. Nge ń noō i gō tə́, tɔdɔ̄ taā kem yāsí aw̄ kum kə̄ kété kété kə ngangāá ngá̰ý ō, tár yāsí kə́ tām̄ yā naā tə́ a aw̄ i kum kə̄ kété kété ō. 4Adə̄ j-ɔr ta rɔ̄jí najə̄ yāsí tə́ dan de gə̄ kə́ kem Egəlijə yā Nə́ɓā tə́. Tɔdɔ̄ dan ń rāān̄ kumsí ndoō tə́ ō, yá̰á̰ kə́ tōr̄ gə̄ rāān̄sí ō ní, sḭḭ̄ ə́hɔī rɔ̄sí tɔgə ō, ī-raī dɔ taā kem yāsí tə́ ō.
5Tɔdɔ̄ i tītə̄ ń noō n sḭḭ̄ ā ásiīń kadə̄ sḭḭ̄ i de gə̄ kə́ tām̄ yā *Ɓē ko̰o̰ yā Nə́ɓā ń á̰a̰ī tápə̄ najə̄n tə́ ní. 6Ngé gə̄ ń rāān̄ adə̄ wur kɔl əsō dɔsí tə́ ní, i gōtə́ kadə̄ Nə́ɓā rāā adə̄ wur kɔl əsō dɔdə́ tə́ ō. 7Ba kadə̄ sḭḭ̄ ń rāān̄sí yá̰á̰ kə́ tōr̄ ní, ni-rāā adə̄ ɔ̄rī koō naā tə́ sejí, ndɔ̄ téĺ Kɔ́ɔ̄ɓē Jeju tə́, kə deē yān gə̄ kə́ dɔ rā̰ tə́ kə́ tɔ́gə́də́ i ngá̰ý. 8Ni a tél yā reē i kum hor kógə̄ḿ kə́ o̰o̰ tə́, yā dal ba̰ā̰ dɔ ngé ger̄ Nə́ɓā aĺ gə̄ tə́, adə̄ i dɔ ngé gə̄ ń sɔlə̄n̄ dɔdə́ kə̄ no Najə̄ kə́ Majə yā Kɔ́ɔ̄ɓē Jeju tə́ aĺ ní tə́. 9Yá̰á̰ kə́ tōr̄ ń a rāādə́ tām̄ majaĺ yādə́ tə́ ní, i nujə kə́ ta ngóyn gətóó kə́ nin̄ a nujən̄ sák sák kɔ̄ɔ́, sa̰y rɔ̄ Kɔ́ɔ̄ɓē tə́ ō, sa̰y rɔ̄ tɔ́gən kə́ to *kɔsə gɔn tə́ ō. 10Dan ń a reē anī, deē yān gə̄ a rɔȳnən̄ ō, de gə̄ malang ń taān̄ kemən ní a a̰a̰n̄ majən ō. Ndɔ̄ ń noō tə́ ní sḭḭ̄ i dandə́ tə́ ō, tɔdɔ̄ sḭḭ̄ ī-taāī kem najə̄ ń j-ɔjəsí ní.
11I tām̄ ń toō tə́ n jə-ndɔ̄ȳ Nə́ɓā ngándáńg tām̄ yāsí tə́ ní, yā kadə̄ de gə̄ rāān̄sí de gə̄ kə́ ásiī tām̄ yā ɓāŕ ń Nə́ɓā ɓāŕsí tə́ ní. Yā kadə̄ Nə́ɓā adə̄sí tɔ́gə kadə̄ ī-rāāīneé yá̰a̰ malang kə́ majə ń kemsí gḛy ní ō, rāā adə̄ taā kem yāsí rāā kəla ō. 12I tītə̄ ń noō n rī Kɔ́ɔ̄ɓē Jeju a əngeń kɔsə gɔn kə ta kūl̄sí sḭḭ̄ḭ́ ō, sḭḭ̄ ā ə́ngeīń kɔsə gɔn kə ta kul̄ən ní ō ní. Yá̰á̰ ń kem majə yā Nə́ɓā yājí ō, yā Kɔ́ɔ̄ɓē Jeju *Kərist ō, a rāā ní n noó.
Currently Selected:
Makətūbə̄ kə́ nge ko̰ jōó ń Pol ndang adə̄ Tesalonik gə̄ ní 1: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad