PĀ GƏ̄ 90
90
Makətūbə̄ kə́ nge ko̰ sɔ́
(Pā gə̄ 90—106)
Deē ndul a oy ba Nə́ɓā a ndi ngándáńg
1Ndɔ̄ȳ yā Moijə, deē yā Nə́ɓā.
Kɔ́ɔ̄ɓē, i ḭ̄ n i loo ɓɔ̄ɔ̄ rɔ̄ yājí kə dɔ ɓāl̄ gə̄ kə dɔ ɓāl̄ gə̄ ní.
2Kété pá tá kadə̄ mbal̄ gə̄ teēn̄ ō,
kété pá tá kadə̄ ī-rāā dɔ nang ō yá̰á̰ malang kə́ tū tə́ ō,
ta kəla gír tə́ jóo bátə́ kə̄ no tə́ ō ní, ḭ̄ i Nə́ɓā.
3Ḭ̄ ī-rāā ādə̄ de gə̄ télən̄ nán̄g gogə́.
Tɔdɔ̄ ə́da na: Ngán Adam gə̄, ī-tél āwī gogə́ loo ń ī-teēī tū tə́ ní tə́!
4A̰á̰ā̰, ta kumií tə́ ní ɓāl̄ kə́ dūbú gə̄
i tītə̄ ndɔ̄ kə́ tagə́bēé ń mān̄ kɔ̄ɔ́ ní,
i tītə̄ kum mbang kə́ kógə̄ḿ beē kə́ dan ndɔ̄ɔ́.
5Ḭ̄ ī-gān̄g gír ɓāl̄ deē ndul anī a gətóo kɔ̄ɔ́ kə́ ndɔ̄í tītə̄ loo gān̄g gír ɓīī ō,
tītə̄ mu kə́ əɓa ō,
6adə̄ mu hútə̄ dəloí,
ba loo sɔlí anī ndəlē ō tutə kɔ̄ɔ́ ō.
7Rɔ̄kum, wōn̄g yāí tɔ̄l̄jí kɔ̄ɔ́,
wōn̄g yāí kə́ ngá̰ý əla ɓōĺ kemjí tə́.
8Ḭ̄ ī-tə́ndā yá̰á̰ kə́ gōtə́ aĺ gə̄ ń jə-rāā ní ta kumií tə́.
Loo kə́ unjə̄ kow yāí unjə̄ dɔ yá̰a̰ yājí gə̄ kə́ ton̄ loo mundə̄ tə́.
9A̰á̰ā̰, ndɔ̄jí gə̄ malang mānə̄n̄ kɔ̄ɔ́
ta kum wōn̄g yāí kə́ ngá̰ý tə́.
Ɓāl̄jí gə̄ mānə̄n̄ tītə̄ koō kə́ deē tetə nja kógə̄ḿ beē.
10J-asə ndi ɓāl̄ kutə sīrí.
Ngé kə́ tɔ́gə́də́ i ngá̰ý gə̄ asən̄ ndi ɓāl̄ kutə sɔ́sɔ́.
Banī yá̰á̰ ń j-ənge gírí ní i tápə̄ ō, kum tō ndoō ō.
Gír ndi kə kumuú yājí gān̄g láẃ ngá̰ý ō, koōjí teē kɔ̄ɔ́ ō.
11I náā n asə ger̄ tɔ́gə wōn̄g yāí ní?
Deē ń ɓōĺ ndílí ngá̰ý ní a ger̄ wōn̄g yāí majə!
12Ī-ndóōjí loo tə́da ndɔ̄jí gə̄.
Anī kemjí a ger̄ najə̄.
13Kɔ́ɔ̄ɓē, ā ə́hɔ́jí kemií tə́ i bátə́ ta kə́ rá?
Ī-tūr̄ rɔ̄í kə̄ rɔ̄jí tə́,
á̰a̰ kum tō ndoō yājí jḭḭ ngé kəla yāí gə̄.
14Ī-rāā kem majə sejí ngá̰ý, ādə̄ tɔ̄l̄ ɓōn kə́ kemjí tə́ dəloí ɓatə.
Loo ń noō tə́ j-a j-əga kɔŕ rɔ̄nel̄ kə dɔ ndɔ̄ gə̄ malang ń
j-a jə-ndiń kə kumjí ní.
15Ḭ̄ ə́la rɔ̄sɔl̄ dɔjí tə́ dan i ngá̰ý.
Ngɔlaā ní ādə̄jí ɓāl̄ gə̄ kə́ rɔ̄jí nel̄jí kemeé gə̄,
ādə̄ asən̄ naā kə ɓāl̄ gə̄ ń yá̰á̰ kə́ to kum kaȳ aĺ gə̄ rāān̄neéjí ní.
16Ādə̄ ngé kəla yāí gə̄ a̰a̰n̄ kəla rāāí kə kumdə́ ō,
ādə̄ ngáńdə́ gə̄ a̰a̰n̄ ndə́lē ń ī-ndə́lē ngá̰ý ní ō.
17Ādə̄ háĺ kə́ sɔl̄ lɔm yā Kɔ́ɔ̄ɓē Nə́ɓā yājí i sejí!
Ī-rāā ādə̄ kəla ń jə-rāā kə jījí ní əla ngəran ngan̄g,
a̰á̰ā̰, kəla ń toō ń jə-rāā kə jījí ní, ī-rāā ādə̄ ra ngan̄g.
Currently Selected:
PĀ GƏ̄ 90: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.