PĀ GƏ̄ 89
89
Yá̰a̰ gə̄ ń ə̄nī ndūí yā rāā kadə̄ Dabid ní i rá
1Pā kə́ kəda yā Etan kə́ ngōn̄ nge ɓē.
2M-ā m-ə̄nī pā yá̰a̰ gə̄ ń Kɔ́ɔ̄ɓē rāā kə gō kem majə yān ní ngándáńg.
M-ā m-ə̄nī mbēr̄ dɔ yá̰á̰ kə́ rɔ̄kum yān tə́,
kadə̄ ngáńjí gə̄ ō ngán kaají gə̄ ō gerə̄n̄.
3Rɔ̄kum, m-ə́da na: Kem majə yāí to ngándáńg dɔ rā̰ tə́.
Ḭ̄ ī-rāā adə̄ ra dɔ ndū tə́ yāí ndi ngándáńg dɔ rā̰ tə́.
4Ḭ̄ ə́da na ə́hɔ madə̄ naā kə deē ń ī-gə̄rān ní,
ī-túbə kə rɔ̄í ādə̄ nge kəla yāí Dabid, ə́da na:
5M-ā m-ādə̄ gír kojə yāí a o̰o̰ ɓē ngándáńg.
I beé n m-ā m̄-rāań kadə̄ de kə́ gír kojə yāí tə́ gə̄
a o̰o̰n̄neé ɓē kə dɔ ɓāl̄ gə̄ dɔ ɓāl̄ gə̄ ní.
6Kɔ́ɔ̄ɓē, ādə̄ dɔ rā̰ ɔsə gɔn yá̰á̰
kə́ to kɔr kum ń ī-rāā ní ō,
ādə̄ ɔsə gɔn ra kə́ ī-ra dɔ ndūí tə́ ō, loo kán̄ naā yā de kə́ táĺ gə̄ tə́!
7Kɔ́ɔ̄ɓē, de kə́ asə seí gətóo dɔ rā̰ tə́.
Dan nə́ɓā gə̄ tə́ ní, nge kə́ to tītə̄ Kɔ́ɔ̄ɓē gətóo.
8De kə́ táĺ gə̄ ń kánə̄n̄ naā yā koō naā dɔ yá̰á̰ tə́ ní,
Nə́ɓā to ɓōĺ ngá̰ý dandə́ tə́.
To ɓōĺ tɔȳ de gə̄ malang ń ndi gīrə̄n̄ gidən ní.
9Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý,
Kɔ́ɔ̄ɓē, i náā n ngan̄g tītīí?
Yá̰á̰ kə́ rɔ̄kum gīr̄ gidií.
10I ḭ̄ n i nge kɔgə̄ bā bo kɔjə rɔ̄n ní,
dan ń ḭḭ bububu anī,
i ḭ̄ n i nge rāā kadə̄ tél to jəke ní.
11I ḭ̄ n ī-rējə̄ nīń Rahab#89.11 Rahab: I rī dā̰ man̄ kə́ majaĺ ngá̰ý. I rī kə́ əndān̄ dɔ bā bo tə́ ō, dɔ ɓē kə́ Ejiptə tə́ ō. ní,
i ḭ̄ n ī-tə̄ndā madə̄ ba̰ā̰í gə̄ ī-tḭ̄ḭ̄də́ naā tə́ kə tɔ́gə jīí ní.
12Dɔ rā̰ i yāí ō, dɔ nang i yāí ō!
I ḭ̄ n i nge kəndā loo kə́ dɔɔ́ ō,
kə́ nang tə́ ō, yá̰a̰ malang kə́ kemeé ō ní.
13I ḭ̄ n i nge kəndā dām̄ mbɔ́r ɓē kə́ ko̰ó̰ ō kə́ geleé ō ní.
Mbal̄ gə̄ kə́ Tabor ō kə́ Hermon ō əgan̄ kɔŕ rɔ̄nel̄ dɔ rīí tə́.
14Jī kə́ kɔl watang ń toō,
kə́ tɔ́gən i ngá̰ý ń toō,
jī ko̰ kə́ kəla kə̄ dɔɔ́ ń toō i jīí ḭ̄.
15Ko̰o̰ ɓē yāí ndi i dɔ yá̰á̰ kə́ gōtə́ tə́ ō, yá̰á̰ kə́ súmūú tə́ ō.
Kem majə ō najə̄ kə́ rɔ̄kum ō njə̄rān̄ kété noí tə́.
16Kɔ́ɔ̄ɓē, rɔ̄nel̄ i kə de gə̄ ń gerə̄n̄ rāā walyaí ní.
Nin̄ a njə̄rān̄ ta kumií tə́ dan loo kə́ unjə̄ kow yāí tə́.
17A ndāmə̄n̄ kə rɔ̄nelēé najə̄ yāí tə́ dəloí bátə́ kadə̄ loo tíbə dɔdə́ tə́,
A ɔrə̄n̄ dɔdə́ dɔɔ́ kə ta kūl̄ yá̰a̰ rāāí kə́ gōtə́ gə̄.
18Rɔ̄kum, ḭ̄ i tɔ́gə́də́ kə́ to ɓōĺ ngá̰ý.
Ḭ̄ ī-rāā ādə̄ kumjí a̰a̰ rá ráńg i kə ta kūl̄ kem majə yāí.
19Nge ń i der yājí ō mban̄g yājí ō ní, ndi i kə ta kūl̄ Kɔ́ɔ̄ɓēé ō,
kə ta kūl̄ kə́ táĺ yā Israel ō.
20Ndɔ̄ kógə̄ḿ tə́ ī-teē ta kum deē yāí gə̄ tə́ ba ə́dádə́ na:
m̄-rāā kə de kə́ əhɔ rɔ̄n tɔgə,
m-ɔ́sə balsáá kógə̄ḿ kə́ dan gír deē yāḿ gə̄ tə́ kə̄ dɔɔ́.
21M-ə́nge nge kəla yāḿ Dabid,
m-ɔ̄r̄ kamə̄n kə yibə̄ kə́ táĺ.
22M-ā m-ə́hɔn kə̄ dɔɔ́ kə tɔ́gə jīḿ,
tɔ́gə jīḿ a rāā kadə̄ ni a tél de kə́ ngan̄g.
23Madə̄ ba̰ā̰n a asə kəhɔn dɔ jīn tə́ alé.
Nge kem ndul a asə kəla rɔ̄sɔl̄ dɔn tə́ alé.
24Tɔdɔ̄ m-ā m̄-rējə̄ ngé rɔ̄ɔ̄n gə̄ ta kumən tə́,
ngé gə̄ ń a im̄nən̄ ní m-ā m-ə́ndádə́.
25M-ā m̄-rāā kadə̄ ra dɔ ndū yāḿ tə́ ō, kem majə yāḿ ō ndin̄ seneé,
ré oō rīḿ anī a ɔr̄ dɔn dɔɔ́.
26M-ā m-ādə̄ a o̰o̰ ɓē dɔ bā bo tə́,
m-ā m-ə́la bā gə̄ gír jī ko̰n tə́.
27Ni a ɓārə́m̄ mā na i bɔbə̄n ō, Nə́ɓā yān ō, mbal̄ kə́ nge kajən ō.
28Mā m-ā m̄-rāān i ngōn̄ hágə́ḿ tə́ ō,
mban̄g kə́ bo tɔȳ mban̄g gə̄ malang kə́ dɔ nang tə́ ō.
29Kem majə yāḿ a to ngándáńg tām̄ yān tə́ ō,
ndūḿ ń m-ə̄nī m-ə́hɔń madə̄ naā seneé ní, m-ā m̄-rā dɔ tə́ ō.
30M-ā m-ādə̄ gír kojə yān a o̰o̰ ɓē gotən tə́ ngándáńg ō,
kōr̄ kāgə̄ mbang yān a to ta kaw̄ jóo tītə̄ dɔ rā̰ ō.
31Ré ngánən gə̄ əya̰n̄ ndū najə̄ yāḿ kɔ̄ɔ́ ō,
unən̄ gō róbə kə́ súmūú yāḿ aĺ ō,
32ré nin̄ rāān̄ yá̰a̰ gə̄ ń m̄-rā sedə́ ta rāā ní aĺ ō,
ngɔ̄mə̄n̄ gō míndə́ḿ gə̄ aĺ ō anī,
33m-ā m-ún kāgə̄ yā kəndańdə́ najə̄ dɔ ngan̄g yādə́ tə́ ō,
m-ā m-ə́ndádə́ najə̄ yá̰á̰ kə́ gōtə́ aĺ ń nin̄ rāān̄ tə́ ní ō.
34Banī kem majə yāḿ a to tām̄ yān tə́ ngándáńg ō,
ndūḿ ń m-ə̄nī m-ə́hɔń madə̄ naā seneé ní,
m-ā m̄-rā dɔ tə́ ō.
35M-ā m̄-mān̄ dɔ ndūḿ ń m-ə̄nī m-ə́hɔń madə̄ naā seneé ní alé,
najə̄ ń teē taḿ tə́ ní, m-ā m̄-tūr̄ ndūḿ gō tə́ alé.
36m̄-túbə kə hálə́ḿ kə́ táĺ gidə kógə̄ḿ beē m-ə́da na:
Tītə̄ ń mā i Nə́ɓā rɔ̄kum noō ní,
m-ā m̄-gól̄ Dabid alé.
37Gír kojə yān a o̰o̰ ɓē ngándáńg ō,
kōr̄ kāgə̄ mbang yān a ndi ngan̄g ngándáńg ta kumḿ tə́ tītə̄ mbang ō,
38tītə̄ nāā ń i yá̰á̰ kə́ kum tə́ kə́ ra dɔ ndūn tə́ ɓōdə̄ loo tə́ dɔɔ́ ní ō.
39Ɓá tā ba mban̄g yāí ń úr yibə̄ dɔn tə́ ní,
i ḭ̄ n ī-mbātə́n ō, ī-kídə̄n ō, ī-rāā wōn̄g seneé ō ní.
40Ḭ̄ ī-tūr̄ ndūí ń ə̄nī ādə̄ nge kəla yāí ní kɔ̄ɔ́,
ə̄nī jākā mbang yān nang tə́, ī-rāā ādə̄ téĺ yá̰á̰ kə́ yḛr.
41Ī-ró̰ȳ ndogə̄ yān gə̄ kɔ̄ɔ́ ō,
ī-nujə loo kə́ ngan̄g ngá̰ý yān gə̄ kɔ̄ɔ́ ō.
42Ngé mān̄ róbə gə̄ malang ɔyn̄ yá̰a̰ kənge yān gə̄.
Ni-tél i kur̄ kəgō yā madə̄ ɓēn gə̄.
43Ī-rāā ādə̄ madə̄ ba̰ā̰n gə̄ tél ngangə̄n̄,
ī-rāā ādə̄ ngé gə̄ malang ń rɔ̄ɔ̄nən̄ ní rɔ̄də́ nel̄də́.
44Ī-rāā ādə̄ kum kaskar yān ɗogə́rō kɔ̄ɔ́ gə̄gē.
Ī-rāā seneé ādə̄ ra ngan̄g ta rɔ̄ tə́ alé.
45Ī-taā ko̰o̰ ɓē jīn tə́ kɔ̄ɔ́,
ī-mbəre kōr̄ kāgə̄ mbang yān ə̄nī nang tə́.
46Ī-gān̄g ta ɓāl̄ balsáa yān kɔ̄ɔ́, ə́la rɔ̄sɔl̄ dɔn tə́.
47Kɔ́ɔ̄ɓē, ā ī-ɓɔ̄ɔ̄ rɔ̄í i bátə́ ta kə́ rá?
Wōn̄g yāí a o̰o̰ loo bir bir i bátə́ ta kə́ rá?
48Deē ndul a ndi kə kumneé ɓāl̄ ngá̰ý aĺ ní ī-gír̄ dɔḿ tə́.
Ī-gír̄ dɔ ndɔ̄ ndiḿ kə kumḿ kə́ i ngá̰ý aĺ tə́,
ḭ̄ ə̄ndā deē i yā kadə̄ ta tɔ̄l̄ tan to rim a?
49I náā n asə ndi kə kumneé kanjə̄ koy ní?
I náā n asə taā rɔ̄n jī yo tə́ kəya̰ dɔɔ́ ní?
50Kɔ́ɔ̄ɓē, kem majə yāí kə́ jóó ní aw̄ i rá?
Kété ní ī-túbə ādə̄ Dabid kadə̄ ā ī-ra dɔ ndūí tə́ seneé aĺ a?
51Kɔ́ɔ̄ɓē, ī-gír̄ dɔ ngé kəla yāí gə̄ ń tájə̄n̄də́ ní tə́,
ī-gír̄ dɔ gír de gə̄ malang ń toō ń ə́ládə́ gír jīḿ tə́ ní.
52Kɔ́ɔ̄ɓē, madə̄ ba̰ā̰í gə̄ tájə̄n̄də́! Nin̄ tībə̄n̄ hōr̄ gotə nja mban̄g yāí ń úr yibə̄ dɔn tə́ ní!
53Ādə̄ de gə̄ tɔ̄ȳn̄ Kɔ́ɔ̄ɓē ngándáńg!
Adə̄ i tītə̄ ń noō, adə̄ i tītə̄ ń noō!
Currently Selected:
PĀ GƏ̄ 89: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.