PĀ GƏ̄ 86
86
Dan ń yá̰a̰ tɔȳ dɔḿ ní, m̄-sāā njaí
1Ndɔ̄ȳ yā Dabid
Kɔ́ɔ̄ɓē, ī-nēl̄ mbīí ōoń ndūḿ, ī-ndigəm̄ tə́,
tɔdɔ̄ mā i de kə́ ndoō ō, rɔ̄ḿ tō ndoō ngá̰ý ō.
2ī-ngɔ̄mə̄m̄ tɔdɔ̄ mā i nge ra dɔ ndūḿ tə́.
Mā i nge kəla yāí, m-ə̄nī kemḿ m-ādī.
Ḭ̄ ń i Nə́ɓā yāḿ ní ájəm̄.
3Kɔ́ɔ̄ɓē, á̰a̰ kum tō ndoō yāḿ,
i ḭ̄ n m-ā m̄-ɓāríī kə dɔ ndɔ̄ gə̄ ní.
4Ī-rāā kə nge kəla yāí ādə̄ kemən nelə̄n,
tɔdɔ̄ Kɔ́ɔ̄ɓē, m̄-tūr̄ rɔ̄ḿ i kə̄ rɔ̄í tə́.
5Kɔ́ɔ̄ɓē, ḭ̄ ń i de kə́ nge kem majə ō, ā ī-mā̰ȳ rɔ̄í dɔ de gə̄ tə́ ō ní,
ḭ̄ ī-rāā kem majə ngá̰ý kə de gə̄ malang ń a ɓār̄nī ní.
6Kɔ́ɔ̄ɓē, ī-nēl̄ mbīí ōoń ndɔ̄ȳ yāḿ!
Dan ń m-ā m̄-rāāī ɓɔ́ anī, ī-nēl̄ mbīí majə ōoń!
7Ndɔ̄ ń wur kɔl əsōń dɔḿ tə́ ní m̄-ɓāríī, anī ī-ndigəm̄.
8Kɔ́ɔ̄ɓē, dan nə́ɓā gə̄ tə́ malang ní, ni kə́ tītīí gətóo!
Yá̰á̰ ń ī-rāā ní, nə́ɓā kógə̄ḿ kə́ asə rāā gətóo.
9Kɔ́ɔ̄ɓē, gíŕ nápar de gə̄ malang ń ī-rāādə́ ní,
a reēn̄ yā kɔsə nodə́ nang tə́ noí tə́ ō, yā tɔ̄ȳ rīí ō.
10Tɔdɔ̄ ḭ̄ i de kə́ bo, ī-rāā yá̰á̰ kə́ majə to ɓōĺ ngá̰ý gə̄,
i īkɔ́ kal kógə̄ḿ beē n i Nə́ɓā kə́ rɔ̄kum ní!
11Kɔ́ɔ̄ɓē, ɔ́jəm̄ róbə yāí,
anī m-ā m-ún gō najə̄ yāí kə́ rɔ̄kum.
Ī-rāā ādə̄ kemḿ i dɔ yá̰á̰ kə́ kal kógə̄ḿ beē tə́:
I kadə̄ m̄-ɓōĺ gidə rīí.
12Kɔ́ɔ̄ɓē Nə́ɓā yāḿ, m-ā m̄-ɓōkíī tɔ̄ȳ kə ngarā̰ kemḿ malang,
m-ā m̄-tɔ̄ȳ rīí ngándáńg.
13Tɔdɔ̄ kem majə ń ī-rāā seḿ ní to ɓōĺ ngá̰ý,
ī-teē seḿ kem bəlo kə́ lú ngá̰ý yā yo tə́ kɔ̄ɔ́.
14Nə́ɓā, de kə́ ngé gán̄g rɔ̄də́ gə̄ ənīmə̄n̄ rɔ̄ɔ̄,
ɓūtə̄ de kə́ ngé rāā yá̰a̰ kə dɔ́nɔ́ gə̄ sāān̄ tɔ̄lə̄m̄,
usədə́ dɔí tə́ alé.
15Banī Kɔ́ɔ̄ɓē, ḭ̄ i Nə́ɓā kə́ kumií a o̰o̰ī kə de gēé ō,
kə́ nge ka̰a̰ kum tō ndoō yā de gə̄ ō,
kə́ nge rāā wōn̄g láẃ aĺ ō,
Kem majə yāí i ngá̰ý ō, ī-ra dɔ ndūí tə́ ngá̰ý ō.
16Ī-tūr̄ rɔ̄í kə̄ rɔ̄ḿ tə́, á̰a̰ kum tō ndoō yāḿ.
Mā i nge kəla yāí, ādə̄m̄ tɔ́gə yāí.
Mā i ngōn̄ kem nge kəla yāí kə́ dəyá̰, ájəm̄!
17Ī-rāā yá̰á̰ kógə̄ḿ kə́ to rī ɓār̄ tām̄ yāḿ tə́,
loo ń noō tə́ rɔ̄ madə̄ ba̰ā̰ḿ gə̄ a sɔl̄də́,
dan ń a a̰a̰n̄ kadə̄ ḭ̄ Kɔ́ɔ̄ɓē ī-dḭḭ̄m̄ ō, ī-sɔl̄ kemḿ ō ní.
Currently Selected:
PĀ GƏ̄ 86: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.