PĀ GƏ̄ 85
85
Kɔ́ɔ̄ɓē ɔr̄ najə̄ kə́ dɔ kem sɔl̄ lɔm tə́
1Pā kə́ kem makətūbə̄ yā ngār yā gōsə̄ pā gə̄ tə́. I pā yā ngán Kore gə̄.
2Kɔ́ɔ̄ɓē, ḭ̄ ɔ́jə kadə̄ nelī kə ɓē yāí!
Deē yā Jakob gə̄ ń əhɔn̄də́ aw̄n̄ sedə́ ɓəloó ní, ḭ̄ ī-tél ī-reē sedə́ gogə́ ɓēé.
3Yá̰á̰ kə́ gōtə́ aĺ ń gír deē yāí gə̄ rāān̄ ní, ḭ̄ ún dɔdə́ tə́ kɔ̄ɔ́.
Yá̰á̰ kə́ majaĺ gə̄ malang ń nin̄ rāān̄ ní, ḭ̄ ī-mā̰ȳ rɔ̄í dɔ tə́.
4Ḭ̄ ə́ya̰ gō wōn̄g ń rāāī ngá̰ý ní kɔ̄ɔ́,
ḭ̄ ī-lōō gír wōn̄g yāí kə́ ngá̰ý tə́.
5Nə́ɓā, nge kajəjí, ī-tél ī-reē sejí gogə́!
Ə́hɔ́jí kemií tə́ alé.
6Ā ī-rāā wōn̄g sejí i kə̄ noí tə́ a?
Ā ī-rāā wōn̄g kə gír kaají kə taá malang kə dɔ ɓāl̄ gə̄ kə dɔ ɓāl̄ gə̄ a?
7Jḭḭ ń i gír deē yāí gə̄ ní, i ḭ̄ n ā ī-reē yā rāā kadə̄
jə-ndi kə kumjí ō, rɔ̄jí nel̄jí ō ní aĺ a?
8Kɔ́ɔ̄ɓē, ɔ́jə́jí kem majə yāí ō, ájə́jí ō.
9Yá̰á̰ ń Kɔ́ɔ̄ɓē Nə́ɓā əda ní m-ōō kə mbīḿ.
Ni-ɔr̄ i najə̄ kem sɔl̄ lɔm kə́ tām̄ yā gír deē yān gə̄ tə́ ō,
deē yān gə̄ kə́ ran̄ dɔ ndūdə́ tə́ ō,
ba kadə̄ tél rāān̄ mbóo to̰ alé!
10Ngé gə̄ ń ɓōlə́n̄ ndílən ní kajə yān i rɔ̄də́ tə́ ngɔr.
Kɔsə gɔn yān a rāā ɓē danjí tə́.
11Kem majə ō, najə̄ kə́ rɔ̄kum ō, əngen̄ naā,
yá̰á̰ kə́ gōtə́ ō, kem sɔl̄ lɔm ō, ɓirə̄n̄ naā dagə.
12Najə̄ kə́ rɔ̄kum teē dɔ nang tə́ ō,
yá̰á̰ kə́ gōtə́ teē dɔ rā̰ tə́ ō.
13Kɔ́ɔ̄ɓē nəkɔ́ i nge rāā kadə̄ deē ndi majə ō,
nge rāā kadə̄ dɔ nang yājí teē kōō ō.
14Yá̰á̰ kə́ gōtə́ njə̄rā kété no Kɔ́ɔ̄ɓē tə́ ō,
rāā róbə́ kété non tə́ kadə̄ njə̄rā dɔ tə́ ō.
Currently Selected:
PĀ GƏ̄ 85: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.