PĀ GƏ̄ 84
84
Pā yā ngé njə̄rā mbā kə́ táĺ gə̄ kə́ reē ugə̄n̄ Jerusalem
1Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kənde kə́ Gat. I pā yā ngán yā Kore gə̄.
2Kɔ́ɔ̄ɓē kə́ ɓoo kə́ tɔ́gən i ngá̰ý,
nelə̄m̄ kə kújə yāí gēé ngá̰ý!
3Kɔ́ɔ̄ɓē, ɓō kaw̄ ndágə loo kə́ gīr̄ gidə kújə yāí tə́ rāām̄ tītə̄ kə́ yā tɔ̄lə̄m̄ kɔ̄ɔ́ beē.
Rɔ̄ḿ malang əga kɔŕ kə̄ dɔ Nə́ɓā kə́ ndi kə kumneé tə́.
4Kɔ́ɔ̄ɓē kə́ ɓoo kə́ tɔ́gən i ngá̰ý, Nə́ɓā yāḿ ō, mban̄g yāḿ ō,
i kə́lē a ənge ɓē ton ō, i yel̄ gabə kɔsə a a ənge loo kə́ yā ɓōkə́nń ngánən gə̄ ō,
kadə loo tun̄ yá̰a̰ yāí gə̄ tə́.
5Rɔ̄ de kə́ kem kújə yāí tə́ gə̄ nel̄də́,
nin̄ ɓōkə́nī tɔ̄ȳ kanjə̄ kɔr ta tə́!
6Rɔ̄nel̄ i kə deē ń ngan̄g i kə ta kūlīí ní,
a əsō róbó ta kaw̄ kə̄ Jerusalem i kə kemən kə́ majaá.
7Dan ń teēn̄ wól loo kə́ kāgə̄ bomə gə̄ i tū tə́ ní anī
rāān̄ adə̄ tél i loo kə́ man̄ a əɓa tū tə́.
Man̄ kə́ ta kəga dɔ ń edə ní, tél i yá̰á̰ tɔ́r̄ ta kə́ dɔ loo ní tə́.
8Nin̄ əngen̄ tɔ́gə dan ń a njə̄rā aw̄n̄
yā ra ta kum Nə́ɓā tə́ Siyo̰ ní.
9Kɔ́ɔ̄ɓē, Nə́ɓā kə́ bo kə́ tɔ́gí i ngá̰ý, ōō ndɔ̄ȳ yāḿ,
Nə́ɓā yā Jakob, ī-nēl̄ mbīí ōoń ndūḿ.
10Nə́ɓā, á̰a̰ deē ń i der yājí ní,
á̰a̰ ta kum deē ń úr yibə̄ dɔn tə́ ní.
11Rāā ndɔ̄ kógə̄ḿ ndágə loo kə́ gīr̄ gidə kújə yāí tə́
majə tɔȳ rāā ndɔ̄ dūbú loo kə́ rang tə́.
Nə́ɓā yāḿ, ndi ta róbə́ kújə yāí tə́ i só tə́
tɔȳ ndi kə de kə́ sew aĺ gēé!
12A̰á̰ā̰, Kɔ́ɔ̄ɓē Nə́ɓā i mbang ō i der ō.
Kɔ́ɔ̄ɓē i nge rajə deē ō, i nge rāā kadə̄ rī deē ɓār̄ ō.
Ngé gə̄ ń háĺdə́ i súmūú ní,
yá̰á̰ kógə̄ḿ kə́ majə kə́ ni ɔgə̄də́ gətóo.
13Kɔ́ɔ̄ɓē kə́ ɓoo kə́ tɔ́gən i ngá̰ý,
deē ń adī kemən ní rɔ̄n nelə̄n!
Currently Selected:
PĀ GƏ̄ 84: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.