PĀ GƏ̄ 79
79
Ī-rāā sejí tām̄ j-əsō adə̄ jḭḭ i gírí nang tə́ sa̰y ngá̰ý
1Pā yā Asap.
Nə́ɓā, nápar de gə̄ taān̄ loo dɔ nang yāí tə́.
Nin̄ rāān̄ adə̄ kújə́ kə́ táĺ yāí téĺ kújə́ kə́ yḛr ō,
nin̄ nujən̄ ɓē kə́ Jerusalem sák sák kɔ̄ɔ́ ō.
2Nin̄ tɔ̄lə̄n̄ ngé kəla yāí gə̄ ba adə̄n̄ yel̄ kə́ dɔɔ́ gə̄ nīńdə́ adə̄ əsan̄,
adə̄n̄ dā̰ kə́ bembeé gə̄ nīń deē yāí gə̄.
3Ɓōkə́n̄ mósə́də́ nang tə́ ngá̰ý kə gō gidə ɓē kə́ Jerusalem adə̄ gīr̄ gidə,
deē dubə̄ nīńdə́ alé.
4Madə̄ ɓējí gə̄ tájə̄n̄jí,
de gə̄ ń ndin̄ kə gō gidəjí ní əgōn̄jí ō, mbóon̄ sejí ō.
5Kɔ́ɔ̄ɓē, ā ī-rāā wōn̄g kə́ dan gān̄g aĺ sejí i bátə́ ta kə́ rá?
Jang yāí a o̰o̰ loo kə́ hor tə́ i bátə́ ta kə́ rá?
6Ī-bə̄gā wōn̄g yāí dɔ nápar de gə̄ ń gerīn̄ aĺ tə́ ní,
dɔ ɓē ko̰o̰ gə̄ ń ɓārə́n̄ rīí aĺ tə́ ní,
7tɔdɔ̄ nin̄ təgān̄ yá̰a̰ yā Jakob malang,
nujən̄ loo yān sák sák kɔ̄ɔ́.
8Yá̰á̰ kə́ majaĺ gə̄ ń kaají gə̄ rāān̄ ní,
ī-lōō kəndā najə̄n dɔjí tə́,
banī ādə̄ kumií o̰o̰ī sejí,
ī-reē láẃ ī-tə́nā tají,
tɔdɔ̄ j-əsō adə̄ jḭḭ i gírí nang tə́ sa̰y ngá̰ý.
9Nə́ɓā kə́ nge kajəjí,
ī-rāā sejí ādə̄ de gə̄ tɔ̄ȳn̄neé rīí.
Tām̄ yā rī ɓār̄ yāí tə́ ní, ī-gān̄g dɔjí ō,
ə̄ndā njaí dɔ yá̰á̰ kə́ majaĺ gə̄ ń jə-rāā tə́ ní ō.
10Ə́ya̰ ādə̄ nápar de gə̄ ədan̄ na Nə́ɓā yādə́ i rá i najə̄ rí tə́?
Ādə̄ nápar de gə̄ gerə̄n̄ dan ń jə-rań jījí tə́ toō,
kadə̄ a dalən̄ ba̰ā̰ ngé kəla yāí gə̄ ń tɔ̄lə̄n̄də́ ní.
11Ādə̄ nōō rɔ̄ yā dəngáy gə̄ aw̄ bátə́ ugə̄ rɔ̄í tə́.
De gə̄ ń gān̄gə̄n̄ sarya yo dɔdə́ tə́ ní, ḭ̄ ń tɔ́gí i ngá̰ý ní,
ī-ngɔ̄m̄də́ ādə̄ ndin̄ kə kumdə́.
12Kɔ́ɔ̄ɓē, gír de gə̄ ń ndin̄ ɓē kadəjí tə́ ní sāān̄ taí.
Ādə̄ əgānī kə̄rā ndū gə̄ ń tájə̄nī ní nja sīrí.
13Loo ń noō tə́ jḭḭ ń i gír deē yāí gə̄
á i yá̰a̰ kul̄ gə̄ kə́ i ḭ̄ n i nge kaw̄ sedə́ dɔ mu tə́ ní,
j-a j-asə kɔsə gɔnií ngándáńg ō,
ɓōkíī tɔ̄ȳ kə dɔ ɓāl̄ gə̄ ō.
Currently Selected:
PĀ GƏ̄ 79: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.