PĀ GƏ̄ 77
77
Yá̰a̰ tōr̄ rɔ̄ḿ, anī əga kemḿ dɔ yá̰á̰ kə́ majə gə̄ ń ī-rāā tə́ ní
1Pā kə́ kem makətūbə̄ yā ngār yā gōsə̄ pā gə̄ tə́. I kə gō ń Yedutun rāań ní. I pā yā Asap.
2I Nə́ɓā n m̄-ɓārə́n ō, m̄-nōō kə̄ dɔn tə́ ō ní.
I Nə́ɓā n m̄-ɓārə́n ní, ni a oō ndūḿ.
3Dan ń wur kɔl əsō dɔḿ tə́ ní, m̄-tūr̄ rɔ̄ḿ kə̄ rɔ̄ Kɔ́ɔ̄ɓē tə́.
Ndɔ̄ɔ́ anī m̄-ə́la jīḿ kum kə̄ rɔ̄n tə́ kanjə̄ kɔr ta tə́,
m̄-mbātə́ kadə̄ deē sɔl̄ kemḿ.
4Əga kemḿ dɔ Nə́ɓā tə́ anī m̄-to̰ō̰.
Dan ń m̄-gír̄ yá̰a̰ anī, tɔ́gə́ḿ ur̄ wak kɔ̄ɔ́.
5Kɔ́ɔ̄ɓē, ḭ̄ ɔ̄gə̄m̄ kótə̄ kumḿ,
kemḿ ndi gōtə́ alé, m̄-ger̄ najə̄ kə́ yā kəda alé.
6Əga kemḿ dɔ ndɔ̄ kə́ kété gə̄ tə́,
dɔ ɓāl̄ kə́ kété jóo gə̄ tə́.
7Ndɔ̄ɔ́ anī əga kemḿ dɔ pā yāḿ tə́,
m̄-tél m̄-gír̄ dɔ tə́ ɓáý ō,
m̄-dəje rɔ̄ḿ najə̄ ō.
8Kɔ́ɔ̄ɓē a mbātə́jí i kə́ njɔ́ḿ gə̄ tə́ a?
A rāā kem majə sejí to̰ aĺ i kə́ bátə́ gə̄ tə́ a?
9A rāā kem majə sejí to̰ aĺ i kə́ bátə́ gə̄ tə́ a?
A ədají najə to̰ aĺ i kə́ njɔ́ḿ gə̄ tə́ a?
10Dɔ Nə́ɓā ndígə̄nal ka̰a̰ kum tō ndoō yājí a?
Wōn̄g rāān adə̄ kótə̄ kumən njárárá dɔjí tə́ kɔ̄ɔ́ a?
11Adə̄ m-ə́da kə̄ kemḿ tə́ na: Yá̰á̰ ń tōrə̄m̄ ní,
i rāā kə́ Nə́ɓā kə́ dɔɔ́ sa̰y ngá̰ý rāā yá̰a̰ tām̄ yājí tə́ to̰ alé.
12Kɔ́ɔ̄ɓē, əga kemḿ dɔ yá̰á̰ ń ī-rāā kété tə́ ní.
A̰á̰ā̰, yá̰á̰ kə́ to kɔr kum ń ī-rāā kété ní əga kemḿ dɔ tə́.
13Téĺ əga kemḿ dɔ yá̰a̰ malang ń ī-rāā kété ní,
m̄-tél m̄-reē dɔ yá̰á̰ kə́ bo gə̄ ń ī-rāā tə́ ní.
14Nə́ɓā, i háĺ kə́ táĺ ngóy n i róbə yāí ní!
Nə́ɓā kə́ rang kə́ bo kasə seí gətóo.
15I īkɔ́ kal kógə̄ḿ beē ngóy n i nge rāā yá̰á̰ kə́ kɔr kum gə̄ ní.
Ḭ̄ ɔ́jə́ gír de kə́ rang gə̄ tɔ́gí.
16Ḭ̄ ī-gān̄g dɔ gír deē yāí gə̄ kə tɔ́gí,
adə̄ i ngán Jakob gə̄ ō, ngán Jəjep gə̄ ō.
17Nə́ɓā, dan ń man̄ gə̄ a̰a̰nī ní ndewn̄,
ɓūl̄ bā kə dɔneé ndām̄ ngin ngin.
18Kil̄ man̄ gə̄ adə̄n̄ man̄ edə ngá̰ý ō,
man̄ ndang kə̄ dan kil̄ man̄ gə̄ tə́ ō,
kum gərā yāí gə̄#77.18 Gərā yāí gə̄: Gərā gə̄ ní i man̄ ń tel̄ kə̄ loo gə̄ tə́ ní. kə́rān̄ kə̄ loo gə̄ tə́ ō.
19Dan ń man̄ yāí ndang á kōōn ɓār̄ ní anī,
man̄ gə̄ ń telə̄n̄ ní, rāān̄ adə̄ loo unjə̄ dɔ nang tə́.
Dɔ nang ndebə ō, ndām̄ ngin ngin ō.
20Ḭ̄ ī-njar róbə yāí kum bā bo tə́,
ī-rāā loo kə́ yā mānəń dan ɓūl̄ man̄ tə́ ō,
de kə́ a̰a̰ gō tóo njaí gətóo ō.
21Ḭ̄ ɔ́r deē yāí gə̄ ta róbə tītə̄ loo kɔr no ɓūtə̄ yá̰a̰ kul̄ gə̄ beé,
kə ta kūl̄ Moijə ō Aaro̰ ō.
Currently Selected:
PĀ GƏ̄ 77: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.