PĀ GƏ̄ 69
69
O̰o̰m̄ tɔdɔ̄ kújə yāí ngá̰ý
1Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. A dānə̄n̄ gō i kə kəndeé.
2Nə́ɓā, ájəm̄,
tɔdɔ̄ man̄ əhɔm̄ míndə́ḿ tə́ dɔɔ́.
3M-údə kum bɔr kə́ lú ngá̰ý tə́ kə́ loo kə́ ngan̄g gətóó gírí ō,
yá̰á̰ kə́ yā kəhɔm̄ kə̄ dɔɔ́ gətóo tū tə́ ō.
Mā i dan ɓūlūú.
Katə man̄ əjam̄ aw̄ seḿ.
4m̄-túr̄ kɔĺ sétə́ kɔr asəm̄ nák kɔ̄ɔ́.
Kem míndə́ḿ təngām̄ tólóló.
Kumḿ ɔr kɔ̄ɔ́ loo ngóō Nə́ɓā tə́.
5Ngé gə̄ ń imə̄mə̄n̄ kanjə̄ kumən ní
kutədə́ i ngá̰ý tɔȳ kutə nənga dɔḿ.
Ngé nujə loo gə̄ kə́ ngé kəhɔm̄ kemdə́ tə́
kanjə̄ kumən gə̄ ń noō tɔ́gə́də́ i ngá̰ý.
Yá̰á̰ ń m-ún aĺ ní gə̄gē a kə m̄-téləń kə m-ādə̄ gogə́!
6Nə́ɓā, yá̰á̰ ń m̄-rāā loo de kə́ mbóó tə́ ní ī-ger̄ ō.
Yá̰á̰ kə́ gōtə́ aĺ gə̄ ń m̄-rāā ní,
nge kə́ to loo mundə̄ tə́ kə́ ḭ̄ á̰a̰ā̰ aĺ ní gətóo ō.
7Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý,
ngé gə̄ ń əndān̄ kemdə́ dɔí tə́ ní ādə̄ m-ə́la rɔ̄sɔl̄ dɔdə́ tə́ alé,
Nə́ɓā yā Israel, ādə̄ m-ə́la rɔ̄sɔl̄ kə́ ngá̰ý dɔ ngé sāāí gə̄ tə́ alé!
8-9Tɔdɔ̄ tájə̄mə̄n̄ ō, əlan̄ rɔ̄sɔl̄ kə́ ngá̰ý dɔḿ tə́ ō.
m̄-tél tə̄rā ta kum ngákó̰ó̰ḿ gə̄ tə́ ō,
de kə́ deē gerə̄n alé ta kum kem kó̰o̰ madə́ḿ gə̄ tə́ ō,
i najə̄ yāí ḭ̄ tə́.
10A̰á̰ā̰, o̰o̰m̄ tɔdɔ̄ kújə yāí ngá̰ý.
Nin̄ tájīn̄, banī ndū yādə́ ní tél əsō i dɔḿ mā tə́.
11m̄-nōō ō, m̄-*ndi ɓō tām̄ yā Nə́ɓā tə́ ō,
banī nge ń noō mēr̄ kadə̄ tájə̄mə̄n̄ ɓáý to̰.
12M-ō̰ō̰ kūbə̄ sákə̄ ń i kūbə̄ kəhɔ ndoō ní,
anī nin̄ ənīn̄ pā seḿ.
13De kə́ ndágə loo kə́ kem ɓēé tə́ gə̄ a ɔrə̄n̄ i najə̄ yāḿ mā ō,
ngé kasə rāā gə̄ a ənīn̄ pā i seḿ māá ō.
14Kɔ́ɔ̄ɓē, ndɔ̄ȳ yāḿ n toó:
Kum mbang kə́ kadə̄ ī-ndigəm̄neé ní n toó:
Nə́ɓā kə́ kem majə yāí i ngá̰ý, ī-ndigəm̄ tə́.
Tɔdɔ̄ nge kajə de kə́ rɔ̄kum i ḭ̄.
15Ɔ̄rə̄m̄ kɔ̄ɔ́ kum bɔr tə́, ādə̄ m̄-dubə̄ kum tə́ alé.
Ngé gə̄ ń imə̄mə̄n̄ ní ī-taām̄ jīdə́ tə́ kɔ̄ɔ́,
únəm̄ kɔ̄ɔ́ kum ɓūl̄ man̄ tə́.
16Ādə̄ katə man̄ aw̄ seḿ alé,
ādə̄ bəlo kə́ lú ngá̰ý urəm̄ kemən tə́ alé,
ādə̄ bāá ɓádə ɔr tan dɔḿ tə́ alé!
17Kɔ́ɔ̄ɓē, ī-ndigəm̄ tə́, tɔdɔ̄ kem majə yāí i ngá̰ý.
ḭ̄ ń kumií o̰o̰ī kə de gēé ngá̰ý ní, ī-tūr̄ kumií kə̄ rɔ̄ḿ tə́.
18Ī-tūr̄ gidií kɔ̄ɔ́ taḿ mā nge kəla yāí tə́ to̰ alé.
Wur kɔl əsō dɔḿ tə́, ɔ́r bā̰ā̰ loo ndigəm̄ tə́ alé.
19Ī-reē ngɔr rɔ̄ḿ tə́, ī-rɔ̄ɔ̄ dɔḿ tə́.
Ī-taām̄ jī madə̄ ba̰ā̰ḿ gə̄ tə́.
20Ī-ger̄ kadə̄ tájə̄mə̄n̄ ō, rɔȳmə̄n̄ aĺ ō,
əlan̄ rɔ̄sɔl̄ kə́ ngá̰ý dɔḿ tə́ ō,
madə̄ kɔ̄lə̄ḿ gə̄ ḭḭ ran̄ noḿ tə́ malang ō.
21Ndū ń tájə̄mə̄n̄ ní nujə kem sák sák ō, rāām̄ kə moyo̰ó̰ ō,
m-ə̄ndā kemḿ dɔ ka̰a̰ deē kógə̄ḿ
loo rāā yá̰á̰ kə́ ɔjə kadə̄ kumən o̰o̰n tām̄ yāḿ tə́ ō,
banī m-á̰a̰ deē loo rāā yá̰á̰ kógə̄ḿ tə́ alé.
m̄-sāā deē kógə̄ḿ kə́ kadə̄ sɔl̄ kemḿ, banī m-ə́nge alé.
22Nin̄ ɓōkə́n̄ kəga kum yá̰a̰ kəsa yāḿ tə́,
ba ré kəndā man̄ rāām̄ anī, adə̄mə̄n̄ kasə kə́ masə̄ ngá̰ý kadə̄ m-ā̰ȳ.
23Ādə̄ yá̰a̰ kəsa yādə́ tél i gūmbə̄ kə́ kadə̄ əhɔdə́ ō,
mbḛ̄ kə́ kadə̄ madə̄ tadə́ gə̄ tə́sōn̄ kemeé ō.
24Ādə̄ kumdə́ risə til nding ō, a̰a̰ loo to̰ aĺ ō.
Ī-rāā ādə̄ nōrə̄n̄ ngung ngándáńg ō.
25Ī-bə̄gā wōn̄g yāí kə́ ngá̰ý dɔdə́ tə́,
ādə̄ wōn̄g yāí kə́ təngā piling ɔdədə́!
26Ādə̄ nujən̄ gérger yādə́ sák sák ō,
ādə̄ deē gətóo kem kújə tandā yādə́ tə́ ō.
27Tām̄ deē ń ḭ̄ ə́ndan ní nin̄ rāān̄ kumən ndoō tə́ ō,
ngé gə̄ ń ḭ̄ ə́ndá ɔ́də́də́ kɔ̄ɔ́ ɓá ní,
nin̄ rāān̄ adə̄ rɔ̄də́ tōr̄də́ kə̄ dɔ madə̄ tə́ ɓáý to̰ ō.
28Yá̰á̰ kə́ gōtə́ aĺ gə̄ malang ń nin̄ rāān̄ ní ī-ndang ō,
ī-ndigədə́ nin̄ aĺ ō.
29Rīdə́ ń to kem makətūbə̄ ndi kə kumuú tə́ ní ī-tɔ̄l̄ kɔ̄ɔ́.
Ī-lōō tə́dádə́ dan de kə́ súmūú gə̄ tə́.
30Mā tā a rɔ̄ḿ tō ndoō ō, m-á̰á̰ tápə̄ ngá̰ý ō.
Banī Nə́ɓā, kajə ń ájəm̄ ní,
a əndām̄ loo kə́ yá̰a̰ a ɔdə rɔ̄ḿ tū tə́ aĺ tə́.
31M-ā m-ásə kənī pā yā tɔ̄yń rī Nə́ɓā.
M-ā m̄-ɓōkə́n tɔ̄ȳ yā kɔsəń gɔnən.
32Yá̰á̰ ń nel̄ Kɔ́ɔ̄ɓē ngá̰ý tɔȳ man̄g ní n noó,
nelə̄n tɔȳ man̄g kə́ bəra kə́ kə gajəneé ō, kə kə́ hēl̄ njaneé ō.
33Ngé dɔ sōl̄ gə̄ a̰a̰n̄ anī a rāān̄ rɔ̄nel̄ najə̄n tə́.
Sḭḭ̄ gə̄ ń ā ī-sāāī Nə́ɓā ní, ā ī-ndiī kə kumsí ɓāl̄ ngá̰ý!
34Kɔ́ɔ̄ɓē oō ndɔ̄ȳ yā ngé ndoō gə̄.
Ni-mbātə́ deē yān gə̄ ń əhɔn̄də́ ɓəloó ní alé.
35Dɔ rā̰ ō dɔ nang ō bā bo gə̄ kə yá̰a̰ malang kə́ kum tə́ gə̄ ō,
ī-ɓōkə́nī tɔ̄ȳ!
36Tɔdɔ̄ Nə́ɓā a ajə ɓē kə́ Siyo̰ ō,
a tél yā rāā ɓē gə̄ kə́ dɔ nang kə́ Juda tə́ gogə́ rang ō.
Gír deē yān gə̄ a télən̄ yā taā ɓē gə̄ ní gogə́ ō,
a télən̄ yā ndi kem ɓē gə̄ ní tə́ gogə́ ō.
37Ngán kaa ngé kəla yān gə̄ a əngen̄ ɓē gə̄ ní yá̰a̰ ndəbā tə́ ō,
ngé gə̄ ń tárən̄ Kɔ́ɔ̄ɓē ní a ndin̄ kemeé ō.
Currently Selected:
PĀ GƏ̄ 69: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.