PĀ GƏ̄ 65
65
Nə́ɓā, ásə kadə̄ de gə̄ ɓōkə́nī tɔ̄ȳ
1Pā kə́ kem makətūbə̄ yā ngār yā gōsə̄ pā gə̄ tə́. I pā yā Dabid. Pā.
2Nə́ɓā, ḭ̄ ń ī-ndi Siyo̰ ní,
ásə kadə̄ de gə̄ ɓōkə́nī tɔ̄ȳ ō,
ran̄ dɔ ndūdə́ tə́ seí ō.
3Ḭ̄ ń i nge koō ndɔ̄ȳ yā de gə̄ ní,
deē ndul malang a reē yā kugə̄ rɔ̄í tə́.
4Yá̰á̰ kə́ gōtə́ aĺ gə̄ tɔyn̄ tɔ́gə́ḿ,
banī ḭ̄ ásə kɔr̄ majaĺ yājí gə̄ kɔ̄ɔ́.
5Rɔ̄nel̄ i kə deē ń ī-gə̄rān kadə̄ reē rɔ̄í tə́ ní.
Ni a ndi ndágə loo kə́ gīr̄ gidə kújə yāí tə́.
Yá̰a̰ kəsa kə́ majə majə gə̄ kə́ kem kújə yāí tə́ ō,
yá̰á̰ gə̄ kə́ kem kújə́ kə́ táĺ yāí tə́ ō ndānə̄n̄jí.
6Nə́ɓā nge kajəjí, yá̰á̰ ń jə-dəjeī ní, ḭ̄ ī-rāā yá̰á̰ kə́ to kɔr kum gə̄
ī-tɔ̄ləń ɓōn kə́ kemjí tə́ ādə̄jí i kə gō kem majə yāí.
De gə̄ malang kə́ dɔ nang tə́ kə taá ō,
kə́ dɔ dor̄ kə́ sa̰y ngá̰ý gə̄ tə́ ō, əndān̄ kemdə́ i dɔí tə́.
7Ḭ̄ ī-tə́ndā mbal̄ bo gə̄ ādə̄ ran̄ ngan̄g gotə kógə̄ḿ kə tɔ́gí.
Ī-do̰ō̰ kəhɔ rɔ̄ tɔgə ndāŕ tə́ ɓōdīí tə́.
8Ī-tetə kōō bā bo gə̄ ō, kōō bəngáĺdə́ gə̄ ō,
kōō gír de gə̄ ń a tṵ́ṵ̄n̄ rɔ̄ɔ̄ ní ō,
adə̄ tél ton̄ jəke.
9Yá̰a̰ gə̄ ń ī-rāā yā kɔjəń de gə̄ kum yá̰a̰ ní, ɔr kum de kə́ ta ngóy dɔ nang tə́ gə̄.
Ḭ̄ ī-rāā ādə̄ loo kə́ gír ɓē tə́ ō, kə́ no ɓē tə́ ō, urən̄ kɔĺ rɔ̄nel̄.
10Ḭ̄ ī-go̰ō̰ dɔ nang, ādə̄n man̄ adə̄ a̰ȳ ō,
ādə̄n yá̰a̰ kənge ngá̰ý ō.
Man̄ yā Nə́ɓā i ngá̰ý kem kārə̄n tə́.
Ḭ̄ ə̄ndā dɔ kōō gémē danaá tām̄ yā de gə̄ tə́.
Loo rāā ń ā ī-rāā dɔ nang kadə̄ majə ndɔr̄ ní n toó:
11Ī-rāā man̄ dɔ ɓaȳ ndɔr̄ man̄g tə́, ī-jɔ̄rīyɔ̄n adə̄ gidə asə naā.
Ī-rāā adə̄ man̄ edə dɔ tə́ sow sow.
Ī-tɔ́r̄ taí dɔ kum yá̰á̰ ń əɓa tū tə́ ní tə́.
12Ī-tɔ̄l̄ ta kem majə yāí ɓāl̄ ń noō tə́ kə gōó majə.
De gə̄ əngen̄ yá̰á̰ ngá̰ý kə gō tóóí.
13Yá̰a̰ kul̄ gə̄ alə̄n̄ loo kem dəla loo tə́ ō.
Ngán mbal̄ gə̄ do̰ō̰n̄ rɔ̄nel̄ ndāŕ tə́ ɓōdə̄də́ tə́ ō.
14Ɓūtə̄ yá̰a̰ kul̄ gə̄ rosən̄ loo dɔ mu kə́ mbōl̄ tə́ tītə̄ yá̰á̰ súū rɔ̄.
Gémē taā loo kum wól loo gə̄ tə́ tītə̄ kūbə̄ kə́ seĺ dɔ yá̰á̰ tə́.
Yá̰a̰ malang ur kɔĺ rɔ̄nel̄ ō, ənī pā ō.
Currently Selected:
PĀ GƏ̄ 65: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.