PĀ GƏ̄ 58
58
Nə́ɓā kə́ nge gān̄g sarya dɔ nang tə́ ndi noó
1Pā kə́ kem makətūbə̄ yā ngār yā gōsə̄ pā gə̄ tə́. A ənīn̄ i tītə̄ loo kənī pā ī-lōō kadə̄ nujən̄neé. I pā yā Dabid kə́ yā ndóoń deē yá̰a̰.
2Rɔ̄kum, dan ń ā ɔ̄rī najə̄ anī yá̰á̰ kə́ gōtə́ utə̄ tan kɔ̄ɔ́.
Ngán deē ndul gə̄, sarya gān̄gsí i kə gō róbəneé nəkɔ́ a?
3Sḛ́ý aĺ bátə́! Ī-rāāī yá̰á̰ kə́ gōtə́ aĺ gə̄ i ndāńg ndāńg.
I sḭḭ̄ kɔ́ gə̄ n ə̄nīī rɔ̄sí
ī-rāāī ādə̄ dɔ́nɔ taā loo dɔ nang tə́ kum kə̄ kété kété ní.
4Dan ń əlan̄ gír ndān̄ ngé kem ndul gə̄ ní,
nin̄ i de kə́ nujə kɔ̄ɔ́ gə̄.
Ngé sor̄ gə̄ əlan̄ gír kɔr̄ najə̄ kə́ a̰a̰ gō naā aĺ gə̄
i ndɔ̄ kojədə́ tə́.
5Najə̄ kə́ tadə́ tə́ to tītə̄ kong lī beé.
Nin̄ rāān̄ mbī mbóo tītə̄ lī kakə́ḿ
6kə́ mbātə́ koō ndū ngé bógə̄rō de gə̄ ō,
ndū mbōlí kə́ ger̄ yá̰a̰ tɔȳ madə̄n gə̄ malang ō beé.
7Ɓɔ́ Nə́ɓā, ī-tétə̄ gɔgədə́ tadə́ tə́ kɔ̄ɔ́!
Kɔ́ɔ̄ɓē, ī-tétə̄ ngān̄g ɓɔl gə̄ ń noō kɔ̄ɔ́!
8Ādə̄ aw̄n̄ kɔ̄ɔ́ tītə̄ man̄ kə́ nūgə́ beē!
Nə́ɓā, ī-túr̄də́ kə kum gə̄rā yāí gēé anī nin̄ n tə́sōn̄ kɔ̄ɔ́ toō.
9Ādə̄ ton̄ tītə̄ kotəró ń ɔr ndɔl gōn tə́ a njə̄rāń ní!
Ādə̄ a̰a̰n̄ kum mbang aĺ tītə̄ ngōn̄ kə́ kɔr̄ beé!
10Nə́ɓā a sa̰ā̰də́ kɔ̄ɔ́ gidə kógə̄ḿ tītə̄ wōn̄g kə́ rā deē beé,
pá tá jóo yāsí gə̄ a əlan̄ gír kotə
tītə̄ kō̰n̄ kə́ hor o̰o̰ beé ɓáý.
11De kə́ súmūú a rāā rɔ̄nel̄ dan ń ni-a̰a̰ Nə́ɓā loo rāā ba̰ā̰ tə́ ní ō,
a tə́go njan kum mósə́ ngé kem ndul gə̄ tə́ ō.
12Loo ń noō tə́ de gə̄ a ədan̄ na:
Rɔ̄kum, de kə́ súmūú a ənge yá̰a̰ kəndā nja yān.
Rɔ̄kum, Nə́ɓā kə́ nge gān̄g sarya dɔ nang tə́ ndi noō.
Currently Selected:
PĀ GƏ̄ 58: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.