PĀ GƏ̄ 56
56
De kógə̄ḿ kə́ rāānən̄ yá̰á̰ kə́ tōr̄ əya̰ rɔ̄n jī Nə́ɓā tə́
1Pā kə́ kem makətūbə̄ yā ngār yā gōsə̄ pā gə̄ tə́. A ənīn̄ i tītə̄ loo kənī pā déŕ kə́ dɔ kāgə̄ kə́ bo gə̄ kə́ loo kə́ sa̰y ngá̰ý tə́. I pā yā Dabid kə́ yā ndóoń deē yá̰a̰. Ɔr̄ i najə̄ yā Dabid ń Pilistin gə̄ əhɔnən̄ kem ɓē kə́ Gat tə́ ní.
2Nə́ɓā, á̰a̰ kum tō ndoō yāḿ, tām̄ aw̄n̄ seḿ gadə gadə!
A rɔ̄ɔ̄mə̄n̄ ō, a rāān̄ kumḿ ndoō tə́ ō, kə dɔ ndɔ̄ gə̄.
3Ngé rɔ̄ɔ̄ḿ gə̄ aw̄n̄ seḿ gadə gadə kə ndɔ̄ gə̄,
banī ɓūtə̄ de kə́ ngá̰ý gə̄ rɔ̄ɔ̄n̄ dɔ rā̰ tə́ tām̄ yāḿ tə́.
4Ndɔ̄ ń ɓōĺ rāām̄neé tə́ ní, m-ə̄ndā kemḿ dɔí tə́.
5m̄-tɔ̄ȳ Nə́ɓā tām̄ najə̄ kɔrə̄n tə́,
m-ə̄ndā kemḿ dɔn tə́, m̄-ɓōĺ to̰ alé.
Deē a rāā i rí seḿ?
6Nin̄ rāāmə̄n̄ adə̄ m-á̰á̰ tápə̄ ō,
gírə̄n̄ i rāā yá̰á̰ kə́ majaĺ seḿ ō, kə dɔ ndɔ̄ gə̄.
7Nin̄-umə̄mə̄n̄, əndān̄ kumdə́ gírə́ḿ tə́ ō,
unən̄ tóo njaḿ ō, yā tɔ̄lə̄m̄.
8Yá̰á̰ kə́ gōtə́ aĺ ń rāān̄ asə naā beé ní a ajən̄ a?
Nə́ɓā, ī-mbə́rē de gə̄ ń noō ī-tə́nādə́ kə wōngōó!
9Ī-tə́da kutə njaḿ ń m̄-dáyń ní kɔ̄ɔ́ ɓá ní,
ī-taā man̄ kumḿ kem kū yāí tə́ tā. Kutədə́ i kə́ ndang kem makətūbə̄ yāí tə́ aĺ a?
10Ndɔ̄ ń m-ā m̄-ɓārī kadə̄ ī-dḭḭ̄m̄neé tə́ ní,
madə̄ ba̰ā̰ḿ gə̄ a tūrə̄n̄ gándə́də́.
M-ger̄ kadə̄ Nə́ɓā i seḿ māá.
11m̄-tɔ̄ȳ Nə́ɓā tām̄ najə̄ kɔrə̄n tə́.
A̰á̰ā̰, m̄-tɔ̄ȳ Kɔ́ɔ̄ɓē tām̄ najə̄ ní tə́.
12M-ə̄ndā kemḿ dɔ tə́, m̄-ɓōĺ to̰ alé.
De gə̄ a rāān̄ i rí seḿ?
13Nə́ɓā, yá̰á̰ ń m-ə̄nī ndūḿ kadə̄ m-ādī ní,
kə̄rān i dɔḿ tə́.
M-ā m̄-ndējī yá̰a̰ tun̄ gə̄ kə́ yā ɓōkíīneé tɔ̄ȳ.
14Tɔdɔ̄ ḭ̄ ɔ̄rə̄m̄ ta yo tə́.
Ī-rāā ādə̄ m-ə̄ndā njaḿ kum yá̰á̰ kə́ a reē kə yá̰á̰ kə́ majaĺ dɔḿ tə́ alé.
Adə̄ m̄-njə̄rā ta kumií tə́,
kum loo kə́ unjə̄ kow yā ngé ndi kə kumdə́ gēé tə́.
Currently Selected:
PĀ GƏ̄ 56: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.