PĀ GƏ̄ 50
50
Nə́ɓā reē yā gān̄g sarya
1I pā yā Asap.
Nə́ɓā, Nə́ɓā ń i Kɔ́ɔ̄ɓē ní, ɔr̄ najə̄.
Ni ɓāŕ dɔ nang,
əla gír loo ń mbang a əɓa tū tə́ ní,
bátə́ loo ń mbang a udə tū tə́ ní.
2 Siyo̰ ń i ɓē kə́ majə ngá̰ý ní,
Nə́ɓā ndi kemeé ndə́lē pipir.
3Ādə̄ Nə́ɓā yājí reē ba ndi tan mbóo alé!
Hor kógə̄ḿ a o̰o̰ loo kété non tə́ ō,
néĺ kə́ ngan̄g ngá̰ý əla kə gō gidəneé ō.
4Nə́ɓā ɓāŕ dɔ rā̰ dɔɔ́ nú ō dɔ nang ō
kadə̄ reēn̄ kum sarya yā gír deē yān gə̄ tə́.
5Ni-əda na, de gə̄ yān gə̄ ń tunə̄n̄ yá̰a̰
rāānəń madə̄ naā seneé ní,
kə ɔ́siī dɔdə́ naā tə́ kə ādə̄niī.
6Ādə̄ dɔ rā̰ ənī mbēr̄ əda na: Kɔ́ɔ̄ɓē i de kə́ gōtə́,
i ni n i Nə́ɓā kə́ nge gān̄g sarya ní.
7Sḭḭ̄ gír deē yāḿ gə̄ ōōī, m-ā m-ɔ̄r̄ najə̄ sesí.
Israel, i mā Nə́ɓā ń i Nə́ɓā yāí ní n m-ā m̄-gɔŕyɔ̄ī najə̄ ní.
8M-ə̄ndā najə̄ dɔí tə́ i tām̄ yá̰a̰ tun̄ yāí gə̄ tə́ alé.
Yá̰a̰ tun̄ yāí kə́ róō horoó gə̄ ton̄ ta kumḿ tə́ ngándáńg.
9M-ā m-āw̄ ɓēé looí yā kəhɔ man̄g kə́ bəra kógə̄ḿ aĺ ō,
yā kəhɔ bal bə̄yā̰ gə̄ kə́ kem gong yāí gə̄ tə́ aĺ ō.
10Tɔdɔ̄ dā̰ gə̄ malang kə́ kem ku gə̄ tə́ i dā̰ yāḿ gə̄ ō,
dā̰ gə̄ kə́ dɔ mbal̄ kə́ dūbú ngá̰ý gə̄ tə́ i dā̰ yāḿ gə̄ ō.
11m̄-ger̄ yel̄ gə̄ malang kə́ dɔ mbal̄ gə̄ tə́ ō,
dā̰ kə́ bembeé gə̄ malang i yāḿ gə̄ ō.
12Ré ɓō rāām̄ anī m-ā m-ə́daī alé,
tɔdɔ̄ dɔ nang kə taā malang ō,
yá̰a̰ malang kə́ tū tə́ ō i yāḿ.
13M-ā m-ə́sa dā̰ man̄g kə́ bəra gə̄ a?
M-ā m-ā̰ȳ mósə bal bə̄yā̰ gə̄ a?
14Ādə̄ yá̰a̰ tun̄ yāí kə́ ndējə̄ i ɓōkə́ Nə́ɓā tɔ̄ȳ ō,
ī-rāā yá̰a̰ gə̄ ń ə̄nī ndūí yā rāā kadə̄ Nə́ɓā kə́ dɔɔ́ sa̰y ngá̰ý ní ō.
15Gō tə́ ré wur kɔl əsō dɔí tə́ anī ī-ɓārə́m̄,
anī m-ā m-ájiī kadə̄ ā ɔ́sə gɔnəḿ.
16Banī Nə́ɓā əda nge kem ndul na:
Ún gō míndə́ḿ gə̄ kə dɔí ō,
ɔ̄r̄ najə̄ kə́ dɔ madə̄ naā yāḿ tə́ kə taí ō, i tām̄ rí tə́?
17Ḭ̄ ń ī-gḛy ndéy kɔjə̄ aĺ ō,
ī-mbātə́ najə̄ yāḿ ō ní.
18Ré á̰a̰ nge ɓogə anī ī-rāā kem kógə̄ḿ seneé ō,
ī-ɓo rɔ̄í tū yā nge sāā nə̄yá̰ deē tə́ ō.
19Ɔ̄r̄ najə̄ kə́ majaĺ ō ī-sor̄ ō.
20Ī-ndi ī-tām̄ kə ngōkó̰ó̰í ō,
ī-tə́da najə̄ kə́ majaĺ dɔ kem kó̰o̰ madí tə́ ō.
21Yá̰á̰ ń ī-rāā ní n noó ō, kə m-ə́da najə̄ aĺ ō a?
Ɔ́jəń na mā m̄-to tītīí a?
m-ə̄ndā najə̄ dɔí tə́!
Yá̰a̰ malang ń ī-rāā ní m-ā m̄-ɓōkə́də́ ndágá ta kumií tə́.
22Sḭḭ̄ gə̄ ń dɔsí ndígə̄nal Nə́ɓā ní,
ə̄ndāī kemsí dɔ najə̄ ń noō tə́ majə.
Aĺ anī m-ā m̄-rə́yā̰sí naā tə́ háráńg háráńg kɔ̄ɔ́ ō,
de kə́ yā taāsí jīḿ tə́ a gətóo ō.
23Deē ń yá̰a̰ tun̄ yān i tɔ̄ȳ ní n i deē ń ɔsə gɔnəḿ ní.
Deē ń ngɔ̄m̄ hálən majə adə̄ ni i de kə́ súmūú ní,
m-ā m-ɔ́jən loo kajə ń Nə́ɓā a ajə deē ní.
Currently Selected:
PĀ GƏ̄ 50: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.