PĀ GƏ̄ 5
5
Ndɔ̄ȳ yā de kə́ Kɔ́ɔ̄ɓē əhɔn kə̄ rɔ̄n tə́
1Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə nalaá. I pā yā Dabid.
2Kɔ́ɔ̄ɓē, ī-nēl̄ mbīí ōoń najə̄ kɔrə̄ḿ,
ōō to̰ō̰ ń m-ā m̄-to̰ō̰ ní.
3Mban̄g yāḿ, Nə́ɓā yāḿ,
ī-nēl̄ mbīí ōoń nōō yāḿ.
I ḭ̄ n m̄-ndɔ̄yī ní.
4Kɔ́ɔ̄ɓē, dəloí anī ōō ndūḿ.
Kə ndɔ̄í anī m-ə̄ndā dɔ yá̰a̰ malang danaá tām̄ yāí tə́,
ba m̄-tél m̄-ndi m̄-ngóō!
5Ḭ̄ i Nə́ɓā kə́ madə̄ majaĺ alé.
Loo yā nge kem ndul gətóo looí.
6De kə́ nge ɓōĺ ndíl deē alé a aw̄ ta kumií tə́ alé.
Ngé rāā majaĺ gə̄ malang ní nelī sedə́ alé.
7Ḭ̄ i nge rāā kadə̄ ngé kɔr̄ najə̄ kə́ sor̄ gə̄ oyn̄.
De kə́ nge gól̄ de gə̄ ō, ɓōkə́ mósə de gə̄ nang tə́ ō ní
nel̄ Kɔ́ɔ̄ɓē seneé aĺ bátə́.
8Banī i ndūí ń ī-ra dɔ tə́ tām̄ yāḿ tə́ ní n
ndḛḛ̄ kadə̄ mā m-údəń kújə yāí tə́ ní.
M-ə̄sō kə̄ nang tə́ noí tə́ i kə ɓōló kemḿ tə́,
kumḿ sɔɔ̄ loo kə́ táĺ yāí.
9Kɔ́ɔ̄ɓē, ḭ̄ ń i Nə́ɓā kə́ nge rāā yá̰á̰ kə́ gōtə́ ní,
ɔ́r noḿ najə̄ yā madə̄ ba̰ā̰ḿ gə̄ tə́.
Ī-rāā róbə yāí noḿ tə́ ādə̄ dɔ asə naā.
10Deē asə taā kem najə̄ kɔr̄də́ alé.
Yá̰á̰ ń nin̄ a gírə̄n̄ ní i nujə kə deé ngóy.
Najə̄ kə́ ta ndo̰də́ tə́ i najə̄ kə́ kadə̄ nel̄ de gə̄,
ba nga ngá̰á̰də́ i bāá ɓádə́ kə́ ta ra kə wōyōó.
11Nə́ɓā, ə́ndádə́ tām̄ majaĺ yādə́ tə́!
Ādə̄ yá̰a̰ gə̄ ń nin̄ kɔ́ gə̄ nómə̄n̄ rāā ní rāādə́ adə̄ tə́sōn̄!
Ī-tə̄ɓādə́ kɔ̄ɔ́ tām̄ yá̰a̰ rāādə́ malang kə́ gōtə́ aĺ gə̄ tə́,
tām̄ nin̄ oōn̄ taí alé.
12Loo ń noō tə́ de gə̄ malang ń ḭ̄ i loo ɓɔ̄ɔ̄ rɔ̄ yādə́ ní a rāān̄ rɔ̄nel̄.
Nin̄ a rāān̄ walya ngándáńg.
Ngé gə̄ ń rīí nel̄də́ ní ā ī-rāādə́ kadə̄ əgan̄ kɔŕ rɔ̄nel̄ ō,
ā ī-ngɔ̄m̄də́ ō.
13Kɔ́ɔ̄ɓē, i ḭ̄ n i nge rāā majə kə de kə́ súmūú ní.
Kem majə yāí kə́ tām̄ yān tə́ to i tītə̄ der kə́ utə̄ gidən beé.
Currently Selected:
PĀ GƏ̄ 5: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.