PĀ GƏ̄ 45
45
Pā kəndā mban̄g ō kaw̄ kújú yā nə̄yá̰n ō
1Pā kə́ kem makətūbə̄ yā ngār yā gōsə̄ pā gə̄ tə́. A dānə̄n̄ gō i kə kəndeé. Pā yā ngán Kore gə̄ yā ndóoń deē yá̰a̰. I pā tár.
2Najə̄ kə́ majə ngá̰ý i kemḿ tə́, m-ə́hɔ taḿ dɔ tə́ sétə́.
m̄-tə́da pā yā rɔȳń mban̄g kógə̄ḿ.
Ādə̄ ta ndo̰ḿ i yá̰a̰ ndang makətūbə̄ kə́ jī de
kə́ ger̄ ndang makətūbə̄ ngá̰ý tə́.
3Ī-balsáa ī-tɔȳ dəngam gə̄ malang ō.
Najə̄ gə̄ ń teēn̄ taí tə́ ní i najə̄ kə́ nel̄ ngá̰ý gə̄ ō.
Adə̄ de gə̄ a̰a̰ gerə̄n̄ kadə̄ Nə́ɓā rāā majə seí i kə́ kə́ njɔ́ḿ gə̄ tə́ gə̄ tə́.
4Go̰ rɔ̄, ī-do̰ō̰ kaskar yāí dɔ ɓúrí tə́,
i rī ɓār̄ yāí ō, i yá̰á̰ súū rɔ̄ yāí ō.
5Āl̄ sə́nda ō, úr gərā ō, ba ī-tetə rɔ̄ɔ̄
tām̄ yā najə̄ kə́ rɔ̄kum tə́ ō,
yā rɔ̄ɔń dɔ ngé ndoō gə̄ tə́ ō, dɔ yá̰á̰ kə́ súmūú tə́ ō!
Ādə̄ jī ko̰í rāā yá̰á̰ kə́ to ɓōĺ gə̄.
6Ādə̄ kum gərā yāí kə́ ta katə gə̄ əlan̄ ɓōĺ kə́ ngá̰ý kem de gə̄ tə́ ō,
ādə̄ gərā yāí gə̄ tɔ́sə̄n̄ kújə́ mósə madə̄ ba̰ā̰í gə̄ ō.
7Nə́ɓā, kōr̄ kāgə̄ mbang yāí ndi ngándáńg.
Kāgə̄ mban̄g yāí i yá̰a̰ rāāí kə́ súmūú ō.
8Yá̰á̰ kə́ gōtə́ nelī, ba yá̰á̰ kə́ majaĺ nelī aĺ ngá̰ý.
Nə́ɓā, i tām̄ ń toō tə́ n Nə́ɓā yāí ur yibə̄ rɔ̄nel̄ dɔí tə́
gə̄rāīneé ḭ̄ ba i madí gə̄ aĺ ní.
9 Mír ō aloe ō kanel ō,
otən̄ mbo̰o̰ tū kūbə̄ yāí gə̄ tə́.
Kújə mban̄g yāí ń súūn̄ kə ngān̄g dā̰á̰ ní,
ndū yá̰á̰ kə́ ɓār̄ gōsə̄ majə teē tū tə́ adī rɔ̄nel̄.
10Ngán mban̄g kə́ dəyá̰ gə̄ ran̄ kə yá̰á̰ súū rɔ̄ yāí gēé ō,
nə̄yá̰ mban̄g súū rɔ̄n kə lɔ́ŕ kə́ kḭḭ Opir rań dɔ jī ko̰í tə́ ō.
11Ngōnə̄ḿ kə́ dəyá̰, ōō! Á̰a̰ā̰ ō, ī-nēl̄ mbīí majə ō.
Ādə̄ dɔí ndígə̄nal gír deē yāí gə̄ ō, gír kojə yāí ō.
12Ādə̄ nel̄ mban̄g seí tām̄ mandií tə́!
I ni n i kɔ́ɔ̄í ní.
Ɔ́sə noí nang tə́ ī-rɔȳnneé.
13Tir gə̄ ń i de kə́ ngé kənge yá̰á̰ tɔȳ gír de kə́ rang gə̄ ní,
a adīn̄ kadə̄ karī gə̄ kadə̄ nelīneé sedə́.
14Ngōn̄ mban̄g kə́ dəyá̰ ndə́lē pipir kem kújə yā mban̄g tə́,
əjōn̄ kūbə̄ yān i kə kəlā lɔ́rɔ́.
15Súūnən̄ kə yá̰á̰ kə́ rāā ɓáĺ ngá̰ý gə̄ ba reēn̄ seneé
kə̄ rɔ̄ mban̄g tə́.
Ngámandə madə̄n gə̄ ń njə̄rān̄ gōn tə́ ní reēn̄ sedə́ rɔ̄í tə́.
16Nin̄ njə̄rān̄ i kə gō naá tururu ō,
kə rɔ̄nel̄ kə́ ngá̰ý ō n udən̄neé ndogó mbangāá ní.
17Ngání kə́ dəngam gə̄ a unən̄ gotə bɔbí gə̄ ō kaaí gə̄ ō.
Ā ī-tə́ndādə́ ngār kə gō loo gēé dɔ nang tə́.
18M-ā m̄-ter̄ kem de gə̄ dɔ rīí tə́ kə dɔ ɓāl̄ gə̄ malang,
adə̄ gír de gə̄ a ɓōkə́nī tɔ̄ȳ ngándáńg.
Currently Selected:
PĀ GƏ̄ 45: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.