PĀ GƏ̄ 44
44
Ɓá tā ba ī-mbātə́jí kɔ̄ɔ́
1Pā kə́ kem makətūbə̄ yā ngār yā gōsə̄ pá gə̄ tə́. I pā yā ngán Kore gə̄.
2Nə́ɓā, yá̰á̰ kə́ to rī ɓār̄ gə̄ ń ī-rāā kété jóo ɓāl̄ yā kaají gə̄ tə́ ní,
bɔbə̄jí gə̄ ənīn̄jí gotə, adə̄ j-oō kə mbījí.
3Ḭ̄ ī-taā dɔ nang yā nápar de kə́ rang gə̄ jīdə́ tə́ kə jīí ādə̄də́.
Ḭ̄ ī-rāā gír de kə́ rang gə̄ majaĺ
yā kadə̄ gír deē yāí gə̄ taān̄neé loo kə̄ loo gə̄ tə́.
4Kaají gə̄ taān̄ ɓē, banī i kə ta kūl̄ kaskar yādə́ alé.
Nin̄ tetən̄ rɔ̄ɔ̄, ba i kə tɔ́gə jīdə́ nin̄ kɔ́ gə̄ alé.
I īkɔ́ n ī-dḭḭ̄də́ kə tɔ́gí ō, ə́hɔ́də́ kə̄ rɔ̄í tə́ majə ō,
ɔ́jə́də́ kadə̄ nelī sedə́ ō ní.
5Ɓɔ́ Nə́ɓā, ḭ̄ ń i mban̄g yāḿ ní,
ādə̄ ndūí anī Jakob a tetə rɔ̄ɔ̄.
6Jə-tā̰ madə̄ ba̰ā̰jí gə̄ rɔ̄ɔ̄ j-əndādə́ sa̰y i kə ta kūlīí ō,
jə-tə́ɓā ngé rɔ̄ɔ̄jí gə̄ kə njají i kə ta kūlīí ō.
7M-ə̄ndā kemḿ dɔ ga̰ gərā yāḿ tə́ aĺ ō,
kaskar yāḿ tetə rɔ̄ɔ̄ adə̄m̄ aĺ ō.
8Tɔdɔ̄ i ḭ̄ n i nge kajəjí jī ngé rɔ̄ɔ̄jí gə̄ tə́ ní ō,
nge kəla rɔ̄sɔl̄ kə́ ngá̰ý dɔ madə̄ ba̰ā̰jí gə̄ tə́ ní ō.
9J-ənī pā kə dɔ ndɔ̄ gə̄ jə-tɔ̄yń Nə́ɓā yājí.
Jə-ndigə tɔ̄ȳ rīn ngándáńg.
10Ba ń toō ɓáa ī-mbātə́jí kɔ̄ɔ́ ō, ə́la rɔ̄sɔl̄ dɔjí tə́ ō,
ī-teē kə ngé rɔ̄ɔ̄ yājí gēé to̰ aĺ ō.
11Ḭ̄ ī-rāā ādə̄ jə-tél kə gidəjí ta kum ngé rɔ̄ɔ̄jí gə̄ tə́.
adə̄ madə̄ ba̰ā̰jí gə̄ ɔyn̄ yá̰a̰ kənge yājí gə̄ aw̄n̄neé.
12Ḭ̄ ə́lájí kem jīdə́ tə́ tītə̄ batə̄ gə̄
kə́ aw̄n̄ sedə́ kə̄ loo tɔ̄l̄də́ tə́ beē.
Ḭ̄ ī-tə̄ndā ī-tḭ̄jí kə̄ dan nápar de gə̄ tə́.
13Ḭ̄ ə́ya̰ ādə̄ mangən̄ gír deē yāí gə̄ kə gātə̄ kə́ ngáā aĺ,
manə̄n kə́ sḛ́ý beē gə̄gē ā ə́nge dɔ tə́ alé.
14Ə́ya̰ madə̄ ɓējí gə̄ adə̄ tájə̄n̄jí ō,
de gə̄ ń ndin̄ gīrə̄n̄ gidəjí ní lúrə̄n̄jí ō əgōn̄jí ō.
15Ḭ̄ ə́yá̰ nápar de gə̄ adə̄ ənīn̄ pā sejí ō,
gír de gə̄ tə́gān̄ dɔdə́ nek nek mbóon̄neé sejí ō.
16Dan ń m-ōō ndū madə̄ ba̰ā̰ kə́ nge kənī rɔ̄ loo sa tají tə́ ō,
loo tájə̄ Kɔ́ɔ̄ɓē tə́ ō anī,
17m-á̰a̰ kadə̄ m̄-tél kə̄ nang tə́ kə dɔ ndɔ̄ gə̄ ō,
rɔ̄ḿ sɔlə̄m̄ ō.
18Yá̰a̰ gə̄ ń noō malang rāān̄jí ba dɔjí ndígə̄nalií aĺ ō,
jə-mbātə́ madə̄ naā yāí aĺ ō.
19J-əya̰ gōí aĺ ō,
jə-tɔ̄ kɔ̄ɔ́ dɔ róbə yāí tə́ aĺ ō.
20Banī ḭ̄ ī-rējə̄jí
adə̄ jḭḭ i loo yā tal̄ gə̄ tə́.
Ḭ̄ ə̄nī loo kə́ risə til nding dɔjí tə́.
21Ré kété ní dɔjí ndígə̄nal rī Nə́ɓā yājí ō,
jə-sə́ra jījí kə̄ rɔ̄ nə́ɓā kógə̄ḿ kə́ mbā tə́ ō anī,
22Nə́ɓā ń i nge ger̄ yá̰á̰ kə́ to loo ɓɔ̄ɔ̄ tə́ kem de gə̄ tə́ ní a a̰a̰ aĺ a?
23Banī i najə̄ yāí tə́ n tɔ̄lə̄n̄neéjí kə dɔ ndɔ̄ gə̄ ō,
rāān̄neéjí batə̄ kə́ yā tɔ̄l̄ gə̄ tə́ ō ní.
24Kɔ́ɔ̄ɓē, ī-ndól̄!
Ā ī-ɓīī i najə̄ rí tə́?
Ī-ndól̄, ba ī-lōō mbātə́jí kə́ njɔ́ḿ gə̄ tə́!
25Ī-ɓɔ̄ɔ̄ ta kumií kɔ̄ɔ́ i tām̄ rí tə́?
Yá̰á̰ kə́ to kum kaȳ aĺ ń teē dɔjí tə́ ō,
rāā ń rāān̄ kumjí ndoō tə́ ō ní,
dɔí ndígə̄nal kɔ̄ɔ́ i tām̄ rí tə́?
26Tɔdɔ̄ jə-to i kum bumbə́rú tə́ ō,
jə-laa ta kemjí i nang tə́ ō.
27Ḭ́ḭ dɔɔ́, ī-dḭḭ̄jí!
Ī-gān̄g dɔjí sɔɔ̄ń kem majə yāí!
Currently Selected:
PĀ GƏ̄ 44: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.