PĀ GƏ̄ 42
42
Makətūbə̄ Pā gə̄ kə́ nge ko̰ jōó
(Pā gə̄ 42—72)
Tītə̄ ń kəndā man̄ rāań dul ní
1Pā kə́ kem makətūbə̄ yā ngār yā gōsə̄ pā gə̄ tə́, i pā yā ngán Kore gə̄.
2Tītə̄ ń kəndā man̄ rāań wāl̄ adə̄ sāań man̄ pa pak ní,
Nə́ɓā yāḿ, m̄-sāāī pa pak ō.
3Kəndā Nə́ɓā rāām̄, kəndā Nə́ɓā kə́ ndi kə kumneé rāām̄.
I rə́ngáý tə́ n m-ā m-údə kem kújə yān tə́
yā ra ta kumən tə́ ní?
4Kadaá ō ndɔ̄ɔ́ ō ní yá̰a̰ kəsaḿ i man̄ kumḿ,
tām̄ a dəjemə̄n̄ ngándáńg na ké Nə́ɓā yāḿ ngaá i rá wa.
5Əga kemḿ dɔ yá̰a̰ gə̄ ń toō tə́ anī kemḿ əgam̄ biting.
Kété m̄-njə̄rā no kósə de kə́ ngá̰ý gə̄ tə́,
m-ɔ́r nodə́ bátə́ m-āw̄ sedə́ kújə yā Nə́ɓā tə́.
I kósə́ ngé rāā nāā gə̄ kə́ a əgan̄ i kɔŕ rɔ̄nel̄ dɔ Nə́ɓā tə́ ō,
a ɓōkə́n̄ i Nə́ɓā tɔ̄ȳ ō.
6Kə m̄-rāā rɔ̄ḿ ndoō i najə̄ rí tə́?
Kə m̄-nōō rɔ̄ḿ i tām̄ rí tə́?
Kəndā kem dɔ Nə́ɓā tə́
ba tél ɓōkə́n tɔ̄ȳ gogə́ rang i só tə́.
Ni i nge kajəḿ ō Nə́ɓā yāḿ ō!
7Nə́ɓā yāḿ, m̄-ndigə rāā rɔ̄ḿ ndoō alé,
ba i kɔr̄ najə̄ seí loo ń toō tə́,
ta kəɓa man̄ Jurdḛ tə́,
kadə mbal̄ ń a ɓāŕnən̄ na i ngōn̄ mbal̄ ní tə́,
dɔ mbal̄ Hermon gə̄ tə́.
8Ḭ̄ ī-rāā ādə̄ kōō man̄ gə̄ ɓārə̄n̄ pukətu pukətu,
man̄ kógə̄ḿ ɓāŕ man̄ madə̄n.
Ḭ̄ ī-rāā ādə̄ man̄ gə̄ ní reēn̄ dɔḿ tə́ malang,
taān̄ dɔḿ kɔ̄ɔ́.
9Kadaá anī Kɔ́ɔ̄ɓē rāā kem majə seḿ,
ndɔ̄ɔ́ anī m-ə̄nī pā yān ō,
m̄-ndɔ̄ȳ Nə́ɓā ń i nge rāā kadə̄ m̄-ndi kə kumḿ ní ō.
10m̄-ndigə kəda Nə́ɓā ń i mbal̄ yāḿ ní na:
Dɔí ndígə̄naləḿ i tām̄ rí tə́?
I tām̄ rí tə́ á m̄-njə̄rā kə rɔ̄nelēé aĺ ō,
madə̄ ba̰ā̰ḿ rāā kumḿ ndoō tə́ ō ní?
11Ndū ń madə̄ ba̰ā̰ḿ gə̄ tájə̄mə̄n̄ ní tétə̄ kə̄ngāḿ rárák.
Nin̄ ədamə̄n̄ kə dɔ ndɔ̄ gə̄ na
ké Nə́ɓā yāḿ ngaá i rá wa.
12Kə m̄-rāā rɔ̄ḿ ndoō i najə̄ rí tə́?
Kə m̄-nōō rɔ̄ḿ i tām̄ rí tə́?
Kəndā kem dɔ Nə́ɓā tə́,
ba tél ɓōkə́n̄ tɔ̄ȳ gogə́ rang i só tə́.
Ni i nge kajəḿ ō, Nə́ɓā yāḿ ō.
Currently Selected:
PĀ GƏ̄ 42: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.