PĀ GƏ̄ 33
33
Ādə̄ de gə̄ ɓōkə́n̄ Nə́ɓā tɔ̄ȳ
1Sḭḭ̄ de kə́ gōtə́ gə̄ ə́gaī kɔŕ rɔ̄nel̄ dɔ Kɔ́ɔ̄ɓē tə́!
Ɓōkə́n tɔ̄ȳ əhɔ i de kə́ súmūú gə̄.
2Úgiī kənde ī-ɓōkíīneé Kɔ́ɔ̄ɓē tɔ̄ȳ.
Úgiī kənde kə́ kəlān i kutə ādə̄niī!
3Ə̄nīī pā kə́ kijə ādə̄niī.
Loo ń ā ə́gaī kɔŕ rɔ̄nel̄ anī úgiī kənde ādī majə.
4Tām̄ najə̄ yā Kɔ́ɔ̄ɓē i najə̄ kə́ súmūú ō,
kəla rāān malang i kəla kə́ rɔ̄kum ō.
5Ni gḛy i yá̰á̰ kə́ rāā kə́ gōtə́, ō yá̰á̰ kə́ súmūú ō.
Kem majə yā Kɔ́ɔ̄ɓē taā loo dɔ nang tə́ malang.
6Kɔ́ɔ̄ɓē rāā dɔ rā̰ i kə najə̄ kə́ tan tə́ ō,
rāā tə́yō̰ gə̄ malang i kə koō kə́ tan tə́ ō.
7Ni kán̄ man̄ bā bo loo kógə̄ḿ gidə babəra kógə̄ḿ tə́.
Ni kán̄ man̄ bā bo kem kārə̄n tə́.
8Ādə̄ dɔ nang kə taá malang ɓōĺ ndíĺ Kɔ́ɔ̄ɓē.
Ādə̄ de kə́ dɔ nang tə́ gə̄ malang ɓōĺnən̄.
9Ni-ɔr̄ najə̄ anī yá̰á̰ ń ni-əda ní rāā yá̰a̰,
Ni-əda najə̄ anī, yá̰á̰ ń əda najə̄n ní teē ndi.
10Kɔ́ɔ̄ɓē bā ta róbə yá̰á̰ ń nápar de gə̄ sāān̄ rāā ní.
Ni nujə yá̰á̰ ń gír de gə̄ nómə̄n̄ rāā ní.
11Banī yá̰á̰ ń Kɔ́ɔ̄ɓē gír̄ rāā ní a to ngándáńg.
Yá̰á̰ ń ni gír̄ kemən tə́ yā rāā ní a to i kə dɔ ɓāl̄ gə̄, kə dɔ ɓāl̄ gə̄.
12Rɔ̄nel̄ i kə nápar de gə̄ ń Kɔ́ɔ̄ɓē i Nə́ɓā yādə́ ní.
Rɔ̄nel̄ i kə gír de gə̄ ń Kɔ́ɔ̄ɓē gə̄rādə́ kadə̄ nin̄ i yá̰a̰ kəngen gə̄ ní.
13Kɔ́ɔ̄ɓē ndi dɔ rā̰ tə́ dɔɔ́ a̰a̰ń loo,
ni-a̰a̰ de gə̄ malang.
14-15Ni ń əɓā kem de kə́ dɔ nang tə́ gə̄ malang adə̄ to tītə̄ naā ō,
əndā kumən gír yá̰a̰ rāādə́ gə̄ tə́ malang ō ní,
ndi dɔ kōr̄ kāgə̄ yān tə́ əndāń ma̰ȳdə́.
16I kutə ngé rɔ̄ɔ̄ kə́ ngá̰ý gə̄ n a ajə mban̄g ní a?
I tɔ́gə kə́ ngá̰ý n a ajə go̰ rɔ̄ ní a?
17Sə́nda i yá̰á̰ gól̄ rɔ̄ karī, deē a tetəń rɔ̄ɔ̄ alé,
tɔ́gən kə́ ngá̰ý a teē kə deé ta yo tə́ alé.
18Banī Kɔ́ɔ̄ɓē əndā kumən̄ gō ngé gə̄ ń ɓōlə́n̄ ndílən ō,
əndān̄ kemdə́ dɔ kem majə yān tə́ ō ní.
19Adə̄ a ɔr̄də́ kɔ̄ɔ́ ta yo tə́ ō,
a ajədə́ ɓāl̄ ɓō tə́ ō.
20Jḭḭ̄ j-əndāī kemjí i dɔ Kɔ́ɔ̄ɓē tə́,
i ni n i der yājí ō, nge dḭḭ̄jí ō ní.
21Rɔ̄nel̄ kə́ kemjí tə́ ḭḭ i rɔ̄n ni tə́ ō,
jḭḭ̄ j-əndāī kemjí i dɔ rīn kə́ táĺ ngá̰ý tə́ ō.
22Kɔ́ɔ̄ɓē, j-əndā kemjí dɔí tə́ kə ngangá ngá̰ý
ní ī-rāā kem majə sejí!
Currently Selected:
PĀ GƏ̄ 33: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.