PĀ GƏ̄ 27
27
m̄-ndi ɓē Kɔ́ɔ̄ɓēé anī m̄-sōl̄ yá̰a̰ alé
1Pā yā Dabid.
Kɔ́ɔ̄ɓē i loo kə́ unjə̄ kow yāḿ ō i nge kajəḿ ō,
ní m-ā m̄-ɓōĺ i náā?
Kɔ́ɔ̄ɓē i loo ndiḿ kə́ ngan̄g ngá̰ý, ní m-ā m̄-ndebə i ta kum náā tə́?
2Ré ngé ndāńg gə̄ ənīmə̄n̄ rɔ̄ɔ̄ yā rə́yām̄ naā tə́ anī,
i nin̄ kɔ́ gə̄ madə̄ kɔ̄lə̄ḿ gə̄ ō, madə̄ ba̰ā̰ḿ gə̄ ō n njadə́ a tə́gā naā ō,
a téē tə́sōn̄ ō ní.
3Ré ɓūtə̄ ngé rɔ̄ɔ̄ gə̄ reē əhɔn̄ loo kadəḿ tə́
yā kənīm̄ rɔ̄ɔ̄ anī kemḿ gān̄g man̄ alé.
Ká ré rɔ̄ udə naā tə́ pít gə̄gē anī, mā m-ə̄nī kemḿ.
4m̄-dəje Kɔ́ɔ̄ɓē yá̰á̰ kógə̄ḿ ō, m̄-gḛy kənge gáŕ ō.
I kadə̄ m̄-ndi kem kújə yā Kɔ́ɔ̄ɓē tə́ kə dɔ ndɔ̄ gə̄ malang ń
m̄-ndiń kə kumḿ ní,
yā kadə̄ m-á̰a̰ń majə Kɔ́ɔ̄ɓē ō,
m-ə̄ndań kumḿ gíŕ kújə yān tə́ ō.
5Tām̄ ndɔ̄ ń yá̰á̰ kə́ to kum kaȳ aĺ teē dɔḿ tə́ ní, ni ɓɔ̄ɔ̄m̄ looneé.
Ni ɓɔ̄ɔ̄m̄ gə́lé kújə yān tə́ ō,
əndām̄ dɔɔ́ dɔ mbal̄ tə́ ō.
6Ń toō ní dɔḿ un dɔ madə̄ ba̰ā̰ḿ gə̄ ń gīrə̄n̄ gidəḿ ní,
dɔḿ un dɔdə́ malang.
M-ā m̄-tun̄ yá̰a̰ yā kadə̄ Kɔ́ɔ̄ɓē kem kújə yān tə́ kə kɔŕ rɔ̄nelēé ō,
m-ā m-ə̄nī pā yā kɔsəń gɔn Kɔ́ɔ̄ɓē ō.
7Kɔ́ɔ̄ɓē, ōō ɓār̄ yāḿ!
Ɓɔ́, ī-ndigəm̄ tə́!
8Kɔ́ɔ̄ɓē ḭ̄ ə́da na kə jə-tūr̄ kum̄jí kə̄ rɔ̄í tə́!
M-ə̄ndā kemḿ dɔ najə̄ ń noō tə́, adə̄ Kɔ́ɔ̄ɓē, m̄-tūr̄ kumḿ kə̄ rɔ̄í tə́.
9Nə́ɓā kə́ nge kajəḿ, ī-lōō tūr̄ gidií taḿ tə́!
Ī-lōō kɔrə̄m̄ mā nge kəla yāí kə̄ gogə́ kə wōngōó!
ḭ̄ ń ī-dḭḭ̄m̄ ní,
ī-mbātə́m̄ alé, ə́ya̰m̄ kɔ̄ɔ́ alé!
10Bɔbə́ḿ ō kó̰ó̰ḿ ō əya̰mə̄n̄ kɔ̄ɔ́
ba Kɔ́ɔ̄ɓē əhɔm̄ kə̄ rɔ̄n tə́.
11Kɔ́ɔ̄ɓē, ɔ́jəm̄ róbə yāí ō,
ī-ndɔ́rə̄m̄ kə̄ dɔ róbə́ kə́ majə tə́ ō,
najə̄ yā madə̄ ba̰ā̰ḿ gə̄ tə́.
12Ādə̄ m-ə̄sō jīdə́ tə́ alé,
tɔdɔ̄ de kə́ kum tə́ aĺ gə̄ tétə̄n̄ najə̄ dɔḿ tə́ ō,
sāān̄ rāā dɔ́nɔ dɔḿ tə́ ō.
13m̄-ger̄ majə kadə̄ m-ā m-á̰a̰ kem majə yā Kɔ́ɔ̄ɓē
dɔ nang tə́ laā.
14Ī-ngóō ta Kɔ́ɔ̄ɓē.
Ə́hɔ rɔ̄í tɔgə ō, ə́hɔ kemií ngan̄g ō!
Ī-ngóō ta Kɔ́ɔ̄ɓē.
Currently Selected:
PĀ GƏ̄ 27: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.