PĀ GƏ̄ 22
22
Nə́ɓā yāḿ, Nə́ɓā yāḿ, ə́ya̰m̄ kɔ̄ɔ́ i tām̄ rí tə́?
1Pā kə́ kem makətūbə̄ yā ngār yā gōsə̄ pā gə̄ tə́. A ənīn̄ i tītə̄ loo kənī pā: Wāl̄ kə́ ta gír loo tə́ beē. I pā yā Dabid.
2Nə́ɓā yāḿ, Nə́ɓā yāḿ, ə́ya̰m̄ kɔ̄ɔ́ i tām̄ rí tə́?
Ī-ra dan sa̰y kanjə̄ dḭḭ̄m̄ ō, kanjə̄ koō nōō yāḿ ō i tām̄ rí tə́?
3Nə́ɓā yāḿ, kadaá m̄-ɓāríī kadə̄ ī-dḭḭ̄m̄ ba ī-ndigəm̄ alé.
Ndɔ̄ɔ́ anī m̄-ɓāríī ɓáý, ba m-ə́nge kem sɔl̄ alé.
4Banī ḭ̄ i Nge kə́ Táĺ, ī-ndi dɔ kōr̄ kāgə̄ mbang yāí tə́,
adə̄ Israel gə̄ a ɓōkə́nī tɔ̄ȳ.
5Kété kaají gə̄ əndān̄ kemdə́ dɔí tə́,
Nin̄ əndān̄ kemdə́ dɔí tə́, anī ɔ̄r̄də́ kɔ̄ɔ́ kum yá̰á̰ kə́ tōr̄ tə́.
6Nin̄ nōōn̄ kə̄ dɔí tə́ kadə̄ ī-rāā sedə́, anī ī-gān̄g dɔdə́.
Əndān̄ kemdə́ dɔí tə́, anī rɔ̄də́ sɔl̄də́ alé.
7Ba mā tā a rāāmə̄n̄ i ngōn̄ kur̄ tə́ ba i deē tə́ to̰ alé.
De gə̄ tájə̄mə̄n̄ ō, gír deē yāḿ gə̄ mbātə́mə̄n̄ kɔ̄ɔ́ ō.
8De gə̄ malang ń a̰a̰mə̄n̄ ní mbóon̄ seḿ.
Əgōmə̄n̄ ō tə́gān̄ dɔdə́ nek nek ō.
9Nin̄ ədan̄ najə̄ dɔḿ tə́, ədan̄ na:
Ni əya̰ rɔ̄n kem jī Kɔ́ɔ̄ɓē tə́ ní,
ādə̄ Kɔ́ɔ̄ɓē ɔrə̄n kɔ̄ɔ́ kum yá̰á̰ kə́ ngan̄g tə́ tā!
Kɔ́ɔ̄ɓē tárən ní ādə̄ ajən tā!
10Kɔ́ɔ̄ɓē, i ḭ̄ n ī-teē seḿ kem kó̰ó̰ḿ tə́ ba ə̄nīm̄ kadən tə́,
loo kə́ yá̰a̰ a rāām̄ tū tə́ aĺ tə́ ní.
11Dan ń m̄-teē kem kó̰ó̰ḿ tə́ hap ní adə̄mə̄n̄ seí.
Mā i kem kó̰ó̰ḿ tə́ ɓáý n ḭ̄ i Nə́ɓā yāḿ ní!
12Ní ī-lōō kadə̄ danií i sa̰y rɔ̄ḿ tə́,
tɔdɔ̄ yá̰á̰ kə́ ngan̄g dɔ i ngɔr ō,
de kə́ yā rāā seḿ gətóo ō.
13Ngé rɔ̄ɔ̄ḿ gə̄ ḭḭn̄ seḿ tītə̄ man̄g kə́ bəra gə̄ ō,
gīrə̄n̄ gidəḿ əlan̄ ta naā tə́
tītə̄ dā̰ kə́ ngan̄g ngá̰ý gə̄ kə́ dɔ nang kə́ Basan tə́ ō.
14Ton̄ tītə̄ ɓɔl kɔ̄r̄ gə̄ kə́ a nōōn̄ ō, teēn̄ nga ngá̰də́ taḿ tə́ ō.
15Tɔ́gə́ḿ teē rɔ̄ḿ tə́ tītə̄ man̄ kə́ a də̄yā̰ beé.
Kə̄ngāḿ gə̄ ḭḭn̄ ta naā tə́ malang.
Wurəḿ yḛḛ̄ kə̄ kemḿ tə́ tītə̄ tībə̄ tejə bəya̰ beé.
16Kem kɔ́ɔ́ḿ tutə ká kákə́rá ō,
Ndo̰ḿ tə́ya̰ kem nga̰ā̰ḿ tə́ ō.
Ḭ̄ ə̄nīm̄ ta bāá yo tə́.
17Bísə gə̄ ḭḭn̄ seḿ, ɓūtə̄ ngé rāā majaĺ gə̄ gīrə̄n̄ gidəḿ.
Nin̄ mbútə̄n̄ jīḿ gē njaḿ gē.
18Deē asə tə́da kə̄ngāḿ gə̄ malang.
De gə̄ a̰a̰mə̄n̄, nin̄ əndān̄ kumdə́ dɔḿ tə́.
19Nin̄ nə̄ɓōn̄ naā kūbə̄ rɔ̄ḿ gə̄ ō,
túgə̄n̄ wə̄lā dɔ kūbə̄ kə́ bo yāḿ tə́ ō.
20Banī Kɔ́ɔ̄ɓē, ī-lōō kadə̄ danií i sa̰y rɔ̄ḿ tə́ beē.
Ḭ̄ ń i tɔ́gə́ḿ ní ī-reē láẃ ī-dḭḭ̄m̄!
21Ɔ̄rə̄m̄ ta yo kaskar tə́ kɔ̄ɔ́.
Ī-taām̄ ta ngān̄g bísə gə̄ ń noō tə́.
22Ī-taām̄ ta ngān̄g ɓɔl tə́ ō,
ī-taām̄ ta gajə dɔgə tə́ ō.
ḭ̄ ōō ndūḿ adə̄ ī-dḭḭ̄m̄.
23M-ā m̄-tél yā ɓāŕ rīí dan ngákó̰ó̰ḿ gə̄ tə́ ō,
m-ā m̄-tɔ̄yī dan ngé kán̄ naā gə̄ tə́ ō.
24Sḭḭ̄ ngé ɓōĺ ndíĺ Kɔ́ɔ̄ɓē gə̄, ī-ɓōkə́niī tɔ̄ȳ!
Sḭḭ̄ gír kaa yā Jakob gə̄ malang, ɔ́siī gɔn Kɔ́ɔ̄ɓē!
Sḭḭ̄ gír kaa yā Israel gə̄ malang, ī-ɓōlíī gidə Kɔ́ɔ̄ɓē.
25Ni kídə̄ deē ń ndoō rāān aĺ naā ní aĺ ō, mbātə́n aĺ ō.
Ni tūr̄ gidən tan tə́ alé.
Dan ń nōō kə̄ dɔn tə́ ní oō nōō yān.
26Kɔ́ɔ̄ɓē, i ḭ̄ n ī-rāā adə̄ m̄-ɓókíī tɔ̄ȳ
dan kósə́ ngé kán̄ naā kə́ ngá̰ý gə̄ tə́ ní.
M-ā m̄-ra dɔ ndūḿ ń m-ə̄nī m-ādī tə́ ní ta kum ngé ɓōĺ ndílí gə̄ tə́.
27m̄-ɓāŕ ngé ndoō gə̄ adə̄ əsan̄ yá̰a̰ ndānə̄n̄.
Adə̄ ngé sāā Kɔ́ɔ̄ɓē gə̄ ɔsən̄ gɔn Kɔ́ɔ̄ɓē ō,
ndin̄ majə ta kaw̄ jóo ō!
28A əga kem de kə́ dɔ nang tə́ gə̄ malang dɔ Kɔ́ɔ̄ɓē tə́ ō,
a télən̄ kə̄ rɔ̄n tə́ ō.
Gír kojə gə̄ yā nápar de gə̄ a ɔsən̄ nodə́ nang tə́ non tə́!
29Kɔ́ɔ̄ɓē i mban̄g,
ni-o̰o̰ ɓē dɔ nápar de gə̄ tə́.
30De gə̄ malang ń ndin̄ dɔ nang tə́ kə rɔ̄nelēé
ní n ɔsən̄ nodə́ nang tə́ toō.
De gə̄ malang ń njadə́ i kə̄ ta bāá yo tə́ á
əlan̄ dɔdə́ nang tə́ ta kumən tə́ ní,
ni əya̰də́ adə̄ ndin̄ kə kumdə́ alé#22.30 K. 30: Kum najə̄ ń toō ń ndangən̄ kété kə ta Hebəro ní unjə̄ ngá̰ý alé..
31Ngán kaadə́ gə̄ a rāān̄ kəla yā Kɔ́ɔ̄ɓē,
a ənīn̄də́ gotə najə̄ yān.
32Nin̄ a reēn̄ yā kənī mbēr̄ dɔ yá̰a̰ rāān kə́ gōtə́ gə̄ tə́ kə ndū boó ō,
a ədan̄ gír de gə̄ ń a ojən̄də́ ɓáý ní yá̰á̰ ń Nə́ɓā rāā ní ō.
Currently Selected:
PĀ GƏ̄ 22: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.