MATIYE 14
14
Ja̰a̰ Batistə oy
(Á̰a̰ī Mark 6.14-29; Luk 9.7-9)
1Dan ngeé ń noō tə́ ní, rī Jeju ɓāŕ ngá̰ý, adə̄ əsō mbī Herod nge ko̰o̰ ɓē tə́. 2Anī Herod əda ngé kəla yān gə̄ na:
Deē ń noō i Ja̰a̰ Batistə ń oy ní n ndól̄ á ənge tɔ́gə rāā yá̰á̰ kə́ yáā gə̄ noó.
3Tɔdɔ̄ kété ní Herod adə̄ əhɔn̄ Ja̰a̰ ənīn̄ súĺ njan tə́, ba ənīnən̄ dəngáyá najə̄ yā Herodiad nə̄yá̰ ngōkó̰o̰n Pilipə tə́. 4Tɔdɔ̄ Ja̰a̰ ədan na:
Taā Herodiad nə̄yá̰ ngōkó̰ó̰í ní i yá̰á̰ kə́ ndū najə̄ yā Nə́ɓā ɔgə̄ kɔ̄ɔ́. 5Adə̄ Herod gḛy tɔ̄l̄ Ja̰a̰ gə̄gē, banī ɓōĺ i kósə de gə̄, tɔdɔ̄ nin̄-rāān̄ Ja̰a̰ i nge koō ta tə́.
6Banī ndɔ̄ ń Herod a rāań nāā kojən tə́ ní anī, ngōn̄ Herodiad kə́ dəyá̰ ndām̄ no ngé reē rāā nāā gə̄ tə́ malang. Ndām̄ yān ní nel̄ Herod ngá̰ý, 7adə̄ Herod ənī míndən adə̄n ədan na, ká i yá̰a̰ rí gə̄gē n dəjen anī, n-a n-adə̄n. 8Loo ń noō tə́ Herodiad sə̄lā ngōnən adə̄ əda Herod na kə adə̄n dɔ Ja̰a̰ Batistə kem səmbēé loo nəkɔ́ ń toō tə́.
9Najə̄ ní nel̄ mban̄g aĺ tā, ba dan ń ni-ənī míndən ta kum ngé rāā nāā gə̄ tə́ kɔ̄ɔ́ ɓá ní loo n kə́ rang gətóo. Adə̄ ni-əda kadə̄ āw̄ reēn̄ kə dɔ Ja̰a̰ ní kə adə̄nən̄. 10Ni-əla deē kógə̄ḿ gān̄g dɔ Ja̰a̰ tə́ kújə dəngáyá. 11Reēn̄ kə dɔ Ja̰a̰ ní kem səmbēé, adə̄n ngōn̄ kə dəyá̰ ní, ba ni-téləń adə̄ kó̰o̰n. 12Ngé ndóō yá̰a̰ yā Ja̰a̰ gə̄ reē unən̄ nīnə́n aw̄ dubə̄n, ba aw̄ ɔjən̄ Jeju gotə yá̰á̰ ń rāā yá̰á̰ ní.
Jeju adə̄ de kə́ dūbú mí gə̄ yá̰a̰ kəsa
(Á̰a̰ī Mark 6.30-44; Luk 9.10-17; Ja̰a̰ 6.1-14)
13Dan ń Jeju oō najə̄ ní anī, ɔtə al̄ kem toó yā kaw̄ loo kə́ ɓē gətóo tū tə́ tə́. Banī kósə de gə̄ oōn̄, adə̄ teēn̄ ɓē yādə́ gə̄ tə́ ba aw̄n̄ gōn tə́ kə njadə́. Nin̄-njə̄rān̄ i kə gō kadə bāá. 14Dan ń Jeju teē kem toó kə̄ ndágá anī, a̰a̰ kósə de kə́ ngá̰ý gə̄ ran̄. Kumən o̰o̰n sedə́ adə̄ ni-rāā adə̄ rɔ̄ ngé mo̰y yādə́ gə̄ ngáā. 15Loo tíbí anī, ngé ndóō yá̰a̰ yā Jeju gə̄ reēn̄ rɔ̄n tə́ ba ədanən̄ na:
Loo ní i loo kə́ ɓē gətóo tū tə́ ō, mbang a udə i mbée ō ní, ə́yá̰ kósə de gə̄ ādə̄ aw̄n̄ kə̄ ngán ɓē gə̄ tə́ mangən̄ yá̰a̰ əsan̄.
16Jeju ədadə́:
Kum kəya̰də́ kadə̄ aw̄n̄ kə̄ kem ngán ɓē gə̄ tə́ na i rí? Sḭḭ̄ kɔ́ gə̄ ādīdə́ yá̰a̰ kəsa.
17Nin̄-tél ədanən̄ na i mápá mí ō kānjə̄ jōó ō ngóy na to jīdə́ tə́ laā ní. 18Jeju ədadə́ na:
Ī-reēīneé ādə̄mī.
19Ni-əda kadə̄ kósə de gə̄ ndin̄ nang tə́ dɔ mu kə́ mbōl̄ tə́, ba taā mápá kə́ mí gə̄ ní ō, kānjə̄ kə́ jōó gə̄ ní ō. Gō tə́ anī ənī kumən kə̄ dɔɔ́ dɔ rā̰ tə́, ndadə̄ Nə́ɓā dɔ tə́ pá tá tétə̄ mápa ní naā tə́ adə̄ ngé ndóō yá̰a̰ yān gə̄ adə̄ taā nə̄ɓōn̄ kósə de gə̄ ɓáý. 20Nin̄-malang əsa ndānə̄n̄. Tá gotə mápá ń na̰y ní, ngé ndóō yá̰a̰ gə̄ ɔyn̄ rosə dōbə̄ kutə gidə i jōó aw̄n̄neé. 21De gə̄ ń əsan̄ yá̰á̰ ní, de kə́ dəngam gə̄ asən̄ deē dūbú mí ń noō, kanjə̄ tə́da kutə dəyá̰ gə̄ ō ngán gə̄ ō.
Jeju njə̄rā dɔ bā bo tə́
(Á̰a̰ī Mark 6.45-52; Ja̰a̰ 6.15-21)
22Kə̄ ta jī tə́ noō Jeju əda ngé ndóō yá̰a̰ yān gə̄ kadə̄ alə̄n̄ kem toó kə aw̄n̄ gidə kə́rēý tə́ kété non tə́, na nəkɔ́ n-a n-əda kósə de gə̄ kadə̄ tḭ̄ḭ̄n̄ naā kə̄ ɓē gə̄ tə́. 23Ba dan ń ni-əda de gə̄ adə̄ aw̄n̄ kɔ̄ɔ́ oy anī, ɔr̄ rɔ̄n aw̄ dɔ mbalá yā ndɔ̄ȳ. Loo tíbə dɔn tə́ loo ń noō tə́ kə kérneé. 24To ń ngé ndóō yá̰a̰ yān gə̄ i kemeé ní ugə̄ sa̰y dan ɓūlūú kɔ̄ɔ́ ō, bəngál man̄ rāā to ní majaĺ ō, tɔdɔ̄ nél əla i kə̄ gō gūsə̄rūú. 25Dan ń loo a rāā yā tīī anī Jeju njə̄rā dɔ bā bo tə́ a aw̄ kum kə̄ rɔ̄də́ tə́. 26Dan ń ngé ndóō yá̰a̰ yān gə̄ a̰a̰nən̄ a njə̄rā dɔ bā bo tə́ anī ɓōĺ rāādə́, adə̄ ədan̄ na i ndíl de kə́ koy.
Loo ń noō tə́ nin̄-əgan̄ kɔŕ kə ɓōló. 27Banī Jeju ɔr̄ najə̄ sedə́ kə̄ ta jī tə́ beē, ədadə́ na kə əhɔn̄ kemdə́ ngan̄g na i ni ba kə lōōn̄ ɓōĺ.
28Anī Piyer ədan na:
Kɔ́ɔ̄ɓē, ré i ḭ̄ anī, ə́da adə̄ m̄-njə̄rā dɔ man̄ tə́ m-āw̄ kum kə̄ rɔ̄í tə́.
29Anī Jeju tél ədan na kə reē.
Loo ń noō tə́ Piyer risə kem toó ba njə̄rā dɔ man̄ tə́ ta kaw̄ kə̄ rɔ̄ Jeju tə́. 30Ba dan ń ni-a̰ā̰ kadə̄ nél əla i kə ngangāá ngá̰ý anī, ɓōĺ rāān. Ni-əla gír nduȳ ta kaw̄ gír maná, anī əga kɔŕ əda na:
Kɔ́ɔ̄ɓē, ájəm̄!
31Jeju əla jīn əhɔnneé kə̄ ta jī tə́ beé, ba ədan na ni na i nge taā kem kə́ mámák alé, ké kemən tɔ́sə̄n i tām̄ rí tə́ wa.
32Dan ń alə̄n̄ kem toó anī, nél əla to̰ alé. 33De gə̄ ń ndin̄ kem toó ní ɔsən̄ nodə́ nang tə́ no Jeju tə́, ba ədanən̄ na:
Ḭ̄ i Ngōn̄ Nə́ɓā rɔ̄kum!
Jeju rāā adə̄ rɔ̄ ngé mo̰y gə̄ kə́ gō nang kə́ Jenejaret tə́ gə̄ ngáā
(Á̰a̰ī Mark 6.53-56)
34Dan ń gāngə̄n̄ bā bo oy anī, ugə̄n̄ nang kə́ Jenejaret tə́. 35De kə́ loo ngeé n noō tə́ gə̄ a̰a̰n̄ Jeju ger̄nən̄. Adə̄ nin̄-ədan̄ de kə́ kem ɓē kə́ ngɔr gə̄ tə́ kōō kugə̄n, anī de gə̄ reēn̄ kə ngé mo̰y gə̄ malang rɔ̄n tə́. 36De gə̄ rāānən̄ ɓɔ́ kadə̄ kə əya̰də́ kadə̄ n-ɔdən̄ ta kūbə̄ yān ngóy. De gə̄ malang ń ɔdən̄ ní əngen̄ rɔ̄ ngáā.
Currently Selected:
MATIYE 14: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.