MATIYE 13
13
Kūjə́ najə̄ yā nge kənda kōō
(Á̰a̰ī Mark 4.1-9; Luk 8.4-8)
1Ndɔ̄ kógə̄ḿ tə́ Jeju teē kújú kɔ̄ɔ́ ba aw̄ ndi kadə bā bo tə́. 2Anī kósə de kə́ ngá̰ý gə̄ kánə̄n̄ naā rɔ̄n tə́. Ni al̄ ndi kem to kógə̄ḿ tə́, ba de gə̄ malang ran̄ ta gógə́ tə́ ndágá. 3Ni un gidə najə̄ kə̄ gogə́ ɔrə̄ń najə̄ sedə́ dɔ yá̰a̰ gə̄ tə́ gír i ngá̰ý, ədadə́ na:
Deē kógə̄ḿ teē, aw̄ kənda kōó. 4Dan ń a ənda kōō ní a, kum kōō kə́rēý gə̄ tə́sōn̄ bɔ̄gə̄ róbə́ tə́, adə̄ yel̄ gə̄ reē əsan̄ kɔ̄kə́. 5Ngé kə́rēý gə̄ tə́sōn̄ i dɔ ngonjə̄ tə́, loo kə́ nang i ngá̰ý aĺ tū tə́ tə́. Adə̄ əɓan̄ láẃ, tām̄ nang kə́ sɔl̄ kə́ tū tə́ to i kə̄ dɔɔ́ laā ngóy. 6Banī dan ń mbang ḭḭ kə̄ dɔɔ́ anī, ndəlēn̄ ō, tutən̄ kɔ̄ɔ́ ō, tɔdɔ̄ ngəradə́ aw̄ nang tə́ ngá̰ý alé. 7Ngé kə́rēý gə̄ tə́sōn̄ i dan kōn̄ gə̄ tə́, adə̄ kōn̄ gə̄ ní tɔgə taān̄ dɔdə́ kɔ̄ɔ́. 8Kumən kə́rēý gə̄ tə́sōn̄ i nang kə́ majə tə́, adə̄ ɔrə̄n̄ dɔdə́ ō, edə̄n̄ kum ngá̰ý ō. Dɔn kə́rēý gə̄ edən̄ kum ɓú kógə̄ḿ ō, ngé kə́rēý gə̄ kutə mehḛ́ ō, kə́rēý gə̄ kutə mətá ō. Gō tə́ anī Jeju əda na:
9Náā nəkɔ́ ń i kə mbīneé yā koōń loo anī, ādə̄ oō.
Jeju ɔr̄ najə̄ kə kūjə́ najá i tām̄ rí tə́
(Á̰a̰ī Mark 4.10-12; Luk 8.9-10)
10Ngé ndóō yá̰a̰ yā Jeju gə̄ reēn̄ rɔ̄n tə́, ba dəjenən̄ na ké ɔr̄ najə̄ kə kósə de gēé kə kūjə́ najá i tām̄ rí tə́ wa. 11Ni-tél ədadə́ na:
I tām̄ rāā kə́ Nə́ɓā rāā adə̄ sḭḭ̄ ī-gerī yá̰á̰ kə́ loo mundə̄ tə́ gə̄ kə́ dɔ Ɓē ko̰o̰ kə́ dɔ rā̰ tə́ ba ɔgə̄ ngé gə̄ ń noō ger̄. 12Tɔdɔ̄ deē ń ənge yá̰á̰ ní, Nə́ɓā a adə̄n dɔ tə́ kadə̄ yá̰a̰ kənge yān i ngá̰ý, banī deē ń ənge yá̰a̰ aĺ ní kə́ jīn tə́ gə̄gē Nə́ɓā a taā kɔ̄ɔ́. 13I tām̄ najə̄ ń noō tə́ n m-ún gidə najə̄ kə̄ gogə́ tá m-ɔ̄r̄ sedə́ ní. I najə̄ ka̰a̰ kə́ nin̄-a̰a̰n̄ loo, ba a̰a̰n̄ yá̰a̰ aĺ tə́ ō, koō kə́ nin̄-oōn̄ loo, ba oōn̄ kōō yá̰a̰ aĺ tə́ ō, gerə̄n̄ kum yá̰a̰ aĺ tə́ ō. 14Adə̄ najə̄ kə́ ta Nə́ɓā tə́ ń Ijai oō á əda ní reē udə gírí tām̄ yādə́ tə́, ni-əda na:
Ā ōōī najə̄ ba ā ī-gerī kum aĺ ō,
ā á̰a̰ī loo ba ā á̰a̰ī yá̰a̰ aĺ ō.
15Tɔdɔ̄ gír de gə̄ ń toō kemdə́ magə́rā kɔ̄ɔ́,
mbīdə́ əja oō loo to̰ alé.
Nin̄ kɔ́ gə̄ utə̄n̄ kumdə́ kɔ̄ɔ́
na sōgə́ kumdə́ a̰a̰ loo ō,
tá utə̄n̄ mbīdə́ kɔ̄ɔ́
na sōgə́ mbīdə́ oō loo ō,
yā kadə̄ ger̄nəń kum najə̄ kógə̄ḿ aĺ ō.
Na sōgə́ nin̄-tūrə̄n̄ háĺdə́ anī,
m̄-rāā adə̄ rɔ̄də́ ngáā.
16Ba sḭḭ̄ i kə rɔ̄nelēé tɔdɔ̄ kumsí a̰a̰ loo ō, mbīsí oō loo ō. 17Ādə̄ m-ə́dásí najə̄ kə́ bo ngá̰ý, ngé koō ta gə̄ ngá̰ý ō, de kə́ súmūú gə̄ ngá̰ý ō, ndə̄ngān̄ ka̰a̰ yá̰á̰ ń á̰a̰ī toó ba a̰a̰n̄ aĺ ō, ndə̄ngān̄ koō yá̰á̰ ń ōōī toó ba oōn̄ aĺ ō.
Jeju ɔjə kum kūjə́ najə̄ yā nge kənda kōō ní
(Á̰a̰ī Mark 4.13-30; Luk 8.11-15)
18Ní, kum kūjə́ najə̄ yā nge kəndā kōō ní n toó: 19Ngé gə̄ ń oōn̄ najə̄ kə́ dɔ Ɓē ko̰o̰ tə́ ba gerə̄n̄ kum aĺ ní, nin̄-ton̄ i tītə̄ bɔ̄gə̄ róbə́ ń kōō tə́sō tū tə́ ní. Ndíĺ kə́ nge ngól̄ loo gə̄ reē nār̄ yá̰á̰ ń dubə̄n̄ kemdə́ tə́ ní kɔ̄ɔ́. 20Ngé kə́rēý gə̄ ton̄ i tītə̄ loo kə́ dɔ ngonjə̄ tə́ ń kōō tə́sō dɔ tə́ ní. Nin̄-oōn̄ najə̄ kə́ dɔ Ɓē ko̰o̰ tə́ anī ndigən̄ kə̄ ta jī tə́ beē kə rɔ̄nelēé ngá̰ý, 21ba əya̰n̄ najə̄ ní adə̄ əla ngəran kemdə́ tə́ alé. Ndigən̄ najə̄ ní ndin̄neé kum i ngá̰ý alé. Loo ń wur kɔl əsō dɔdə́ tə́, aláa rāān̄də́ ndoō tə́ tām̄ yā najə̄ tə́ anī, nin̄-lōn̄ gír taā kem najə̄ ní tə́ kɔ̄ɔ́. 22Kōō ń tə́sō dan kōn̄ gə̄ tə́ ní, i ngé gə̄ ń oōn̄ najə̄ ba gír̄ gə̄ kə́ dɔ nang tə́ ō, ɓō yá̰a̰ kənge ō, taān̄ dɔ najə̄ ní kɔ̄ɔ́ adə̄ teē yá̰a̰ alé ní. 23Ngé gə̄ ń tə́sōn̄ dɔ nang kə́ majə tə́ ní i ngé gə̄ ń oōn̄ najə̄, ba gerə̄n̄ kum, adə̄ kumdə́ to ní. Kum kə́rēý gə̄ i ɓú ō, kə́rēý gə̄ i kutə mehḛ́ ō, kə́rēý gə̄ i kutə mətá ō.
Kūjə́ najə̄ yā bar̄
24Jeju un kūjə́ najə̄ kə́ rang ɔrə̄ń najə̄ sedə́ ədadə́ na:
Ɓē ko̰o̰ kə́ dɔ rā̰ tə́ to i tītə̄ deē kógə̄ḿ kə́ dubə̄ kum kōō kə́ majə kem ndɔr̄ yān tə́. 25Ba dan ń de gə̄ a ɓīīn̄ anī, madə̄ ba̰ā̰n reē ənda kum bar̄ kemeé ba aw̄. 26Dan ń kōō əɓa á tɔgə ba ɔr̄ dɔn anī, a̰a̰n̄ bar̄ danaá. 27Ngáń ngé kɔsə gə̄ reēn̄ rɔ̄ kɔ́ɔ̄ ndɔr̄ ní tə́ ba dəjenən̄ na ké yá̰á̰ ń dubə̄ kem ndɔr̄ yān tə́ ní na i kōō kə́ majə ō, ba ké bar̄ gə̄ ḭḭn̄ i rá áké teēn̄ danaá wa. 28Ni-tél ədadə́ na i madə̄ ba̰ā̰n kógə̄ḿ n na rāā yá̰á̰ ń noō ní. Loo ń noō tə́ ngáń ngé kɔsə gə̄ ədanən̄ na ké gḛy kadə̄ n-aw̄ kə n-ró̰ȳn̄ bar̄ gə̄ ní kɔ̄ɔ́ wa. 29Anī ni-ədadə́ na n-ɔdə alé, tām̄ ré na ró̰ȳn̄ bar̄ gə̄ anī, na a ró̰ȳn̄də́ naā tə́ kə kōō gēé. 30Ní, kə əya̰n̄də́ kadə̄ tɔgən̄ naā tə́ mbak, ré na i ndɔ̄ kəja kōō tə́ pá tá. Ndɔ̄ n noō tə́ tā anī n-a n-əda ngé kəja kōō gə̄ kadə̄ tə́gān̄ bar̄ gə̄ kété, kə tṵ́ṵ̄n̄ yā róōdə́ horó, ba kōō gə̄ tá kə ɓōkə́n̄də́ kem mō̰ȳ yān tə́.
Kūjə́ najə̄ yā kum mutardə
(Á̰a̰ī Mark 4.30-32; Luk 13.18-19)
31Jeju ɔjədə́ kūjə́ najə̄ kə́ rang, ədadə́ na:
Ɓē ko̰o̰ kə́ dɔ rā̰ tə́ to i tītə̄ kum mutardə#13.31 Mutardə: A rāān̄ kum mutardə ní yá̰a̰ kum tá̰á̰ tə́ ō, a rāān dáwá tə́ ō. kə́ deē un dubə̄ kem ndɔr̄ yān tə́ beē. 32Kum mutardə ní kídə̄ ngá̰ý tɔȳ kum kōō gə̄ malang, ba dan ń əɓa á tɔgə ní a, bo tɔȳ gotə tá̰á̰ kə́ rang gə̄. Ni-tél kāgə̄, adə̄ yel̄ kə́ dɔɔ́ gə̄ reē rāān̄ ɓēdə́ ta jīn gə̄ tə́.
Kūjə́ najə̄ yā kaa mápa
(Á̰a̰ī Luk 13.20-21)
33Ni ɔjədə́ kūjə́ najə̄ kə́ rang ɓáý to̰, ədadə́ na:
Ɓē ko̰o̰ kə́ dɔ rā̰ tə́ to i tītə̄ kaa mápa kə́ dəyá̰ un ló̰yń ndujə̄ mápá kə́ mbɔ̄jə́ kem səmbē bo mətá, adə̄ ndujə̄ mápá kə́ sḛ́ý beē tə́ aĺ ń toō ḭḭ malang.
Loo ndóō ń Jeju a ndóō de gə̄ yá̰a̰ kə kūjə́ najá ní
(Á̰a̰ī Mark 4.33-34)
34Jeju ɔjə kósə de gə̄ yá̰a̰ gə̄ ń toō malang i kə kūjə́ najə̄ gēé. Ni ədadə́ yá̰á̰ kógə̄ḿ kanjə̄ kadə̄ i kə kūjə́ najá alé. 35Ni-rāā yá̰a̰ tītə̄ ń noō i yā kadə̄ najə̄ n nge koō ta əda ní reē udəń gírí, əda na:
M-ā m̄-tḛḛ̄ taḿ yā kɔrə̄ń najə̄ sedə́ i kə̄ kūjə́ najá.
Yá̰a̰ gə̄ ń ɓɔ̄ɔ̄n̄ dɔ kɔ̄ɔ́ ta kəla gír kəndā dɔ rā̰ ō dɔ nang ō tə́ ní,
m-ā m-ə̄nā mbēr̄ dɔ tə́.
Jeju ɔjə kum kūjə́ najə̄ yā bar̄ ní
36Jeju əya̰ kósə de gə̄, ba aw̄ kújú anī ngé ndóō yá̰a̰ yān gə̄ udən̄ gōn tə́, ba dəjenən̄ na kə ɔjədə́ kum kūjə́ najə̄ yā bar̄ kə́ əɓa kem ndɔrɔ́ ní kadə̄ n-oōn̄. 37Ni-tél ədadə́ na:
Deē n dubə̄ kum kōō kə́ majə ní, i Ngōn̄ Deē. 38Ndɔr̄ ní i de kə́ dɔ nang tə́ gə̄ malang. Kum kōō kə́ majə ní i de kə́ kem Ɓē ko̰o̰ tə́ gə̄. Bar̄ ní, i de gə̄ yā ndíĺ kə́ nge ngól̄ loo gə̄. 39Madə̄ ba̰ā̰ kə́ nge dubə̄ kum bar̄ ní, i diabəl. Ndɔ̄ kəja kōō, i ta ngóy ndɔ̄ gə̄. Ba ngé kəja kōō gə̄, i de kə́ dɔ rā̰ tə́ gə̄. 40Adə̄ tītə̄ loo sa̰ā̰ bar̄ yā róō horoó ní, yá̰á̰ ń a rāā yá̰a̰ ta ngóy ndɔ̄ gə̄ tə́ ní, a to i tītə̄ n noō ō. 41Ngōn̄ Deē a əla deē yān kə́ dɔ rā̰ tə́ gə̄ kadə̄ a ɔrə̄n̄ yá̰a̰ malang ń a rāā de gə̄ adə̄ a tə́sōn̄ kum majaĺ tə́ ní ō, a ɔrə̄n̄ ngé rāā majaĺ gə̄ kɔ̄ɔ́ kem Ɓē ko̰o̰ yān tə́ ō, yā 42ɓōkə́də́ kum hor kə́ bo ngá̰ý tə́. Loo ń noō tə́ nin̄ a nōōn̄ ō, a máyā̰n̄ ngān̄gdə́ ō. 43Ba de kə́ súmūú gə̄ a ndə́lēn̄ pir pir tītə̄ mbang beé kem Ɓē ko̰o̰ yā Bɔbə̄də́ tə́. Náā nəkɔ́ ń aw̄ kə mbīn yā koōń loo ní, ādə̄ kɔ́ɔ̄ oō.
Kūjə́ najə̄ yā yá̰á̰ kə́ gātə̄n i ngá̰ý
44 Ɓē ko̰o̰ kə́ dɔ rā̰ tə́ to i tītə̄ yá̰a̰ kənge kə́ gātə̄n i ngá̰ý kə́ ɓɔ̄ɔ̄ kem ndɔrɔ́ beē. Deē ń teē dɔ tə́ ní un ɓɔ̄ɔ̄ kə̄ kété. Rɔ̄n nelə̄n ngá̰ý adə̄ aw̄ igə yá̰a̰ yān malang ba reē mang ndɔr̄ ní.
Kūjə́ najə̄ yā məde kɔ̄l̄
45 Ɓē ko̰o̰ kə́ dɔ rā̰ tə́ i tītə̄ nge gātə̄ kógə̄ḿ kə́ a sāā məde kə́ majə ngá̰ý gə̄. 46Dan ń ənge kógə̄ḿ kə́ gātə̄n i ngá̰ý anī, aw̄ igə yá̰a̰ yān gə̄ malang mangəń məde ní.
Kūjə́ najə̄ yā réng bə̄rā
47 Ɓē ko̰o̰ kə́ dɔ rā̰ tə́ to i tītə̄ réng bə̄rā ń ngé ndo̰ kānjə̄ gə̄ ənīn̄ kum bā bo tə́ əhɔn̄neé gír kānjə̄ gə̄ malang kə́ kum man̄ tə́ ní beē. 48Dan ń kānjə̄ rosə kem réńg ní anī, ngé ndo̰ gə̄ ndɔ́r̄ aw̄n̄neé ta gógə́ tə́. Nin̄-ndin̄ nang tə́ ba gə̄rān̄ kə́ majə gə̄ kə̄ kem súmūú ō, tə́nīn̄ ngé kə́ majaĺ gə̄ kɔ̄kə́ ō. 49A to i tītə̄ ń noō ta ngóy ndɔ̄ gə̄ tə́ ō. De kə́ dɔ rā̰ tə́ gə̄ a reēn̄ yā kɔr̄ de kə́ majaĺ gə̄ kɔ̄ɔ́ dan de kə́ majə gə̄ tə́, 50yā tə́nīdə́ kum hor kə́ bo ngá̰ý tə́. Nin̄ a nōōn̄ ō, a máyā̰n̄ ngān̄gdə́ ō loo ngeé ń noō tə́.
Yá̰a̰ kənge kə́ kijə gə̄ ō, kə́ jóo gə̄ ō
51Jeju dəjedə́ na ké gerə̄n̄ kum najə̄ gə̄ ń noō malang wa. Anī nin̄-tél ədanən̄ na n-gerə̄n̄ kum.
52Loo ń noō tə́ Jeju ədadə́ na:
I beé ní, náā nəkɔ́ ń i nge ndóō de gə̄ ndū najə̄ tá tél nge ndóō yá̰á̰ kə́ dɔ Ɓē ko̰o̰ kə́ dɔ rā̰ tə́ ní, ni i tītə̄ kɔ́ɔ̄ kújə́ kə́ a ɔr̄ yá̰á̰ kə́ kijə gə̄gē, kə́ jóo gə̄gē, dan yá̰a̰ kənge yān kə́ gātə̄n i ngá̰ý tə́ beē.
De kə́ Najaret gə̄ taān̄ kem Jeju alé
(Á̰a̰ī Mark 6.1-6; Luk 4.16-30)
53Dan ń Jeju ɔr najə̄ kə kūjə́ najá oy anī, ni-ɔtə loo ń noō tə́ aw̄. 54Ni-aw̄ ugə̄ gō nang yān tə́ ba ndóō de gə̄ yá̰a̰ kem kújə kán̄ naā gə̄ tə́. Ni ɔjədə́ i kɔjə kə́ ɔr kumdə́ ngá̰ý, adə̄ nin̄-ədan̄ na ké kum kedə̄ ń toō ḭḭń i rá wa, ké ni-rāā yá̰á̰ kə́ yáā gə̄ ń toō i ba̰ý wa. 55Ké i ni n i ngōn̄ nge kəja kāgə̄ ní aĺ wa. Ké i kó̰o̰n n rīn na i Mari ní aĺ wa. Ké i Jakə ō Jəjep ō Simo̰ ō Jud ō n i ngákó̰o̰n kə́ dəngam gə̄ ní aĺ wa. 56Ké ngákó̰o̰n kə́ dəyá̰ gə̄ ndin̄ dandə́ tə́ laā malang aĺ wa. Ké yá̰a̰ gə̄ ń toō malang ní ké ḭḭń i rá wa.
57Jeju i tītə̄ bə̄dē kə́ əgadə́ beé. Tā anī Jeju ədadə́ na:
Nge koō ta ní, de gə̄ a kídə̄nən̄ i kem ɓē kojən tə́ ngóy ō, gír kojə yān tə́ ngóy ō.
58Adə̄ Jeju asə rāā yá̰á̰ kə́ yáā gə̄ ngá̰ý loo ń noō tə́ alé, najə̄ taā kem aĺ yādə́ tə́.
Currently Selected:
MATIYE 13: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.