JOB 38
38
Najə̄ kɔr̄ Kɔ́ɔ̄ɓē
(38—41)
1Kɔ́ɔ̄ɓē ɔr̄ najə̄ kə Jobó kum nél balway tə́ əda na:
2Deē ń ɔr̄ najə̄ kə́ kanjə̄ kumən gə̄ rāań adə̄ yá̰a̰ gə̄ ń m-ɔ́jə rāā ní kumdə́ unjə̄ aĺ toō i náā?
3I beé ní, ī-ndi dəngam dɔ rɔ̄í tə́
na m-ā m̄-dəjeī najə̄ ō, ā ɔ́jəm̄ yá̰a̰ kadə̄ m̄-ger̄ ō.
Nə́ɓā i kɔ́ɔ̄ yá̰á̰ kə́ taā koō aĺ gə̄
4Dan ń m-ā m̄-rāań dɔ nang ní, ḭ̄ i loo kə́ rá tə́?
Tītə̄ ń ī-ger̄ yá̰á̰ ngá̰ý ní, ə́dam̄!
5Deē ń ɔjə ngālən ō, laan ō, ngālən kə́ kə̄ dɔɔ́ ō,
rúun kə́ kə̄ nang tə́ ō ní, ī-gerə̄n a?
Aláa deē ń əndā kəlā dɔ nang tə́ ba ɔr gō mbɔ̄jə́nń dɔ nang ní, ī-gerə̄n a?
6Yá̰á̰ ń gírgisə dɔ nang ndi dɔ tə́ ní ī-ger̄ a?
Deē ń əndā mbal̄ kə́ kíl dɔ nang tə́
7dan ń tə́yō̰ kə́ ta gír loo tə́ gə̄ a taānəń pā naā tə́ malang ō,
de kə́ dɔ rā̰ tə́ gə̄ yā Nə́ɓā a túr̄nəń kɔĺ rɔ̄nel̄ ō ní, ī-gerə̄n a?
8Deē ń utə̄ ta róbə dɔ bā bo tə́ dan ń ni ənda loo teēń gíŕ nangāá kə tɔ́gɔ́ ní i náā?
9I mā! M-ə́la kūbə̄ kil̄ man̄ gə̄ rɔ̄n tə́ loo ń noō tə́ ō,
m̄-ɓír̄ gidən kə kə́ díḿsir kə́ ngá̰ý ō.
10m̄-tetə tɔ́gən ń ɔsə nang ḭḭń yā ngɔ̄dəń ní kɔ̄ɔ́ ō,
m-ə́ja nja loo kə́ kadə̄ mān̄ dɔ tə́ alé,
tɔdɔ̄ m-údə́ bápə́ kə́ dēsə́n̄ kāgə̄ ta tə́ non tə́ ō,
11ba m-ə́dan na: Ā ī-reē bátə́ yā kugə̄ loo ń toō tə́ laā,
ba ā ī-mān̄ dɔ loo ń toō alé.
A̰á̰ā̰, bəngál man̄ yāí gə̄ ń ɔjən̄ rɔ̄də́ ngá̰ý ní, a dəban̄ loo ń toō tə́ laā!
12Jóo toó ə̄ndā gúu dɔ ndɔ̄ tə́ ə́da na kə loo kə tīī adə̄ loo tīī kə gō ndūí nja kógə̄ḿ ɓá a?
Ɔ́jə ta gír looń kadə̄ ra tū tə́
13əhɔń ta dɔ nang ba yéyəń ngé kem ndul gə̄ tū tə́ kɔ̄ɔ́ ɓá a?
14Loo ń noō tə́ dɔ nang tél to tītə̄ nánjə́ kə́ deē əndā tambō̰o̰ dɔ tə́
adə̄ gotən to tū tə́ beē ō, yá̰a̰ malang teē tū tə́ kə yá̰á̰ súū rɔ̄ kə́ majə ngá̰ý rɔ̄n tə́ ō.
15Banī dan ń loo tīī unjə̄ anī, ngé kem ndul gə̄ tḭ̄ḭ̄n̄ ta loo kə́ unjə̄ kow yādə́ kɔ̄ɔ́ ō,
deē ń un jīn kə̄ dɔɔ́ yā kəndań ndéy ní, jīn tetə ō.
16Ḭ̄ āw̄ bátə́ ūgə̄ ta kəɓa man̄ bā katə̄ tə́ ō,
ī-njə̄rā á̰a̰ loo kə́ gír bā bo tə́ ō ɓá a?
17Ɔjiīn̄ ta róbə gə̄ yā yo ɓá a? Á̰a̰ ta róbə gə̄ yā ndíl yo ɓá a?
18Ī-ger̄ laa dɔ nang a? Ré ī-ger̄ yá̰a̰ gə̄ ń noō malang anī ə́da!
19Ɓē yā loo kə́ unjə̄ kow i dām̄ kə́ rá tə́?
Loo ń loo kə́ risə til a to tū tə́ ní i rá?
20Ásə kəhɔdə́ dɔ nin̄ loo yādə́ tə́ ō ger̄ kə̄lá róbə kə́ kaw̄ kə̄ ɓēé loodə́ ō a?
21Ḭ̄ ī-ger̄ majə tām̄ ojiīn̄ i jóo!
22Ī-njə̄rā bátə́ ūgə̄ loo ń ngɔ̄mə̄n̄ néjə#38.22 Néjə: Á̰a̰ī Job 6.16 tū tə́ ní a?
Á̰a̰ loo ń ngɔ̄mə̄n̄ kɔ̄sə̄ tū tə́ ní a?
23m̄-ngɔ̄m̄də́ i tām̄ yā kum mbang wur kɔl tə́,
i tām̄ yā ndɔ̄ məla ndaa tə́ ō, ndɔ̄ rɔ̄ɔ̄ tə́ ō.
24Ī-ger̄ róbə ń loo kə́ unjə̄ kow un á reē unjə̄ń dɔjí tə́ ní a?
Ī-ger̄ loo ń néĺ kə́ təngā kə́ gír ɓē tə́ teē tū tə́ á reē taāń loo dɔ nang tə́ ní a?
25Man̄ ń edə ní, i náā n rāā róbə dɔ rā̰ tə́ adə̄n ní?
Kil̄ man̄ ń ndang ní, i náā n njar róbə non tə́ ní?
26I náā n rāā man̄ adə̄ edə dɔ nang kə́ deē gətóo tū tə́ ní?
I náā n rāā man̄ adə̄ edə dəla loo kə́ deē gətóo tū tə́,
27yā rāań kadə̄ man̄ i ngá̰ý loo kə́ yá̰á̰ kə́ ndi kə kumuú gətóo tū tə́ tə́ ō,
kadə̄ mu əɓa tū tə́ ō, tɔgə ō ní?
28Man̄ ń edə ní bɔbə̄n i noó a? Aké i náā n ojə tal ń tə́sō ní?
29Man̄ kə́ tél kɔ̄sə̄ teē i kem náā tə́?
I náā n ojə díḿsir kə́ tél kɔ̄sə̄ kə́ laa mbé mbé ní?
30Loo ń noō tə́ kūl̄ rāā man̄ adə̄ tél ngan̄g tītə̄ mbal̄ ō, rāā adə̄ dɔ ɓūl̄ man̄ ngan̄g ō.
31Á̰a̰ ɓūtə̄ tə́yō̰ gə̄: Ásə kəhɔ ngáń ngé rāā kār̄ gə̄ kadə̄ ndin̄ naā tə́ a?
Ásə́ tútə kəlā ń əhɔ dɔgə́ loo tīī gotoó ní a?
32Ásə rāā ɓūtə̄ tə́yō̰ gə̄ ń rīdə́ na i Majarotə ní kadə̄ teēn̄ kə kum mbang yādə́ gēé a?
Ásə kɔr no bísə tə̄ɓā tal̄ gə̄ kə ngáńdə́ gēé a?
33Ī-ger̄ ndū najə̄ gə̄ kə́ dɔ rā̰ tə́ a?
Ī-rāā ādə̄ de kə́ dɔ nang tə́ gə̄ rāān̄ yá̰a̰ kə gō ndū najə̄ gə̄ ní a?
34Ásə kun ndūí kə̄ dɔɔ́ kədań kil̄ man̄ gə̄ najə̄ kadə̄ man̄ edə dɔí tə́ ngá̰ý a?
35Dan ń man̄ tel̄ ní, i ḭ̄ n ī-rāā adə̄ tel̄ ní a?
Tel̄ man̄ ní ədaī na mā n toó yā rāā yá̰á̰ ń ə̄ndā dɔḿ tə́ kadə̄ m̄-rāā ní a?
36I náā n adə̄ kōó bə̄yā̰ kum kedə̄ ō,
kə́ra kə̄njá kur̄ dɔ kə́ yā ger̄ń yá̰a̰ ō ní?
37I náā n ger̄ tə́da kil̄ man̄ gə̄ majə ō,
ɗel ta sɔl kə́ dɔ rā̰ tə́ gə̄ yā kəjāń man̄ kə́ kemeé ō,
38dan ń dɔ nang tél ngan̄g tītə̄ gində̄ ō,
nán̄g əhɔ naā majə kem ndɔr̄ gə̄ tə́ ō ní?
Nə́ɓā i kɔ́ɔ̄ dā̰ gə̄
39I ḭ̄ n ī-ndo̰o̰ dā̰ ādə̄ kó̰o̰ ɓɔl ō,
ī-tɔ̄l̄ ɓō kə́ kem ngán ɓɔl gə̄ tə́ ō,
40dan ń ton̄ kem bāádə́ tə́, aláa déwn̄ kem looó ní a?
41I náā n i nge kəndā dɔ yá̰a̰ kəsa yā ká̰ā̰ danaá
dan ń ngánən gə̄ a ɓārə́n̄ Nə́ɓā kadə̄ rāā sedə́ ō,
tɔ́gə́də́ gətóo sɔɔ̄ń yá̰a̰ kəsa kə́ gətóo ō ní?
Currently Selected:
JOB 38: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.