JOB 36
36
Elihu ɔjə loo ndóō ń Nə́ɓā a ndóō deē yá̰á̰ ní
1Elihu ɔr̄ najə̄ ɓáý, əda na:
2Job, ī-tə́gā taí ɓáý ādə̄ m̄-ndóōī yá̰a̰.
Yá̰á̰ kə́ rang kə́ kadə̄ m-ə́da tām̄ yā Nə́ɓā tə́ i noō ɓáý.
3M-ā m-ḭ́ḭ kə yá̰a̰ ger̄ yāḿ sa̰y yā reēń,
yā kɔjəń kadə̄ najə̄ yā nge rāāḿ i gōtə́.
4Tɔdɔ̄ kə́ rɔ̄kum tə́ ní, gól̄ loo gətóo tū najə̄ kɔrə̄ḿ tə́.
Tá mā i de kə́ yá̰a̰ ger̄ yāḿ i yá̰a̰ ger̄ kə́ rɔ̄kum n m̄-ndiń ngɔr rɔ̄í tə́ ní.
5Á̰a̰ bo yā Nə́ɓā!
Ni a əda na usəm̄ aĺ alé. Ni-rāā hál de kə́ bo ngá̰ý,
kə ta kūl̄ ra kə́ ni-ra ngan̄g dɔ yá̰a̰ gə̄ ń ni gḛy rāā tə́ ní.
6Ni əya̰ nge kem ndul adə̄ ndi kə kumneé alé,
banī gān̄g sarya kə́ gōtə́ adə̄ ngé gə̄ ń rāān̄ kumdə́ ndoō tə́ ní.
7Ni un kumən kɔ̄ɔ́ ta de kə́ gōtə́ gə̄ tə́ alé.
J-ɔrī najə̄ yā mban̄g gə̄ ń ndin̄ dɔ kōr̄ kāgə̄ mbang tə́ ní ō.
Nə́ɓā əndādə́ dɔ tə́ i yā kadə̄ nin̄ o̰o̰n̄ ɓē dan i ngá̰ý. Banī nin̄ ɔjən̄ rɔ̄də́.
8Ba ré əhɔn̄də́ dəngáy ō, tṵ́ṵ̄n̄də́ kə súĺ ō, rāān̄ kumdə́ ndoō tə́ ō anī,
9kumən na kəla rāādə́ gə̄ ō, kəsō wōn̄g yādə́ gə̄ ō, kə́ loo kɔjə rɔ̄ tə́ ní,
Nə́ɓā gḛy teēń ndágá yā ɓōkə́ ta kumdə́ tə́.
10Ni teē mbīdə́ yā kadə̄ oōn̄neé kɔ̄l̄ yān ō,
ədadə́ na kə tūrə̄n̄ gidədə́ kɔ̄ɔ́ ta yá̰á̰ kə́ a̰a̰ gō naā aĺ tə́ ō.
11Ré nin̄ oōn̄ ba sɔlə̄n̄ dɔdə́ kə̄ no Nə́ɓā tə́ anī,
a tɔ̄lə̄n̄ ta ndɔ̄də́ i dan ndi majə tə́ ō, a tɔ̄lə̄n̄ ta ɓāl̄də́ gə̄ i dan rɔ̄nel̄ tə́ ō.
12Ba ré nin̄ oōn̄ aĺ anī, a oyn̄ yo nənga ō,
koōdə́ a teē kanjə̄ kadə̄ gerə̄n̄ gō ō.
13Banī ngé taā kem aĺ gə̄ ń do̰ō̰n̄ kemdə́ ngan̄g tām̄ wōn̄g rāādə́ ní,
dan ń ni tṵ́ṵ̄də́ kə súĺ ní, nin̄ rāānən̄ ɓɔ́ alé.
14Nin̄ gāngə̄n̄ dɔɔ́ oyn̄ dan balsáádə́ tə́ ō,
ndɔ̄də́ a təgā loo sāā naā loo kaya tə́ ō.
15Banī Nə́ɓā ajə deē ń rāān̄ kumən ndoō tə́ ní i kə ta kūl̄ rāā kə́ rāān̄ kumən ndoō tə́ ō,
ni taān i kə ta kūl̄ wur kɔl ń əsō dɔn tə́ ní ō.
16Kété ní Nə́ɓā un yá̰á̰ kə́ majaĺ dɔí tə́ kɔ̄ɔ́,
ba adī ndi majə kə́ ngá̰ý kum gotə.
Dan ngeé ń noō tə́ ní, yá̰a̰ kəsa kə́ nel̄ gə̄ i ngá̰ý dɔ tábəl kəsa yá̰a̰ yāí tə́.
17Banī gāngə̄n̄ sarya dɔí tə́ ō, sarya ń gāngə̄n̄ ní, loo tútən gətóo ō.
18Ādə̄ wōn̄g aw̄ seí adə̄ ī-rāā yá̰á̰ kə́ mān̄ dɔ loon alé!
Gír̄ ń na ā ī-mang Nə́ɓā kə kadə̄ karī yāí gə̄ kə́ ādə̄n ní,
ī-lōō kəya̰ kadə̄ gír̄ ń noō gólī.
19Tɔdɔ̄ yá̰a̰ kənge yāí, aké lɔ́r yāí, a asə kadə̄ ī-mangəń Nə́ɓā alé,
ká ré ə́hɔ rɔ̄í tɔgə ngá̰ý gə̄gē, ā ásə alé.
20Loo kə́ ndɔ̄ɔ́ ń a a̰a̰ gíŕ nápar de gə̄ loo gətóo kɔ̄ɔ́ tə́ ní,
ī-lōō kəndā kemií dɔ tə́ ō.
21Ī-ngɔ̄m̄ rɔ̄í ba ī-lōō tūr̄ rɔ̄í kə̄ rɔ̄ yá̰á̰ kə́ majaĺ tə́.
tɔdɔ̄ yá̰á̰ kə́ majaĺ teē dɔí tə́ i najə̄n tə́.
Nə́ɓā aw̄ kə tɔ́gə dɔ yá̰a̰ gə̄ tə́ malang
22A̰á̰ā̰, Nə́ɓā i dɔ yá̰a̰ gə̄ tə́ malang, tām̄ tɔ́gən i ngá̰ý.
Nge ndi dɔ de gə̄ tə́ kə́ nge ndóō de gə̄ yá̰a̰ majə tɔȳn i náā?
23De kógə̄ḿ əndā kumən gíŕ hálən tə́ a?
De kógə̄ḿ ədan na ī-rāā yá̰á̰ kə́ majaĺ a?
24I beé ní, ī-lōō kadə̄ dɔí ndígə̄nal kɔsə gɔn yá̰á̰ ń ni-rāā ní,
yá̰á̰ ń de gə̄ malang a ɔsən̄ gɔn kə pā yādə́ gēé ní.
25Yá̰á̰ ń de gə̄ malang asən̄ ra sa̰y ka̰a̰ń ō, ra sa̰y ka̰a̰ń majən ō ní.
26Á̰a̰ā̰, Nə́ɓā i kə́ bo, banī jə-gerī bo yān ní alé.
Deē asə tə́da ɓālə̄n gə̄ alé.
27Ni ndɔ́r̄ man̄ kə́ tə́sō ɗḛy ɗḛy gə̄ kə̄ rɔ̄n tə́ ō,
rāā man̄ kə́ edə dɔɔ́ adə̄ téĺ kə́ díḿsir ō.
28I man̄ ngeé ń toō n teē tū kil̄ man̄ tə́ edə dɔ kósə de gə̄ tə́ ní.
29I náā n asə ger̄ loo tə̄ndā ń kil̄ man̄ gə̄ a tə̄ndā tḭ̄ḭ̄n̄ naā kə loo gə̄ tə́ ō,
loo ndang ń man̄ a ndang no rā̰ tə́ ō ní?
30Ḭ̄ á̰a̰ā̰ majə ngá̰ý kadə̄ i Nə́ɓā n rāā adə̄ man̄ tel̄ dɔɔ́ dɔn nəkɔ́ tə́ ō,
i ni n utə̄ dɔ ɓūl̄ bā bo gə̄ ō ní.
31Ni-gān̄g sarya dɔ gír de gə̄ tə́ i kə ta kūl̄ kil̄ man̄ gə̄ ō,
adə̄ de gə̄ yá̰a̰ kəsa kə́ ngá̰ý al̄ naā i kə ta kūl̄də́ ō.
32Məyā̰ man̄ gə̄ i kem jīn gə̄ tə́ jōó mbak ō,
ni ɔjədə́ yá̰á̰ kə́ yā kadə̄ nin̄ aw̄ ɔdən̄ ō.
33Man̄ yān kə́ ndang əda kōō reēn ō,
yá̰a̰ kul̄ gə̄ gə̄gē dɔdə́ ədadə́ na ni a reē ngɔr ō.
Currently Selected:
JOB 36: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.