JOB 35
35
Elihu a̰ā̰ kadə̄ najə̄ kɔr̄ Job i najə̄ kə́ kanjə̄ kumən
1Tā anī Elihu tél un najə̄ ɔr̄ ɓáý, əda na:
2-3Job, dan ń ə́da Nə́ɓā na najə̄ na gətóo dɔí tə́ gə̄gē a, na usə Nə́ɓā alé,
ḭ̄ na ə́ngé yá̰á̰ gírí alé ní, á̰a̰ā̰ kadə̄ nge ń noō i gōtə́ a?
Á̰a̰ā̰ kadə̄ najə̄ i yāí ta kum Nə́ɓā tə́ a?
4Najə̄ yāí ḭ̄ ō, yā madí gə̄ ō ní,
najə̄ kógə̄ḿ a ɔjə kə̄ ndágá kadə̄ i najə̄ kə́ kanjə̄ kumən.
5Á̰a̰ dɔ rā̰ majə ō, ə̄ndā ma̰ȳ kil̄ man̄ gə̄ ō. Nin̄ i dɔɔ́ dɔí tə́!
6Dan ń ī-rāā yá̰á̰ kə́ majaĺ ní, i kə Nə́ɓāá a?
Dan ń ī-mbātə́ najə̄ tan tə́ nja i ngá̰ý ní, rāā i rí kógə̄ḿ seneé?
7Dan ń ḭ̄ i de kə́ gōtə́ ní, ni-ənge i rí gírí?
Ni-ənge yá̰á̰ kə́rēý jīí tə́ a?
8Kem ndul yāí a ɔdə i rɔ̄ deē madí gə̄ ō,
i nin̄ n yá̰a̰ rāā kə́ gōtə́ yāí a rāā majə sedə́ ō ní.
9Dan ń rāā kum de gə̄ ndoō tə́ i ngá̰ý al̄ naā anī, de gə̄ nōōn̄ rɔ̄də́.
De gə̄ əgan̄ kɔŕ tɔdɔ̄ de kə́ bo gə̄ rāān̄də́ yá̰á̰ kə́ tōr̄.
10Ba de kə́ yā kəda na Nə́ɓā ń rāām̄ ní, ni i rá wa ní gətóo.
Ni ń i nge kəndā pā ta deē tə́ kadə̄ ənī dan ndɔ̄ɔ́ ō,
11nge ndóōjí yá̰a̰ kə ta kūl̄ dā̰ kə́ bembeé gə̄ ō,
nge ndóōjí kum kedə̄ kə ta kūl̄ yel̄ gə̄ ō ní.
12Loo ń noō tə́ de gə̄ əgan̄ kɔŕ, banī ni dal alé,
i tām̄ kɔjə rɔ̄ yā ngé kem ndul gə̄ tə́.
13Najə̄ ń Nə́ɓā a oō aĺ ní i najə̄ kə́ kanjə̄ kumən gə̄ ngóy.
I najə̄ gə̄ ń noō n Nə́ɓā kə́ tɔ́gən i ngá̰ý a ger̄ kumdə́ aĺ ní.
14Tá ḭ̄ ī-ɓōĺ alé, ba ə́da na ḭ̄ na á̰a̰n alé,
najə̄ yāí na i kə́ kənī kə̄ non tə́, ba ḭ̄ na ī-ndi na i gíŕ ngóō tan tə́.
15I tām̄ ndi ń Nə́ɓā ndi tan mbóo ba rāā yá̰a̰ kə wōn̄g yānneé aĺ ō,
ni əhɔ gō mbóo najə̄ kɔr̄ de gə̄ aĺ ō ní n
16Job teēń tan a ɔr̄ń mbóo najə̄ gə̄ ngá̰ý ō,
ɔr̄ń mbóo najə̄ gə̄ kə̄ dɔ naā tə́ kanjə̄ ger̄ kum ō ní.
Currently Selected:
JOB 35: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.