JOB 33
33
Yá̰á̰ ń ɔjə kadə̄ najə̄ yā Elihu i najə̄ kə́ rɔ̄kum ní: Nə́ɓā tāā deē
1I beé ní, ḭ̄ Job ōō najə̄ ń m-ā m-ə́daī ní,
ī-nēl̄ mbīí ōoń najə̄ yāḿ malang.
2Á̰a̰ā̰ m̄-tḛḛ̄ taḿ, adə̄ m-ā m-ɔ̄r̄ najə̄.
3M-ā m-ɔ̄r̄ i najə̄ kə́ rɔ̄kum kə́ kemḿ tə́ ō,
najə̄ ń a teē taḿ tə́ ní, i najə̄ kə́ kumən unjə̄ ō.
4I Ndíĺ Nə́ɓā n əndām̄ ní ō,
i koō Nə́ɓā kə́ tɔ́gən i ngá̰ý n i nge rāā kadə̄ m̄-ndi kə kumḿ ní ō.
5Ré ásə tūrə̄m̄ najə̄ tə́ anī, ī-tūrə̄m̄ tə́ tā.
Ī-rāā gō rɔ̄í majə kadə̄ ī-rɔ̄ɔ̄m̄ kə najá, ī-ra dɔ rɔ̄í tə́!
6Á̰a̰ā̰, m-ásə seí ta kum Nə́ɓā tə́, əɓāmə̄n̄ i kə nánjá ō.
7Kadə̄ ī-ɓōlə́m̄ mā ní kumən gətóo ō,
kadə̄ ī-gír̄ ə́da na mā na m̄-gḛy i rējī kɔ̄ɔ́ ní, kumən gətóo ō.
8Ba ḭ̄ ə́da ta mbīḿ tə́ adə̄ m-ōō majə ō,
tá ndūí ń ɔ̄rəń najə̄ ní, a ɓār̄ ta mbīḿ tə́ laā ɓáý ō.
9Ə́da na najə̄ na gətóo dɔí ḭ̄ tə́ ō, ḭ̄ na ī-mbātə́ najə̄ ta Nə́ɓā tə́ aĺ ō,
tá yá̰á̰ kə́ gōtə́ aĺ kə́ ī-rāā na gətóo ō, adə̄ ḭ̄ na i de kə́ ūnjə̄ njáý njáý.
10Banī Nə́ɓā na ənge yá̰á̰ kə́ yā kɔ̄ləń seí ɓáý,
ni na rāāī na i madə̄ ba̰ā̰n tə́.
11Ni na ənī kángə́lá njaí tə́ ō,
na əndā kumən gír yá̰a̰ rāāī gə̄ tə́ malang ō!
12Job, loo ń noō tə́ ɓáa mā m-ə́daī na najə̄ i yāí alé.
Tɔdɔ̄ Nə́ɓā tɔȳ deē sa̰y ngá̰ý.
13Ni ń i nge kɔjə gíŕ yá̰a̰ rāān gə̄ aĺ ní,
ī-rāā sarya seneé i tām̄ rí tə́?
14Tá loo kɔr̄ najə̄ yā Nə́ɓā kə́rēý i beé ō,
loon kə́ rang i beé ō, banī deē əndā kumən gírí alé.
15Ni a ɔr̄ najə̄ i kə nīí ō, i kə yá̰á̰ kə́ deē a̰ā̰ ndɔ̄ɔ́ ō,
dan ń ɓīī rāā de gə̄ ngá̰ý á to a ɓīīn̄ dɔ tə̄rā yādə́ gə̄ tə́ ní.
16Loo ń noō tə́ ni teē mbī deē
ba tāān ɓa ɓang nja kógə̄ḿ kadə̄ gír gāngəń
17yā tūrəń deē kɔ̄ɔ́ ta yá̰a̰ rāān gə̄ tə́ ō,
yā rāań kadə̄ deē ɔjə rɔ̄n aĺ ō.
18I tītə̄ ń noō n ni ɔgə̄ń deē kaw̄ ɓádá ō,
ɔgə̄ń deē kənī rɔ̄n ta nənga tə́ ō ní.
19Kə́rēý gə̄ anī, Nə́ɓā ndángə̄n kə rɔ̄ tōrōó kem tə̄rá yān tə́,
adə̄ mo̰y gajə rāān adə̄ ni ndew kanjə̄ dəba.
20Ni-mbātə́ yá̰a̰ kəsa kɔ̄ɔ́,
yá̰a̰ kəsa kə́ majə ń nel̄ tan ngá̰ý kété ní, ngurən rāān to̰ alé.
21Ni o̰n̄g ngá̰ý adə̄ deē a̰a̰n, a gerə̄n láẃ alé.
Kə̄ngān gə̄ ń kété deē a̰a̰ aĺ ní, teēn̄ ndágá malang.
22Loo ń noō tə́ njan i kə̄ ta bāá yo tə́ ō,
əya̰n̄ ndi kə kumuú yān i kem jī ngé tɔ̄l̄ yo gə̄ tə́ ō.
23Ba ré deē yā Nə́ɓā kə́ dɔ rā̰ tə́ kógə̄ḿ i kadə nge mo̰y ní tə́,
adə̄ i nge kɔr̄ najə̄ tām̄ yā deē tə́ kógə̄ḿ, kə́ kunən dan ngé kə́ dūbú gə̄ tə́,
yā kadə̄ ter̄ kem nge mo̰y ní dɔ yá̰á̰ kə́ kadə̄ rāā tə́,
24kə́ kadə̄ kumən o̰o̰n tām̄ yā nge mo̰y ní tə́ ba əda Nə́ɓā na:
Ī-lōō kəya̰n kadə̄ aw̄ ɓádá, na m-ə́ngé yá̰a̰ gān̄g dɔn kɔ̄ɔ́!
25Loo ń noō tə́, nge mo̰y tél ənge tɔ́gə gogə́ rang,
rɔ̄n tél to mbōl̄ tītə̄ kə́ kə ngōn̄ dūúneé beé.
26Ni ń nel̄ Nə́ɓā seneé ní, rāā Nə́ɓā ɓɔ́.
Ni əga kɔŕ rɔ̄nel̄, tɔdɔ̄ a̰a̰ ta kum Nə́ɓā ń i nge rāā kadə̄ deē tél de kə́ gōtə́ ní.
27Ni-ənī pā ta kum de gə̄ tə́ malang əda na: Kété ní m̄-rāā yá̰a̰ gōtə́ alé, m̄-ɓōĺ ndū najə̄ gə̄ alé.
Banī Nə́ɓā rāā háĺ kə́ tītə̄ yāḿ mā alé.
28Ni-gān̄g dɔḿ jī yo tə́ kɔ̄ɔ́,
adə̄ m̄-ndi kə kumḿ ō, m-á̰a̰ loo kə́ unjə̄ kow ō.
29Á̰a̰ā̰, yá̰a̰ gə̄ ń noō malang ní, Nə́ɓā rāādə́ nja jōó, nja mətá tām̄ yā deē tə́,
30yā teēń seneé kɔ̄ɔ́ bāá yo tə́,
yā rāań kadə̄ loo kə́ unjə̄ kow yā ngé ndi kə kumdə́ gə̄
unjə̄ń dɔ deē tə́.
31Job, ī-nēl̄ mbīí ōōń najə̄ kɔrə̄ḿ. Ī-ndi taí mbóo, i mā n m-ā m-ɔ̄r̄ najə̄ ní.
32Ré āw̄ kə najə̄ kə́ yā tūr̄ kəda anī ə́da, tɔdɔ̄ m̄-gḛy ka̰a̰ háĺ kə́ gōtə́ yāí.
33Ré āw̄ kə najə̄ kə́ yā kəda aĺ anī, ōō yāḿ mā.
Ī-ndi taí mbóo, anī m-ā m̄-ndóōī kum kedə̄.
Currently Selected:
JOB 33: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.