JOB 32
32
Najə̄ kɔr̄ Elihu
(32—37)
1Loo ń noō tə́ de kə́ mə́tá gə̄ ń i Elipaj ō, Bildad ō, Sopar ō ní dalən̄ Job najə̄ to̰ alé, i tām̄ ka̰a̰ ń Job a̰a̰ rɔ̄n i de kə́ gōtə́ tə́ ní. 2Banī wōn̄g rāā Elihu. Ni i ngōn̄ Barakel kə́ Bujə ń i de kə́ gír kaa yā Ram tə́ ní. Ni-rāā wōn̄g kə Jobó, tām̄ kəda ń Job əda na ni na i de kə́ gōtə́ ngá̰ý tɔȳ Nə́ɓā ní tə́. 3Rāā wōn̄g kə madə̄ Job kə́ mətá gēé ō, tām̄ najə̄ ń əngen̄ yā tūr̄ kəda Job aĺ ní tə́. Tɔdɔ̄ i nge ń noō n ɔjə kadə̄ nin̄ ndigən̄ kadə̄ najə̄ i dɔ Nə́ɓā tə́ ní. 4Elihu ndi ngóō ba ɔr̄ najə̄ kə Jobó alé, i tām̄ ɓāl̄ madə̄n gə̄ tɔȳ yān. 5Ba dan ń Elihu a̰a̰ kadə̄ de kə́ mətá gə̄ əngen̄ najə̄ kə́ yā tūr̄ kəda Job to̰ aĺ anī, wōn̄g rāān.
Elihu ɔjə gír kənī ń ənī tan tū najə̄ tə́ ní
6Loo ń noō tə́ Elihu kə́ ngōn̄ Barakel kə́ Bujə ɔr̄ najə̄ əda na:
Mā i ngōn̄ kə́ balsáá ɓáý, ba sḭḭ̄ i de kə́ tɔgə gə̄.
I tām̄ najə̄ ń noō tə́ n m̄-ɓōĺ kɔjəsí yá̰á̰ ń m̄-ger̄ ní.
7Kété ní m-ə́da kemḿ tə́ na: I de kə́ ɓāl̄də́ i ngá̰ý gə̄ n a ɔrə̄n̄ najə̄ ní ō, i kum kɔɔ̄ gə̄ n i ngé ndóō de gə̄ kum kedə̄ ní ō.
8Ba kə́ rɔ̄kum tə́ ɓáa, i ndíĺ ń Nə́ɓā kə́ tɔ́gən i ngá̰ý adə̄ deē ní n i nge rāā kadə̄ deē ngáā ní.
9I ɓāl̄ de kə́ ngá̰ý n i nge kadə̄ deē kum kedə̄ ní aĺ ō,
i de kə́ tɔgə ɓə́ga n i nge ka̰a̰ yá̰á̰ kə́ súmūú ger̄ ní aĺ ō.
10I tām̄ najə̄ ń noō tə́ n m-ə́da na kə ī-nēl̄ mbīí kə ōoń najə̄ yāḿ ní.
m̄-gḛy kɔjiī yá̰á̰ ń m̄-ger̄ ní ō.
11Á̰a̰ī, m-ə̄ndā kemḿ dɔ najə̄ kɔr̄sí gə̄ tə́, m̄-nēl̄ mbīḿ m-ōoń gír̄ yāsí gə̄,
m-ōoń najə̄ kə́ majə gə̄ ō, kə́ majaĺ gə̄ ō ń ī-tə́daī dɔ najə̄ kɔr̄ Job tə́ ní.
12m̄-nēl̄ mbīḿ majə m-ōoń najə̄ yāsí,
banī deē kógə̄ḿ dansí tə́ kə́ tūr̄ Job najə̄ tə́ gətóo ō,
deē kógə̄ḿ kə́ mbātə́ najə̄ gō Job tə́ gətóo ō.
13Ī-lōōī kəda na: J-əngeī kum kedə̄, i Nə́ɓā ngóy n a tetən rɔ̄ɔ̄ ba i deē alé.
14Ni-ɔr̄ najə̄ i seḿ māá aĺ ō,
najə̄ ń m-ā m̄-tūr̄ yā kədan ní, i nge ń sḭḭ̄ ə́daī ní aĺ ō.
15Tɔ́gə́də́ ur̄ wak kɔ̄ɔ́, nin̄ dalən̄ najə̄ to̰ alé.
Gāngə̄n̄ najə̄ tadə́ tə́ kɔ̄ɔ́.
16m̄-ngóōdə́ i mbée anī m-ā m̄-ngóōdə́ sétə́, nin̄ a ədan̄ najə̄ alé.
Tɔdɔ̄ nin̄ dalən̄ Job najə̄ to̰ alé.
17Najə̄ ń noō ń i kə́ yā tūr̄ kəda ní, i mā n m-ā m̄-tūr̄ yā kəda ní!
Kə́ tām̄ yāḿ tə́ ní, yá̰á̰ ń m̄-ger̄ ní, m-ā m-ɔ́jə kə̄ ndágá ō.
18Tɔdɔ̄ najə̄ rosə kemḿ ō.
Koō kə́ kemḿ tə́ ɔsə seḿ ta kɔ̄r̄ najə̄ ō.
19To kemḿ tə́ i tītə̄ kasə nduú kə́ tām̄ kə́ deē utə̄ ta beé,
i tītə̄ sɔl kə́ kijə gə̄ kə́ a rāān̄ yā ndūbə̄ beé!
20I beé ní m-ā m-ɔ̄r̄ najə̄ yā kadə̄ koōḿ teē pá tá kemḿ tetə.
M-ā m̄-tḛḛ̄ taḿ yā kɔrə̄ń najə̄, adə̄ m-ā m̄-tūr̄ i najə̄ yā kəda.
21M-ā m-ɔ̄r̄ kam̄ deē aĺ ō, m-ā m̄-tɔ́y gidə deē kə najá aĺ ō.
22Tá mā m̄-ger̄ tɔ́y gidə deē kə najá alé.
Ré m̄-rāā beé anī, nge kəndāḿ a unəm̄ kɔ̄ɔ́ i láẃ ngá̰ý.
Currently Selected:
JOB 32: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.