JOB 2
2
Yá̰a̰ nāā kə́ nge ko̰ jōó ń nāā Job ní
1Ndɔ̄ kógə̄ḿ tə́ de gə̄ kə́ dɔ rā̰ tə́ yā Nə́ɓā reēn̄ kɔjə Kɔ́ɔ̄ɓē gotə yá̰a̰ gə̄ ń rāān̄ yá̰á̰ tə́ ní, anī nge sekə́ de gə̄ reē ra ta kum Kɔ́ɔ̄ɓē tə́ sedə́ yā kɔjən gotə yá̰a̰ gə̄ ń rāān̄ yá̰á̰ ní ō. 2Kɔ́ɔ̄ɓē dəjen najə̄ əda na: Ḭ́ḭ i rá? Anī ni-tél əda Kɔ́ɔ̄ɓē na: M-ḭ́ḭ i njə̄rāá dɔ nang tə́ ō, dáȳ gə̄ tə́ ō. 3Anī Kɔ́ɔ̄ɓē dəjen najə̄ ədan na: Á̰a̰ nge kəla yāḿ Job a? De kə́ tītə̄n gətóo dɔ nang tə́. Ni i de kə́ najə̄ gətóo dɔn tə́ ō, i de kə́ súmūú ō, de kə́ ɓōĺ ndíĺ Nə́ɓā ō, i de kə́ nge mbātə́ rāā yá̰á̰ kə́ majaĺ ō. Ni-əhɔ rɔ̄n tɔgə kem háĺ kə́ gōtə́ yān tə́, banī ḭ̄ ī-ra seḿ ta rāān yá̰á̰ kə́ gōtə́ aĺ kanjə̄ kumən. 4Banī nge sekə́ de gə̄ tél əda Kɔ́ɔ̄ɓē na: Yá̰a̰ malang ń deē ənge ní, a adə̄ yā kajəń rɔ̄n. 5Ba ī-nāā kəla jīí kɔdəń dā̰n ō, kə̄ngān ō á̰a̰ā̰. Mā m̄-ger̄ majə ngá̰ý kadə̄ ni a ra ta kumií tə́ yā ndɔ̄líiń. 6Anī Kɔ́ɔ̄ɓē əda nge sekə́ de gə̄ na: Majə, ī-rāā yá̰á̰ ń kemií ndigə ní seneé, ba ī-lōō tɔ̄lən.
7Loo ń noō tə́ nge sekə́ de gə̄ ɔtə kɔ̄ɔ́ ta kum Kɔ́ɔ̄ɓē tə́. Ni-ənī mo̰y bānjə̄ kógə̄ḿ kə́ majaĺ ngá̰ý dɔ Job tə́. Mo̰y ní əla gír i da njan tə́ bátə́ jam dɔn tə́. 8Job ndi i kum bū tə́ ō, un i kéngəlé n a ndo̰ō̰ń rɔ̄n ō.
9Anī nə̄yá̰n ədan na: Ā ī-na̰y kə̄ loo kəhɔ rɔ̄í tɔgə kem háĺ kə́ gōtə́ yāí tə́ ɓáý a? Ī-ndɔ̄ĺ Nə́ɓā ba óy kɔ̄ɔ́! 10Job tél ədan na: Ɔ̄r̄ najə̄ tītə̄ mbóo dəyá̰ beē. Ré Nə́ɓā rāā adə̄ jə-ndiī majanī, jə-ndigiī. Ba ré ni-rāā adə̄ jə-ndiī dan yá̰á̰ kə́ to kum kaȳ aĺ tə́ anī, jə-ndigiī aĺ i tām̄ rí tə́?
Tū yá̰a̰ gə̄ ń noō tə́ malang ní, najə̄ kə́ majaĺ kógə̄ḿ teē ta Job tə́ alé.
Madə̄ Job kə́ mətá gə̄ reē ugə̄n̄
11Madə̄ Job kə́ mətá gə̄, adə̄ i Elipaj kə́ Teman ō, Bildad kə́ Suwa ō, Sopar kə́ Naama ō, oōn̄ gotə yá̰á̰ kə́ to kum kaȳ aĺ malang ń rāā Job ní, adə̄ ḭḭn̄ kə̄ ɓē yādə́ gə̄ tə́ kógə̄ḿ kógə̄ḿ reēn̄. Nin̄ oōn̄ naā yā nōō Job ō, sɔl̄ kemən ō. 12Nin̄ unən̄ kumdə́ kə̄ dɔɔ́ a̰a̰nən̄ sa̰y anī, ger̄nən̄ alé. Anī unən̄ ndūdə́ kə̄ dɔɔ́ nōōnəń. Nin̄ kógə̄ḿ kógə̄ḿ kə dɔdə́ gēé ní rə́yā̰n̄ kūbə̄ kə́ dɔ madə̄ gə̄ tə́ kə́ rɔ̄də́ tə́ kɔ̄ɔ́, ba ɔyn̄ bumbə́ru ɓōkə́n̄ kə̄ dɔɔ́ adə̄ tél dəse pul pul dɔdə́ tə́. 13Gō tə́ anī, ndin̄ nang tə́ dɔ dā̰ nang tə́ seneé, bátə́ ndɔ̄ sīrí kanjə̄ kədan najə̄ kógə̄ḿ. Tɔdɔ̄ nin̄ a̰a̰n̄ kadə̄ wur kɔl yān ní i wur kɔl kə́ al̄ naā ngá̰ý.
Currently Selected:
JOB 2: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.