JOB 18
18
Bildad əda najə̄ gūmbə̄ kə́ tām̄ yā nge kem ndul tə́
1Loo ń noō tə́ Bildad kə́ Suwa ɔr̄ najə̄, əda na:
2I rə́ngáý tə́ n a asəsí kɔr̄ najə̄ kə́ tītə̄ ń noō gə̄ ní?
Ī-gírī yá̰a̰ ba gō tə́ anī j-ɔrī najə̄.
3J-əya̰ī adə̄ rāān̄jí mbóo de gə̄ tə́ i tām̄ rí tə́?
I tām̄ rí tə́ á ī-rāāījí i de kə́ kur̄ dɔdə́ gətóo gə̄ tə́ ní?
4Yāí ḭ̄ ń wōn̄g a rāāī anī ā ī-rə́yā̰ i rɔ̄í ní,
i gáŕ kadə̄ dɔ nang tél loo kə́ deē gətóo tū tə́ ō,
kadə̄ mbal̄ ndɔ̄tə́ kɔ̄ɔ́ loo ran tə́ ō, najə̄ yāí ḭ̄ tə́ a?
5A̰á̰ā̰, loo kə́ unjə̄ kow yā nge kem ndul a oy ō, hor kə́ dan sīl̄ yān tə́ a unjə̄ to̰ aĺ ō.
6Hor kə́ unjə̄ kow a oy muk kem kújə tandā yān tə́ ō,
hor lámbá kə́ dɔn tə́ a oy ō.
7Njə̄rā ń kété ni a njə̄rā i kə tɔ́gɔ́ ní, gō a tél yā sɔl̄ kɔ̄ɔ́ ō,
yá̰a̰ rāān nəkɔ́ kə́ loo mundə̄ tə́ gə̄ a əganən̄ bə̄dē tə́ ō.
8Tɔdɔ̄ njan a aw̄ seneé yā kəlan kum réńg tə́ ō, ni a əla njan kum gūmbə̄ tə́ kadə̄ əhɔn ō.
9Gūmbə̄ a əhɔ gándən, kum kōkə̄ḿkōý a túy yā kəhɔn.
10Kəlā ń a əhɔn ní, i kə́ rāān̄ nán̄g dɔ tə́ kɔ̄ɔ́ ō,
əjan̄ bəlo mbḛ̄ dɔ róbə njān tə́ ō.
11Yá̰á̰ kə́ to ɓōĺ gə̄ teēn̄ kə̄ ta gə̄ tə́ əlan̄ ɓōĺ kə́ ngá̰ý kemən tə́.
Nin̄ unən̄ gōn tḛ tḛ, tə́ndān̄ njadə́ gotə yān tə́.
12Ɓō a taā tɔ́gən kɔ̄ɔ́, kum tō ndoō i kadən tə́ ngɔr ngɔr.
13Kum tō ndoō ní a əsa núsə ndārə́n gə̄ ō,
yá̰á̰ kə́ majaĺ ngá̰ý kə́ əsō dɔ de gə̄ tə́ kem ɓēé a əsa jīn gə̄ kə njan gə̄ ō.
14Kújə tandā yān ń ni-taā kem kadə̄ yá̰a̰ na a rāān kemeé aĺ ní,
a reēn̄ yā kɔrə̄n kemeé kɔ̄ɔ́ dɔ gúú tə́,
yā kaw̄ seneé rɔ̄ mban̄g kə́ nge kəla ɓōĺ kem de gə̄ tə́.
15Kújə yān a ra i kem karī, de kə́ rang asə ndi tū tə́.
A selə́n̄ bursu#18.15 Bursu: Á̰a̰ī Tkg 19.24 dɔ dɔ nang yān tə́.
16Ngəran gə̄ a tutən̄ nang tə́ ō,
a tə́gān̄ ta jīn gə̄ dɔɔ́ kɔ̄ɔ́ ō.
17Əga kem de kə́ dɔ nang tə́ gə̄ dɔn tə́ to̰ alé.
A ɓārə́n̄ rīn loo kə́rēý tə́ dɔ nang tə́ to̰ alé.
18A mbərenən̄ dan loo kə́ unjə̄ kow tə́ yā kənīn kum til tə́ ō,
a tə̄ɓānən̄ kɔ̄ɔ́ dɔ nang ń de gə̄ ndin̄ tū tə́ i kə́ njɔ́ḿ gə̄ tə́ ní ō.
19Ngōnən kə́ gír kojə yān tə́ kə́ yā kaw̄ kə ta ndo̰neé kum kə̄ kété gotən tə́ a gətóo ō,
dan de gə̄ malang kə́ kem kújə yān tə́ ní, deē kógə̄ḿ kə́ yā teē a gətóo ō.
20Yá̰á̰ ń əndān̄ dɔn tə́ kadə̄ rāān ní, ɔr kum de kə́ no ɓē tə́ gə̄ ngá̰ý ō,
yḛr kum de kə́ gír ɓē tə́ gə̄ ngá̰ý ō.
21Adə̄ nin̄ a ədan̄ na:
I yá̰á̰ ń noō ngóy n na̰y loo ɓɔ̄ɔ̄ rɔ̄ yā de kə́ majaĺ tə́ ō, yā kojə yān tə́ ō ní.
Loo ń toō i loo kə́ kété de gə̄ gerə̄n̄ Nə́ɓā tū tə́ alé.
Currently Selected:
JOB 18: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.