JOB 12
12
Job tūr̄ əda na Nə́ɓā na i nge rāā deē yá̰á̰ kə́ tōr̄
1Anī Job ɔr̄ najə̄ əda na:
2Rɔ̄kum, ndūsí i ndū de kə́ kem ɓēé gə̄ malang.
adə̄ ré sḭḭ̄ óyiī anī, kum kedə̄ a oy sesí.
3Mā m̄-ger̄ najə̄ tītə̄sí ō,
m̄-taā kem kadə̄ m̄-mbóo m̄-tɔȳsí aĺ ō.
Najə̄ ń ə́daī ní de gə̄ malang gerə̄n̄ ō.
4Nə́ɓā ń kété ɓāŕnən̄ anī ni a ndigə ní, m-ɔ́r loo ɓārə́n tə́.
Mā ń i de kə́ gōtə́ ō, i de kə́ majə ɔtə̄ kə taá ō ní,
m̄-tél i kur̄ kəgō yā madə̄ tan gə̄ ō, yā de gə̄ ō.
5Najə̄ kɔr̄ ngé gə̄ ń yādə́ i só tə́ ní n toó:
Yá̰á̰ kə́ yā rāā kə de kə́ nge rɔ̄ tō ndoō i kídə̄n!
Najə̄ ń a ədan̄ ngé gə̄ ń njadə́ əhɔ nang to̰ aĺ ní n noó.
6De kə́ ngé rāā yá̰a̰ majaĺ gə̄ ndin̄ loo yādə́ kanjə̄ sōl̄ yá̰á̰ kógə̄ḿ
kə̄ kem kújə tandā yādə́ gə̄ tə́.
Ngé sāā ta Nə́ɓā gə̄ ndin̄ loo yādə́ kanjə̄ kadə̄ yá̰á̰ kógə̄ḿ rāādə́:
tɔ́gə́də́ ngóy n i nə́ɓā kə́ rɔ̄kum aĺ ń nin̄ gerə̄n̄ ní ngóy.
7Ba ré ī-dəje dā̰ gə̄ anī, nin̄ a ɔjə̄nī. Ī-dəje yel̄ gə̄ anī, nin̄ a ndóōnī.
8Ɔ̄r̄ najə̄ kə dɔ nangaá anī, ni a ɔjiī yá̰a̰ ō,
kānjə̄ kə́ kum bā bo tə́ gə̄ aw̄n̄ kə yá̰a̰ gə̄ ngá̰ý yā kɔjiī ō.
9Tɔdɔ̄ dandə́ nin̄ malang ń noō tə́ ní, i nge kə́ rá n ger̄ kadə̄
i jī Kɔ́ɔ̄ɓē n rāā yá̰á̰ ń noō aĺ ní?
10Yá̰a̰ gə̄ malang ń ndin̄ kə kumdə́ ní, ndi kə kumuú yādə́ i kem jī Kɔ́ɔ̄ɓē tə́.
Koō i kem jīn tə́ ō.
11Ədan̄ na mbī na i nge ger̄ nel̄ najə̄ gə̄,
tītə̄ ń kem ta deē i nge ger̄ nel̄ yá̰a̰ gə̄ ní.
12Kum kedə̄ i ɓē kum kɔɔ̄ gēé ō,
ger̄ kum yá̰a̰ əhɔ i de kə́ ɓālə̄n i ngá̰ý ō.
13Ba kə́ rɔ̄kum tə́ ní, kum kedə̄ ō, tɔ́gə ō, i kem jī Kɔ́ɔ̄ɓē tə́.
Kɔjə̄ ō, ger̄ kum yá̰a̰ ō, i yá̰a̰ yān gə̄.
14Yá̰á̰ ń ni nujəń kɔ̄ɔ́ ní, deē a rāā gogə́ to̰ alé.
Deē ń ni-əhɔn dəngáý ní deē a əya̰n dɔɔ́ alé.
15Ré ni-əhɔ man̄ anī, man̄ əhɔ laa,
ba ré ni əya̰ man̄ dɔɔ́ anī, man̄ nujə loo dɔ nang tə́.
16Tɔ́gə, ō yá̰á̰ kə́ teē majə ō, i kem jī Kɔ́ɔ̄ɓē tə́.
De kə́ nge ndúm̄ ō, nge rāān kadə̄ ndúm̄ ō ní, nin̄ i deē yān gə̄.
17Ni-rāā ngé ger̄ yá̰á̰ ngá̰ý gə̄ adə̄ tāmə̄n̄ mbitə mbitə ō,
rāā adə̄ kur̄ dɔ ngé gān̄g sarya gə̄ ndi majaĺ aĺ ō.
18Ni-taā ko̰o̰ ɓē jī mban̄g gə̄ tə́ kɔ̄ɔ́, ba əla kūbə̄ dəngáy rɔ̄də́ tə́.
19Ni i nge rāā ngé tun̄ yá̰a̰ gə̄ kadə̄ tāmə̄n̄ mbitə mbitə ō,
ngé gə̄ ń deē asə kɔr̄də́ loo kəla yādə́ tə́ aĺ ní, ni mbə́rē tə́nīdə́ kɔ̄ɔ́.
20Ni i nge rāā kadə̄ najə̄ gətóo kɔ̄ɔ́ ta ngé ger̄ kɔjə najə̄ ngá̰ý gə̄ tə́ ō,
nge rāā kadə̄ kəndā ma̰ȳ yá̰a̰ teē kɔ̄ɔ́ jī ɓə́ga gə̄ tə́ ō.
21Ni-rāā adə̄ kídə̄n̄ ngé gə̄ ń de gə̄ a rɔyn̄də́ ní ō,
ɔr̄ tɔ́gə́ ngé rāā kum de gə̄ ndoō tə́ gə̄ ō.
22Ni i nge kɔr̄ ngə̄rā ndɔ̄ gír bəlo loo kə́ rúú ngá̰ý tə́ gə̄ ō,
nge teē kə ndíl yoó ndágá kum loo kə́ unjə̄ kow tə́ ō.
23Ni-ɔsə nápar de gə̄ kə̄ dɔɔ́, ba gō tə́ anī nujə sedə́ sák sák kɔ̄ɔ́.
Ni əya̰ nápar de gə̄ kadə̄ teēn̄
kem loo yādə́ kə̄ gogə́, ba gō tə́ anī ɔydə́ dɔ gúú tə́ aw̄ sedə́ loo kə́ rang tə́.
24Ni-rāā adə̄ kur̄ dɔ ngār gə̄ kə́ kem ɓēé ndi gōtə́ aĺ ō,
əya̰də́ adə̄ dáȳn̄ kem dəla loo kə́ róbə gətóo tū tə́ tə́ ō,
25adə̄ mámə̄n̄ loo kum til tə́ ō,
rāādə́ adə̄ ndúmə̄n̄ tītə̄ ngé kasə rāā gə̄ beē ō.
Currently Selected:
JOB 12: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.