JOB 11
11
Sopar əda na: Ī-tél ī-reē rɔ̄ Nə́ɓā tə́
1Loo ń noō tə́ Sopar kə́ Naama ɔr̄ najə̄, əda na:
2Najə̄ kə́ kɔr̄ kadə̄ asə naā beé ń toō kə deē tūr̄ aĺ a?
I ger̄ kɔr̄ najə̄ ngá̰ý n ɔjə kadə̄ najə̄ i yā deē ní a?
3Najə̄ kɔrīí kə́ kanjə̄ kumən gə̄ rāā adə̄ ta de gə̄ ra kə wōyōó yaka.
Ḭ̄ ī-mbóo kə de gēé kanjə̄ kadə̄ əlan̄ rɔ̄sɔl̄ dɔí tə́.
4Tá ī-nāā kəda na najə̄ na gətóo dɔ yá̰a̰ ger̄ yāí tə́ ō,
ḭ̄ na i de kə́ unjə̄ njáý njáý ta kum Nə́ɓā tə́ ō.
5Aa, m̄-ndigə ngá̰ý kadə̄ Nə́ɓā əda yān,
kadə̄ teē tan ɔr̄ najə̄ seí!
6Ni a ɔjiī kum kedə̄ yān kə́ to loo ɓɔ̄ɔ̄ tə́,
kə́ majə ngá̰ý al̄ naā tām̄ yā kur̄ dɔjí tə́.
Loo ń noō tə́ ā ī-ger̄ kadə̄ Nə́ɓā əndā njan dɔ yá̰a̰ rāāí kə́ gōtə́ aĺ gə̄ tə́ nja i ngá̰ý.
7Ásə ger̄ rúú Nə́ɓā a?
Ásə ger̄ bo Nə́ɓā kə́ tɔ́gən i ngá̰ý a?
8I dɔɔ́ sa̰y tītə̄ dɔ rā̰ ní ā ī-rāā i ba̰ý?
Lúu tɔȳ loo kə́ ɓádá ní ā ī-ger̄ i rí tū tə́?
9Laa tɔȳ dɔ nang ō, laa tɔȳ bā bo ō.
10Adə̄ ré Nə́ɓā a mān̄ ba əhɔ de kə́ najə̄ i dɔn tə́ ō,
ɓārə́n saryaá ō anī, i náā n a ɔgə̄n ní?
11Tɔdɔ̄ de gə̄ ń i ngé sor̄ gə̄ ní, Nə́ɓā ger̄də́ majə.
Ka̰a̰ loo ń majaĺ i tū tə́ ní, tōr̄ rɔ̄n ni alé.
12De ń yá̰a̰ tɔȳ tɔ́gən ní ger̄ najə̄ to̰ alé.
Deē malang ń i ngōn̄ kásə́ ɓáý ní, to i tītə̄ ngōn̄ kərō kə́ bembeé beé.
13Dan ń ngəra ger̄ kum yá̰a̰ yāí əhɔ nang majə ō,
dan ń ā ī-sə́ra jīí kum kə̄ rɔ̄ Nə́ɓā tə́ yā ndɔ̄ynneé ō ní,
14ré jīí tákə̄ yá̰á̰ kə́ majanī, ī-tə́gon kɔ̄ɔ́ ō,
ī-lōō kəya̰ loo kem kújə yāí tə́ kadə̄ yá̰a̰ rāā kə́ gōtə́ aĺ ō.
15Loo ń noō tə́ najə̄ a gətóo dɔí tə́ adə̄ ā ɔ̄r̄ dɔí dɔɔ́ ō,
ā ūnjə̄ soy tītə̄ gində̄ kə́ nō horoó beé ō,
adə̄ ā ī-ɓōĺ yá̰á̰ kógə̄ḿ alé.
16Tɔdɔ̄ ā ī-gír̄ dɔ tápə̄ yāí gə̄ tə́ to̰ alé.
A əga kemií dɔ tə́ i tītə̄ loo kəga ń əga kemií dɔ man̄ kə́ nūgə́ aw̄ kɔ̄ɔ́ tə́ ní beē.
17Ndií kə kumií a majə tɔȳ
loo kə́ dan kadaá.
Loo kə́ risə til nding a tél loo kə́ tīī unjə̄.
18Ā ī-tél yā kəndā kemií dɔ Nə́ɓā tə́ gogə́ ō,
yā kənī kemií mámák kadə̄n gogə́ ō:
Ká ré yá̰á̰ kə́ to kum kaȳ aĺ teē dɔí tə́ gə̄gē anī,
ā ī-ɓīī kə lɔmɔɔ́.
19Dan ń ā ɔ̄r̄ koō anī, de kə́ yā reē njə́ɓāī a gətóo ō,
ngá̰ý gə̄ a gól̄nī ō.
20Banī kum ngé kem ndul gə̄ roō loo sāā nge reē dḭḭ̄də́ tə́ ō,
nin̄ əngen̄ loo kə́ yā ɓɔ̄ɔń rɔ̄də́ aĺ ō.
Yá̰á̰ ń nin̄ əndān̄ kemdə́ dɔ tə́ ní, i kadə̄ koōdə́ teē ngóy.
Currently Selected:
JOB 11: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.