1 YÁ̰A̰ GƏ̄ 28
28
Dabid ɔjə de gə̄ kadə i Salomo̰ n i nge kun gotən ní
1Mban̄g Dabid ɓāŕ ngār kə́ Israel gə̄ malang tə́ adə̄ reēn̄ Jerusalem: I ngār kə́ dɔ gír ɓē gə̄ tə́ ō, ngol ngé rɔ̄ɔ̄ gə̄ kə́ dɔ ɓūtə̄ ngé rɔ̄ɔ̄ gə̄ ń i ngé rāā kəla yā mban̄g ní ō, adə̄ i ngol ngé rɔ̄ɔ̄ gə̄ kə́ dɔ de kə́ dūbú gə̄ tə́ ō, kə́ ɓú gə̄ tə́ ō. Ni ɓāŕ de gə̄ ń ndin̄ dɔ yá̰a̰ kənge gə̄ tə́ ní malang ō, ngé ndi dɔ yá̰a̰ kul̄ gə̄ yā mban̄g tə́ ō, yā ngánən gə̄ tə́ ō. Ɓāŕ pajā kə́ bo gə̄ ō, go̰ rɔ̄ɔ̄ gə̄ ō, de kə́ ngáā ngáā gə̄ malang ō. 2Mban̄g Dabid ḭḭ ra dɔɔ́ ba ədadə́ na:
Ngákó̰ó̰ḿ gə̄ ō, gír deē yāḿ gə̄ ō, ōōī najə̄ ń m-ā m-ə́dásí ní. m̄-gír̄ rāā kújə́ kə́ yā kadə̄ sandúkə madə̄ naā yā Kɔ́ɔ̄ɓē ń i kōr̄ kāgə̄ kəndā nja yā Nə́ɓā yājí ní ndi kemeé. Adə̄ m-ɔ́sə dɔ yá̰a̰ gə̄ naā tə́ malang yā rāań kújə́ ní, 3banī Nə́ɓā ədam̄ na i mā n m-ā m̄-rāā kújə́ kə́ yā kadə̄ rīn ɓārə́n̄ dɔ tə́ ní alé, tɔdɔ̄ mā na i de kə́ nge rɔ̄ɔ̄ kə́ na m̄-ɓōkə́ mósə de gə̄ nang tə́ ngá̰ý, 4tá dan de gə̄ malang kə́ kem kojə yā bɔbə́ḿ tə́ ní, i mā n Kɔ́ɔ̄ɓē Nə́ɓā yā Israel gə̄rām̄ yā kadə̄ mā ō, ngánə́ḿ gə̄ ō, ngán kaaḿ gə̄ ō, j-o̰o̰ ɓē dɔ Israel tə́ ngándáńg ní. Kété ní i gír ɓē kə́ Juda tə́ n ni gə̄rāā kadə̄ ni i kété no madə̄n gə̄ tə́ yā kɔr nodə́ ní. Gō tə́ anī, ni gəra gír kojə yā bɔbə́ḿ n dan gír kojə gə̄ kə́ Juda tə́ ní. Banī dan ngáń kə́ dəngam gə̄ ń bɔbə́ḿ ojə tə́ ní, i mā n ni əndām̄ kə gō kemən kadə̄ m-ó̰o̰ ɓē dɔ Israel gə̄ tə́ malang ní. 5Kɔ́ɔ̄ɓē adə̄m̄ ngán gə̄ i ngá̰ý. Ba dan ngánə́ḿ gə̄ tə́ malang ní, i ngōnə́ḿ Salomo̰ n Kɔ́ɔ̄ɓē gə̄rān kadə̄ ndi dɔ kōr̄ kāgə̄ mbang kə́ Israel tə́ kadə̄ o̰o̰ ɓē kə rīneé ní. 6Gō tə́ anī Kɔ́ɔ̄ɓē ədam̄ na kújə yān ō, ndágə loo kə́ gīr̄ gidə kújə yān gə̄ ō ní, i ngōnə́ḿ Salomo̰ n a rāā ní. Tɔdɔ̄ na n-gə̄rā Salomo̰ kadə̄ tél ngōnən ō ni n-reē i bɔbə̄n ō. 7Gō míndə gə̄ ń n-əndā dɔ de gə̄ tə́ kadə̄ rāān̄ ō, yá̰a̰ kāgə̄ ɓē yān gə̄ ō ní, ré Salomo̰ əndā rɔ̄n ta tə́ rāā tītə̄ ń ɓōólaā a rāań toō anī, na n-a n-rāā kadə̄ o̰o̰ ɓē ngándáńg. 8Ngɔlaā ní ə̄nīī ndūsí ta kum ngán Israel gə̄ tə́ malang, ta kum ngé kán̄ naā gə̄ yā Kɔ́ɔ̄ɓē tə́ ō, ta kum Nə́ɓā yājí ń a oō najə̄ kɔr̄jí ō ní tə́, yā ndóō gō míndə gə̄ malang ń Kɔ́ɔ̄ɓē Nə́ɓā yājí əndā dɔjí tə́ kadə̄ jə-rāāī ní ō, ə̄nīī ndūsí yā rāā ní ō. I beé n ā əngeīneé ɓē kə́ majə ń ī-ndiī kemeé tə́ toō ō, ā ásiīneé kəya̰ ɓē ní yā kadə̄ ngáńsí gə̄ ō, ngán kaasí gə̄ ō, gotəsí tə́ kadə̄ i yá̰a̰ ndəbā yādə́ kə́ a to ngándáńg ní ō. 9Banī ḭ̄ ngōnə́ḿ Salomo̰, Nə́ɓā ń m̄-rāā kəla yān ní, ī-ndóō loo gerə̄n kə gōó majə. Ādə̄ kemií kēgə̄ loo rɔȳn tə́ aĺ ō, ādə̄ rɔ̄í neli loo rāā kəla yān tə́ ō. Tɔdɔ̄ kum Kɔ́ɔ̄ɓē a̰a̰ loo bátə́ ugə̄ gə́le kem de gə̄ tə́ malang ō, Kɔ́ɔ̄ɓē əndā ma̰ȳ gír̄ gə̄ malang kə́ kem deē tə́ ō. Ré ī-sāān anī, a əya̰ rɔ̄n yā kadə̄ ə́ngen. Banī ré ə́ya̰n kɔ̄ɔ́ anī, a mbātíī i kə́ njɔ́ḿ gə̄ tə́. 10Ngɔlaā ní á̰a̰ā̰, Kɔ́ɔ̄ɓē gə̄rāī kadə̄ ī-rāā kújə́ kə́ a tél loo kə́ táĺ yān. I beé ní, ə́hɔ rɔ̄í tɔgə ba údə kə̄ rɔ̄ kəla tə́ ī-rāā.
Dabid adə̄ Salomo̰ makətūbə̄ kə́ ɔjə loo rāā kújə yā Kɔ́ɔ̄ɓē
11Dabid adə̄ ngōnən Salomo̰ makətūbə̄ kə́ ɔjə loo rāā ngōn̄ kújə́ kə́ ta róbə tə́ naā tə́ kə kújə́ kə́ kadə tə́ gēé. Adə̄ i kújə ngɔ̄m̄ yá̰a̰ gə̄ ō, kújə́ kə́ dɔɔ́ gə̄ ō, kújə́ kə́ kemeé gə̄ ō, kújə́ ń sandúkə́ kə́ táĺ a ndi kemeé ní ō. 12Ni-adə̄n makətūbə̄ yá̰a̰ malang ń ni núm̄ rāā ní ō, adə̄ i ndágə loo gə̄ kə́ gidə kújə yā Kɔ́ɔ̄ɓē tə́ ō, kújə gə̄ kə́ gidə ndágə loo kə́ gīr̄ gidə kújə yā Kɔ́ɔ̄ɓē gə̄ ní tə́ ō, kújə ngɔ̄m̄ yá̰a̰ kə́ gātə̄də́ i ngá̰ý gə̄ kə́ tām̄ yā kújə yā Nə́ɓā tə́ ō, yá̰á̰ kə́ yā ɓōĺ gidə kə́ ndējə̄ gə̄ ō. 13Ni-adə̄n makətūbə̄ rī ngé tun̄ yá̰a̰ gə̄ ō, rī ngán Lebi gə̄ ō, makətūbə̄ kəla kə́ yā rāā gə̄ kə́ kem kújə yā Kɔ́ɔ̄ɓē tə́ ō, makətūbə̄ yá̰a̰ rāā kəla gə̄ kə́ kem kújə yā Kɔ́ɔ̄ɓē tə́ ō. 14Ɔjən kɔȳ lɔ́ŕ kə́ yā rāań yá̰á̰ kə́ yā rāādə́ kə lɔ́rɔ́ gə̄ ō, ɔjən kɔȳ arjā̰a̰ kə́ yā rāań yá̰á̰ kə́ yā rāādə́ kə arjā̰a̰á̰ gə̄ ō, kə gō ń asə loon tə́ yā rāań yá̰a̰ gə̄ ní kógə̄ḿ kógə̄ḿ malang ní. 15Ni ɔjən kɔȳ yá̰a̰ kəndā bay hor gə̄ kə́ rāān̄də́ kə lɔ́rɔ́ gə̄ ō, kɔȳ bay hor gə̄ kə́ rāān̄də́ kə lɔ́rɔ́ gə̄ ō, kɔȳ yá̰a̰ kəndā bay hor gə̄ kə́ rāān̄də́ kə gində̄ arjā̰a̰á̰ gə̄ ō, kə gō ń asə loon tə́ yā rāańdə́ kógə̄ḿ kógə̄ḿ malang ní. 16Ɔjən kɔȳ tábəl gində̄ lɔ́r gə̄ kə́ yā ɓōkə́ mápá kə́ ndējə̄ gə̄ dɔ tə́ ō, kɔȳ tábəl gində̄ arjā̰a̰ gə̄ ō, 17kɔȳ yá̰a̰ kɔsə dā̰ dɔ hor tə́ gə̄ ō, kɔȳ səmbē tə́té yá̰a̰ gə̄ ō, kɔȳ bay gíŕ ɗénjéńg gə̄ kə́ rāān̄də́ kə lɔ́ŕ kə́ unjə̄ njáý njáý gə̄ ō, kɔȳ səmbē lɔ́r gə̄ ō, səmbē arjā̰a̰ gə̄ ō, kə gō ń asə loon tə́ yā rāańdə́ kógə̄ḿ kógə̄ḿ malang ní. 18Ɔjən kɔȳ yá̰a̰ kə́ yā rōó ndujə̄ yá̰á̰ kə́ kotə majə dɔ tə́ kə́ rāā kə lɔ́ŕ kə́ unjə̄ njáý njáý ō. Ta tɔ̄l̄ ta anī adə̄n sandúkə́ kə́ táĺ kə́ yā ndájə̄ loo rāān, adə̄ i de kə́ dɔ rā̰ tə́ gə̄ ń jā̰n̄ bɔ̄gə̄də́ utə̄n̄neé dɔ sandúkə madə̄ naā yā Kɔ́ɔ̄ɓē ní. 19Dabid əda na yá̰a̰ gə̄ ń noō malang na ton̄ kem makətūbə̄ ń n-ənge jī Kɔ́ɔ̄ɓē tə́ ní. Makətūbə̄ ní na ɔjə loo rāā yá̰a̰ gə̄ ní kógə̄ḿ kógə̄ḿ malang adə̄ unjə̄.
20Gō tə́ anī əda ngōnən Salomo̰ na: Ī-lōō kəya̰ rɔ̄í yɔkəlɔ ba ə́hɔ rɔ̄í tɔgə ī-rāań yá̰a̰! Ī-lōō sōl̄ ō, ī-lōō ɓōĺ ō, tɔdɔ̄ Kɔ́ɔ̄ɓē Nə́ɓā yāḿ i seí naā tə́. Ni a əya̰ī kɔ̄ɔ́ aĺ ō, a tél gōí tə́ aĺ ō, bátə́ kadə̄ ī-rāań kəla kújə yān kadə̄ təgā. 21Ɓūtə̄ ngé tun̄ yá̰a̰ gə̄ n toó ō, ngán Lebi gə̄ n toó ō, tām̄ yā kəla malang kə́ kem kújə yā Nə́ɓā tə́. Tá de kə́ kemdə́ gḛy rāā kəla gə̄ ō, kə́ ger̄ kəla malang majə gə̄ ō, a ɓoon̄ rɔ̄də́ yāí tə́ tū kəla malang ń toó tə́. Ngār gə̄ malang ō, Israel gə̄ malang ō, a oōn̄ taí adə̄ a rāān̄ yá̰a̰ malang ń ā ə́dádə́ ní.
Currently Selected:
1 YÁ̰A̰ GƏ̄ 28: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
1 YÁ̰A̰ GƏ̄ 28
28
Dabid ɔjə de gə̄ kadə i Salomo̰ n i nge kun gotən ní
1Mban̄g Dabid ɓāŕ ngār kə́ Israel gə̄ malang tə́ adə̄ reēn̄ Jerusalem: I ngār kə́ dɔ gír ɓē gə̄ tə́ ō, ngol ngé rɔ̄ɔ̄ gə̄ kə́ dɔ ɓūtə̄ ngé rɔ̄ɔ̄ gə̄ ń i ngé rāā kəla yā mban̄g ní ō, adə̄ i ngol ngé rɔ̄ɔ̄ gə̄ kə́ dɔ de kə́ dūbú gə̄ tə́ ō, kə́ ɓú gə̄ tə́ ō. Ni ɓāŕ de gə̄ ń ndin̄ dɔ yá̰a̰ kənge gə̄ tə́ ní malang ō, ngé ndi dɔ yá̰a̰ kul̄ gə̄ yā mban̄g tə́ ō, yā ngánən gə̄ tə́ ō. Ɓāŕ pajā kə́ bo gə̄ ō, go̰ rɔ̄ɔ̄ gə̄ ō, de kə́ ngáā ngáā gə̄ malang ō. 2Mban̄g Dabid ḭḭ ra dɔɔ́ ba ədadə́ na:
Ngákó̰ó̰ḿ gə̄ ō, gír deē yāḿ gə̄ ō, ōōī najə̄ ń m-ā m-ə́dásí ní. m̄-gír̄ rāā kújə́ kə́ yā kadə̄ sandúkə madə̄ naā yā Kɔ́ɔ̄ɓē ń i kōr̄ kāgə̄ kəndā nja yā Nə́ɓā yājí ní ndi kemeé. Adə̄ m-ɔ́sə dɔ yá̰a̰ gə̄ naā tə́ malang yā rāań kújə́ ní, 3banī Nə́ɓā ədam̄ na i mā n m-ā m̄-rāā kújə́ kə́ yā kadə̄ rīn ɓārə́n̄ dɔ tə́ ní alé, tɔdɔ̄ mā na i de kə́ nge rɔ̄ɔ̄ kə́ na m̄-ɓōkə́ mósə de gə̄ nang tə́ ngá̰ý, 4tá dan de gə̄ malang kə́ kem kojə yā bɔbə́ḿ tə́ ní, i mā n Kɔ́ɔ̄ɓē Nə́ɓā yā Israel gə̄rām̄ yā kadə̄ mā ō, ngánə́ḿ gə̄ ō, ngán kaaḿ gə̄ ō, j-o̰o̰ ɓē dɔ Israel tə́ ngándáńg ní. Kété ní i gír ɓē kə́ Juda tə́ n ni gə̄rāā kadə̄ ni i kété no madə̄n gə̄ tə́ yā kɔr nodə́ ní. Gō tə́ anī, ni gəra gír kojə yā bɔbə́ḿ n dan gír kojə gə̄ kə́ Juda tə́ ní. Banī dan ngáń kə́ dəngam gə̄ ń bɔbə́ḿ ojə tə́ ní, i mā n ni əndām̄ kə gō kemən kadə̄ m-ó̰o̰ ɓē dɔ Israel gə̄ tə́ malang ní. 5Kɔ́ɔ̄ɓē adə̄m̄ ngán gə̄ i ngá̰ý. Ba dan ngánə́ḿ gə̄ tə́ malang ní, i ngōnə́ḿ Salomo̰ n Kɔ́ɔ̄ɓē gə̄rān kadə̄ ndi dɔ kōr̄ kāgə̄ mbang kə́ Israel tə́ kadə̄ o̰o̰ ɓē kə rīneé ní. 6Gō tə́ anī Kɔ́ɔ̄ɓē ədam̄ na kújə yān ō, ndágə loo kə́ gīr̄ gidə kújə yān gə̄ ō ní, i ngōnə́ḿ Salomo̰ n a rāā ní. Tɔdɔ̄ na n-gə̄rā Salomo̰ kadə̄ tél ngōnən ō ni n-reē i bɔbə̄n ō. 7Gō míndə gə̄ ń n-əndā dɔ de gə̄ tə́ kadə̄ rāān̄ ō, yá̰a̰ kāgə̄ ɓē yān gə̄ ō ní, ré Salomo̰ əndā rɔ̄n ta tə́ rāā tītə̄ ń ɓōólaā a rāań toō anī, na n-a n-rāā kadə̄ o̰o̰ ɓē ngándáńg. 8Ngɔlaā ní ə̄nīī ndūsí ta kum ngán Israel gə̄ tə́ malang, ta kum ngé kán̄ naā gə̄ yā Kɔ́ɔ̄ɓē tə́ ō, ta kum Nə́ɓā yājí ń a oō najə̄ kɔr̄jí ō ní tə́, yā ndóō gō míndə gə̄ malang ń Kɔ́ɔ̄ɓē Nə́ɓā yājí əndā dɔjí tə́ kadə̄ jə-rāāī ní ō, ə̄nīī ndūsí yā rāā ní ō. I beé n ā əngeīneé ɓē kə́ majə ń ī-ndiī kemeé tə́ toō ō, ā ásiīneé kəya̰ ɓē ní yā kadə̄ ngáńsí gə̄ ō, ngán kaasí gə̄ ō, gotəsí tə́ kadə̄ i yá̰a̰ ndəbā yādə́ kə́ a to ngándáńg ní ō. 9Banī ḭ̄ ngōnə́ḿ Salomo̰, Nə́ɓā ń m̄-rāā kəla yān ní, ī-ndóō loo gerə̄n kə gōó majə. Ādə̄ kemií kēgə̄ loo rɔȳn tə́ aĺ ō, ādə̄ rɔ̄í neli loo rāā kəla yān tə́ ō. Tɔdɔ̄ kum Kɔ́ɔ̄ɓē a̰a̰ loo bátə́ ugə̄ gə́le kem de gə̄ tə́ malang ō, Kɔ́ɔ̄ɓē əndā ma̰ȳ gír̄ gə̄ malang kə́ kem deē tə́ ō. Ré ī-sāān anī, a əya̰ rɔ̄n yā kadə̄ ə́ngen. Banī ré ə́ya̰n kɔ̄ɔ́ anī, a mbātíī i kə́ njɔ́ḿ gə̄ tə́. 10Ngɔlaā ní á̰a̰ā̰, Kɔ́ɔ̄ɓē gə̄rāī kadə̄ ī-rāā kújə́ kə́ a tél loo kə́ táĺ yān. I beé ní, ə́hɔ rɔ̄í tɔgə ba údə kə̄ rɔ̄ kəla tə́ ī-rāā.
Dabid adə̄ Salomo̰ makətūbə̄ kə́ ɔjə loo rāā kújə yā Kɔ́ɔ̄ɓē
11Dabid adə̄ ngōnən Salomo̰ makətūbə̄ kə́ ɔjə loo rāā ngōn̄ kújə́ kə́ ta róbə tə́ naā tə́ kə kújə́ kə́ kadə tə́ gēé. Adə̄ i kújə ngɔ̄m̄ yá̰a̰ gə̄ ō, kújə́ kə́ dɔɔ́ gə̄ ō, kújə́ kə́ kemeé gə̄ ō, kújə́ ń sandúkə́ kə́ táĺ a ndi kemeé ní ō. 12Ni-adə̄n makətūbə̄ yá̰a̰ malang ń ni núm̄ rāā ní ō, adə̄ i ndágə loo gə̄ kə́ gidə kújə yā Kɔ́ɔ̄ɓē tə́ ō, kújə gə̄ kə́ gidə ndágə loo kə́ gīr̄ gidə kújə yā Kɔ́ɔ̄ɓē gə̄ ní tə́ ō, kújə ngɔ̄m̄ yá̰a̰ kə́ gātə̄də́ i ngá̰ý gə̄ kə́ tām̄ yā kújə yā Nə́ɓā tə́ ō, yá̰á̰ kə́ yā ɓōĺ gidə kə́ ndējə̄ gə̄ ō. 13Ni-adə̄n makətūbə̄ rī ngé tun̄ yá̰a̰ gə̄ ō, rī ngán Lebi gə̄ ō, makətūbə̄ kəla kə́ yā rāā gə̄ kə́ kem kújə yā Kɔ́ɔ̄ɓē tə́ ō, makətūbə̄ yá̰a̰ rāā kəla gə̄ kə́ kem kújə yā Kɔ́ɔ̄ɓē tə́ ō. 14Ɔjən kɔȳ lɔ́ŕ kə́ yā rāań yá̰á̰ kə́ yā rāādə́ kə lɔ́rɔ́ gə̄ ō, ɔjən kɔȳ arjā̰a̰ kə́ yā rāań yá̰á̰ kə́ yā rāādə́ kə arjā̰a̰á̰ gə̄ ō, kə gō ń asə loon tə́ yā rāań yá̰a̰ gə̄ ní kógə̄ḿ kógə̄ḿ malang ní. 15Ni ɔjən kɔȳ yá̰a̰ kəndā bay hor gə̄ kə́ rāān̄də́ kə lɔ́rɔ́ gə̄ ō, kɔȳ bay hor gə̄ kə́ rāān̄də́ kə lɔ́rɔ́ gə̄ ō, kɔȳ yá̰a̰ kəndā bay hor gə̄ kə́ rāān̄də́ kə gində̄ arjā̰a̰á̰ gə̄ ō, kə gō ń asə loon tə́ yā rāańdə́ kógə̄ḿ kógə̄ḿ malang ní. 16Ɔjən kɔȳ tábəl gində̄ lɔ́r gə̄ kə́ yā ɓōkə́ mápá kə́ ndējə̄ gə̄ dɔ tə́ ō, kɔȳ tábəl gində̄ arjā̰a̰ gə̄ ō, 17kɔȳ yá̰a̰ kɔsə dā̰ dɔ hor tə́ gə̄ ō, kɔȳ səmbē tə́té yá̰a̰ gə̄ ō, kɔȳ bay gíŕ ɗénjéńg gə̄ kə́ rāān̄də́ kə lɔ́ŕ kə́ unjə̄ njáý njáý gə̄ ō, kɔȳ səmbē lɔ́r gə̄ ō, səmbē arjā̰a̰ gə̄ ō, kə gō ń asə loon tə́ yā rāańdə́ kógə̄ḿ kógə̄ḿ malang ní. 18Ɔjən kɔȳ yá̰a̰ kə́ yā rōó ndujə̄ yá̰á̰ kə́ kotə majə dɔ tə́ kə́ rāā kə lɔ́ŕ kə́ unjə̄ njáý njáý ō. Ta tɔ̄l̄ ta anī adə̄n sandúkə́ kə́ táĺ kə́ yā ndájə̄ loo rāān, adə̄ i de kə́ dɔ rā̰ tə́ gə̄ ń jā̰n̄ bɔ̄gə̄də́ utə̄n̄neé dɔ sandúkə madə̄ naā yā Kɔ́ɔ̄ɓē ní. 19Dabid əda na yá̰a̰ gə̄ ń noō malang na ton̄ kem makətūbə̄ ń n-ənge jī Kɔ́ɔ̄ɓē tə́ ní. Makətūbə̄ ní na ɔjə loo rāā yá̰a̰ gə̄ ní kógə̄ḿ kógə̄ḿ malang adə̄ unjə̄.
20Gō tə́ anī əda ngōnən Salomo̰ na: Ī-lōō kəya̰ rɔ̄í yɔkəlɔ ba ə́hɔ rɔ̄í tɔgə ī-rāań yá̰a̰! Ī-lōō sōl̄ ō, ī-lōō ɓōĺ ō, tɔdɔ̄ Kɔ́ɔ̄ɓē Nə́ɓā yāḿ i seí naā tə́. Ni a əya̰ī kɔ̄ɔ́ aĺ ō, a tél gōí tə́ aĺ ō, bátə́ kadə̄ ī-rāań kəla kújə yān kadə̄ təgā. 21Ɓūtə̄ ngé tun̄ yá̰a̰ gə̄ n toó ō, ngán Lebi gə̄ n toó ō, tām̄ yā kəla malang kə́ kem kújə yā Nə́ɓā tə́. Tá de kə́ kemdə́ gḛy rāā kəla gə̄ ō, kə́ ger̄ kəla malang majə gə̄ ō, a ɓoon̄ rɔ̄də́ yāí tə́ tū kəla malang ń toó tə́. Ngār gə̄ malang ō, Israel gə̄ malang ō, a oōn̄ taí adə̄ a rāān̄ yá̰a̰ malang ń ā ə́dádə́ ní.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.