2 Ngar 10
10
Tølïn ngan Akab døtanãimïta
1Ngan Akab kïdïngãg døtanãimïta in kam þebot kï Samari. Jehu ndang maktub lan Samari kï ro bïraðøøgt kïbogt kï Jijrel, kï kïbog kï ngéngom ngan Akab, el an: 2Tajigla, lon maktub 'nten tee rosït, na lon nga ngeesï kïdïngã în nat sesï, kï pusïðøøg kï sïndag, kï þebog kïngang kï nyakatg, 3îla oon ngon kïmaj ku ngan ngeesït kï asï a ne, I ndahna dø pong kõþet lo bøwa, na i ðøøn kïta ngékïþe lo ngeesï.
4Þool ðad ngãi ad elïn anan: Oo ngarg joo kaa asï ðan nõat al. Ye titbãi jî j'asï ða nõat a? 5Titbe bïradø ngékïþe lo ngar, kï ngarþe, kï kïbog, kï ngéngom ngan Akab lan kï ro Jehut, anan: Jî þerg loi, j'a kï ða nya kïðen'n elj. J'a kï ndah de mad ngart al, i ða nya kïmaj takumit.
6Kamla Jehu ndang maktub kïkõjoo, el an: Îla in deg lom, na îla i ndig telïn rosï go tat lom a ne, i gangïn dø ngan ngeesï na loti i ðen romt Jijrel kï kàd'n m'ndï m'elsï tat. Na ngan ngar kïdøtanãimïta'n non in ji kïbogt kam þebot, na ndï oon god.
7Lon maktub'n non tee rodt ye, øin ngan ngar kïdøtanãimïta nõ, jan kød kamla un død kam kehgt lan ne ro Jehut, Jijrel. 8Ngombangkïla ðe el Jehu an: Ðen kï dø ngan ngar ka nõ. Jehu tur an: Ad ünd dønat þut joo ta tabit't mbã loti. 9Jehu kïsî tee ðà nõ degt tube an: În deg kïdenesew. I mî la m'la tam ber m'tølïn ngeem na îgïn ton ten, nõ tøld a? 10Tajigla maj kad i gerïn, ta mad kï tee kokïro Bïraþet kïn so ber kari goto. Ta'n Bïraþe el dø ngékïþet lo Akab ye, Bïraþe tølkon ta'n non in el kïta þer lon Eli. 11Jehu tøl ndeg deg tube kï girrkoojt lo Akab kam Jijreelt kï kïbog loa, kï namag kïjeje, kï ngejanyamosï loa, nya de kïða kï døa dõ al.
Jehu tøl ngan Akajia
(Oo 2 Hoi 22:8)
12Kamla Jehu þai aw Samari na lon tee kuj kawnat lo ngéngombatg, dø ðobt, 13Jehu ndød ngankõ Akajia, ngar kï Juda na ndïjed an: În nõg a? Turïn anan: Jî ngankõ Akajia, kï ðe kïta ða lapia ngan ngar kï ngan në ngar. 14Jehu el an: I høndï kumkajir. Høndï kumkajir na tølïnd ta bulomant lo kuj kawna lo ngéngombatg. În deg døsøø gidaijoo, nyan de mad kïða kudt al.
Jehu ndødïn na kï Jonadab
15Jehu þai nõbe, aw ndød Jonadab ngon Rekab'n ndï la taa. Ðaa lapia na ela an: Kami i sem jeje tit'n kamm in sei ye be ho a? Jonadab tur an: Lom i titbe ho, Jehu el an: Îla i titbe a ne, adïm jii. Jonadab ada jin na Jehu ada þai gont kam pusïðøøt lon. 16El an: I ðe nat sem, oo jang'n ðam kïta Bïraþe. Jehu una kam pusïðøøt lon. 17Lon Jehu tee Samari ye, tøl deg tube kï girrkoojt lo Akab'n ndïn Samarit. Tøld tube kïgo tat'n Bïraþe el Eli.
Jehu øg dø ða yo Baal
18Jehu kaw deg tube eld an: Akab ða kïlaþer lo Baal ngãi al, na mî Jehu m'a ða kïlaþer loa ngãi. 19Tajigla i kunïn ngékelta kïta Baalt tube kïromt, ngékïlaþerg loa tube kï ngéjanyamosï loa tube. Ot kad de mad kïða nãi gog kïta m'a m'ja nyamosï kïbobe m'ad Baal. Dekïðen'n a ðe al a ne, a ndï kï døn dõ al. Jehu ða kïlo ndokumt kad'n nujïn ngekøsï død ber nõ Baalt.
20Jehu ndamber an: I la mber ða nah køsïgon Baal. Na lan mbera. 21Jehu la ngombangkïlag kam døning Israelt kïtaagbe na ngekøsï død ber nõ Baalt tube ðen, kïkïða kudt kï ðe al goto. Andïn kam kujt lo Baal na kuj lo Baal kïtaagbe þakot kï deg. 22Jehu el ngengom kubg an: I tee kï kubg kïta ngékøsï død ber nõ Baalt tube. De'n non tee kï kubg kïtad, 23Kamla Jehu kï Jonadab ngon Rekab awïn kam kujt lo Baal, na el ngékøsï død ber nõ Baalt an: I sah oon na þeta þer lo Bïraþe kïða ndï ne, na þerg lo Baal tã.
24Andïn kad lan kadkarig kïjakø kï kadkarig kïlahorrt, Jehu nda deg døjijoo tïga, eld an: De'n nya de kïða ku îgïntin în m'lad jidt ada ãi a ne, kumkajir loa a ga got kumkajir lo de ka nõ ho, 25Lon lan kadkari kïlahorrt tïga woi ye Jehu el ngengomlo kï bïradø ngéðøø an: Andïn, i tølïnd na adïn de kïða tee tïga al. Tølïnd kï kiyaðøø. Ngengomlo kï bïradø ngéðøøg tïlan nid kïtïga, na awïn mbã teen lot kïjaþat kam kujt lo Baal. 26Ørrïn þakumtanyag kïtasï kï kuju lo Baal kïtïga, lan horro døt. 27Tøøn dïngïr yo lo Baal køsïkøsï, tøsïn kuj lo Baal tïlan na telïna kuj kedkî mbã þone.
Jehu õþe dø Israelt
28Titbe la Jehu nujïn yo Baal døning Israelt, 29na Jehu nya ðob kïmajal lo Jeroboam ngon Nebat al, in ørr Israelag ad ðan yo ngon mang kï nar ør kam Betelt kï Dan. 30Bïraþe el Jehu an: Kïtø i gangta kïmaj dø nyat kïgoðobat takummt, ad i nyag tube kïkammt, dø ngékïþet lo Akab, ngani a ndïn dø pong kõþet lo Israel mbã ngaka kïkõsøø. 31Titbe kaa ne, Jehu ndulo go ðob mberkïnda lo Bïraþe Luwah lo Israel kï ngarkamïn tube al. Nyago majal lo Jeroboam al, în ad Israelag ðan majal.
32Kaglot'n non Bïraþe mbagirr tel gang kï døning Israel kï gog, ad Hajael ngar kï Siri tetðøø Israelag kam døning Israelt kïtaagbe. 33Mbagirra bah Jurrdë ko loþakàd, tetðøø døning Galaad tube, Gadiag kï Rubeniag kï Manaseag kïko Aroer ta bah Arnõnt mbã døning Galaad kï Basan.
34Ndeg kïlag lo Jehu, kï nyag tube'n ða, kï tøg loa tube ye, ndangïn taa kam maktub hoitat lo ngarg kï Israel? 35Jehu oi ad duwïna nat kï bøwag Samari na ngona Joakaj õþe gootat. 36Jehu õþe dø Israelt Samari þal døjoo gidaijijoo.
Currently Selected:
2 Ngar 10: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.