1 Timoteo 1
1
So' Pablo ỹamaxa jaso' lidíise so' Timoteo
1Jaỹim Pablo, jaỹim lamaxasec so' Jesucristo. Da'me ñamaxaságuec chiỹoqot'ot ñi' Dios 'me qadec'alaxaqui, nataq'en so' qadesaliaxanec Jesucristo 'me ỹátaqta qadatanaxanaxat. 2'Am Timoteo, 'ená'am da' 'am ỹaleesa, qá'a jaỹim 'auachiỹoxotet'ot da' 'adip'iỹáxac. 'Am samaxa jan' ỹidíise, qá'a sétaaque da' 'auaconeguet da' niỹálaqtaxanaxac nataq'en da' nichoxodénataxanaxac, qataxa da' n'emáxac 'me chiỹoqo'ot ñi' qadet'a Dios nataq'en so' qadesaliaxanec Cristo Jesús.
Naqátaxac da' qontela'aguet ga' napaxaguenataxanaxac 'me sa lasoxoc
3Sétaaque da' maliaxa 'onéta'ña di' noic Efeso, 'ená'am so' nolo' laqáỹa ca'li jaỹim sat'ague da' 'aléua Macedonia, qá'a 'uo na' dapaxaguenataxáatapeec na' sa lasoxoc. Chan'eesa sétaaque da' 'auenapéga jen'me da' sa 'te da' quetalégue da' dapaxaguenataxáatapeec dójo', 4qataxa 'ená'te da' ỹoqo'cha na' 'chi n'aqtaxanaxac 'áanataxanaxaic, nataq'en da' n'aqtaguec ladíquiaxac so' huá'au let'alpi. Qá'a da'me na'chidáta da' cotaxac 'me qaỹa 'te ga' náỹi, qataxa sa lecochiỹa ga' siỹaxaua da' lemala' da' n'onataxanaxac 'me Dios qo'mi ỹanema, ỹasouaxat da' 'uo da' qadip'iỹáxac.
5Da'me qodamaxasoxolégue da' qoỹaxañi, qá'a ñi' Dios sétaaque da' nichoxodena't na' siỹaxadipi. Ga' siỹaxaua 'uo da' lesóxodic, qá'a ỹátaqta ỹoqovíchiỹi jañi' liquidiaqte, qataxa ỹiỹamqáchiiñi da' laviliỹáxac, qataxa huesóta da' lip'iỹáxac. 6Qá'a sóxote 'uo na' daqatéegue, cá'ai da' ỹiỹamqáchiiñi, ỹisómaxanaqtet na' netaxaỹaxacpi 'me qaỹa 'te ga' náaue. 7Jen'me sétaaque da' paxaguenaxala' da' dapaxaguenataxanec na' laqátaxacpi ñi' Dios. Qaláxasa ỹátaqta sa ỹaỹáten da'me ỹ'axátetac, nataq'en da'me dapaxaguenataxáatapeec 'me 'enapéga ỹátaqta lasoxoc.
8Saỹátenaq na' laqátaxacpi ñi' Dios da' ỹátaqta ỹiỹamqáchiiñi da' qoỹipagaqchíichiỹi da' ỹátaqta l'onataxanaxac. 9Qá'a sóxote qoỹaỹáteeta da' qaỹa 'te ga' qoỹidó'oc na' naqátaxacpi da' nimit ga' siỹaxaua da' ỹátaqta nó'in lasoxoc. Na'chigáta ga' siỹaxaua 'me sa ỹ'e't naua' naqátaxaco, qataxa sa ỹalaq, qataxa qalhuaxaic, loico ló'o, sa ỹa'uo ñi' Dios nataq'en da' n'amaqténataxanaxac, qataxa ga' ỹalaat ga' let'a, 'uootaxa jaga' lat'e, 'uootaxa gamachaqaiga siỹaxaua. 10Na' naqátaxacpi nimit ga' siỹaxaua da' nichíua'te' jaga' ỹauo, 'uootaxa ga' siỹaxaua laqáỹa, nataq'en da' decachíỹa ga' laqáỹa, nataq'en da' qovínaxanaxaic, 'uootaxa da' ỹ'axat ga' 'enapéga lasoxoc, qaláxasa 'chi doqovínaxan. Na' naqátaxacpi nataq'en ỹivíd'a da' nimit ỹima na' sa ỹalaxaguet da' napaxaguenataxanaxac 'me nó'in. 11Dójo' napaxaguenataxanaxac 'me nó'in ỹátaqta nateet'eguet da' n'aqtac 'me chiỹaqaỹi da' nec'alaxa 'me qaỹa 'te 'ená'am da' l'ónaxac. Da'me chiỹoqot'ot ñi' Dios 'me huet'ot da' naỹamaxac. Da'me jaỹim qoỹipataxalégue da'me s'axáteegue.
So' Pablo ỹanot da' netónaxac ñi' Dios ỹasouaxat da' lichoxodénataxanaxac
12Sanot da' ñitónaxac ñi' qadesaliaxanec Jesucristo 'me jaỹim ỹanem josii'chi da' ỹ'añaxac da' selo'ogue dójo', qá'a ñi'me sa lec'óxotolec da' lepé'e qa'en jaỹim, qataxa jaỹim ỹipataxalégue da' l'onataxanaxac. 13Qaa'le ñi'me jaỹim ỹ'étec dójo', temaqaidi da'me so' nolo' laqáỹa ỹátaqta sa ỹiỹamadídiñi naua' senapegalo ỹitaxaỹaxaco da' sa siỹamaxatac, qataxa ñaqalegaxáatac, qataxa ỹisouenec. Qaláxasa ñi'me Dios ỹátaqta jaỹim ỹichoxoden, qá'a maliaxása da' sa s'amaqten so' Jesús, qataxa ỹátaqta sa saỹáten da' s'étetac. 14Chan'eesa jaỹim ỹanem da' liỹálaqtaxanaxac ỹátaqta sa lec'óxotolec, nataq'en da' nip'iỹáxac, nataq'en da' nesóxodic 'me ỹima qo'mi qoỹanema, ỹasouaxat da' soqotaqáta'uo so' Cristo Jesús.
15Dójo' ỹátaqta 'eesa, sa 'te taa'le qoỹoqolguet, qá'a so' Cristo Jesús nenóchi'ña jen' 'aléua da' nec'alaxatéegue na' siỹaxadipi loico ló'olpi. Qana'chi jaỹim 'me ỹágueegue da' jaỹim loico ló'o. 16Qaláxasa na'chi 'ená'am ñi' Dios jaỹim ỹichoxoden, qá'a ñi'me sétaaque jaỹim le'uáuaxanaxanec da' jaỹim d'onataxana qa'en so' Jesucristo da' ỹaloxóna na' siỹaxadipi da' neuálaxainaxac let'ádaic. Qá'a sétaaque da' jaỹim naloqtenaxanaxat, qaidi ga' siỹaxaua ỹ'amaqten so' Jesús, qana'chi taỹot da' nec'alaxa 'me qaỹa 'te loiquiaqa'. 17Chan'eesa naỹi na'chi 'eeta't da' si'ỹoxodenaqtac ñi' qadet'a Dios, 'me qaỹa 'te ga' loiquiaqa', qataxa sa ỹileu, qataxa sa qoỹilá'a. Ñi'me qantamnaxala' 'me qaỹa 'te ga' 'ená'am, qataxa ỹátenataxanaxaic. Já'a, na'chi 'éeta da'me dójo'.
18'Am ỹalec Timoteo, 'am sanem da' ỹaqátaxac, qá'a sétaaque da' 'oquetalégue da' 'auloctapeelégue da' 'ad'onataxanaxac, qaláxasa naldáta da' 'adip'iỹáxac, qataxa da' 'adauel 'me ỹiỹamqáchiiñi. 'Aupaqueteloo'to' qomle naua' 'an'aqtagueco 'me chiỹaqaavlo ca'li naua' letaxaỹáxanaxanqa ñi' Dios. 19Qá'a sóxote 'uo na' ỹisamaxatáiỹi, cá'ai da' lip'iỹáxac, ỹasouaxat da' sa ỹalaxalégue da' lauel 'me ỹiỹamqáchiiñi. 20Qana'chi 'éeta da' huédapiỹi saua' Himeneo qataxa so' Alejandro. Chan'eesa saa'me samáxagueta so' qadó'o Satanás, qaidi sa 'te 'éetr'ac da' quetralégue da' sa ỹodiáquedaac ñi' Dios.
Currently Selected:
1 Timoteo 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.