Kli Smalkanka 1
1
Tâ krikanka bîla nani ba
1Naha bîla nani sika Moses bui Israel luhpia nani sut ra aisin ba witin nani ba upla iwras tasbaya ra impaki ba piua ra, Jordan awala lalmika tani ra, Suf mawanra bara naha tawanka nani bilka ra: Parán, Tófel, Labán, Haserot bara Dizahab. 2Horeb ilka ba wina, Cadés-barnea ra waia yu 11 wapi kan, Seír ilka ra waia yabalka bâk. 3-4Idsip wina takan ba wina 40 mani alkan kan, baha yua ba kati 11 yua pas ba aimakan ba ra, Sihón, amorreo nani kingka, Hesbón ra iwi kan ba,#Kul K 21.21-30. Og sin Basán kingka Astarot ra iwi kan ba#Kul K 21.31-35. Edrei tasbaya ra, witin baha nani wal aiklabi pura luan ba ningkara, 5Israel luhpia nani ba Moab kuntrika ra Jordan awala lalma tani ra bâra kan ba piua ra, Moses bui witin nani ra naha diara nani daukaia win:
6“Dawan wan Gâdka bui Horeb ra naha wan win: ‘Man nani pat piu wihka naha ilka ra takaskisma. 7Dukiam nani sut wahbi lamam ra brih amorreo nani tasbaya ra, il nani tilara man nani was: Arabá ra, il nani tilara, twi langnika ra, Négueb ra, kabu un ra, Kenan uplika nani kuntrika ra, Líbano ra bara kau kainara Éufrates awala tara ba kat. 8Yang bui tasba ba man nani mihtam ra mangkri sa; man nani was bara tasbaya ba brih iws. Kan yang bui Dawan ra swer taki yabaia aisari, man nani damikam Ebraham, Aisak, Jekob bara ai kiamka nani ra sin.’
Wihta nani mangkan ba
(Imp St 18.13-27)
9“Baha pali piua ra yang bui man nani ra mai wîri: ‘Yang yakan sip apia sni, man nani sut wirhikam ba twilki kaia. 10Dawan Gâdkam, luhpa nani ailal pali maikan, nanara man nani upla ailal pali sma, slilma ailalka nani baku. 11Damikam nani Dawanka, Gâd mita man nani ra aima tausin ailal ai yamnika nani kau maikbia, bara kau ailal sahwi kama, witin bui man nani ra mai win ba baku. 12Ban sakuna, yang yakan sip apia sna, man nani wirhikam tara ba, trabilkam nani, unsabankam nani ba sut wapni daukaia. 13Bahamna man nani, kiamkam kumi bani tilam wina waitna sinskira nani, âuya mâira, pat diara dauki tânka brin nani ba pliki sâks, bara yang bui witin nani ba man nani tâmra kaia mangkamni.’#Kul K 11.14-17.
14“Bara man nani pana ai wiram: ‘Yang nani maipa ra pain sa man lukisma ba.’
15“Bamna man nani kiamkam tila wina waitna kau sinskira nani ba, bara pat wark dauki tânka bri nani sakram ba, yang bui witin nani ra karnika yabri, man nani puramra tâmra kaia. Tila nani ba, upla 1,000 tâ briaia yabri, wala nani 100 upla tâ briaia, wala ra 50 upla tâura kaia, bara wala nani ba upla matawalsip tâ briaia, baku sin kau wala nani ba kiamka 12 nani ra tâ briaia mangkri. 16Baku sin, yang, man wihtkam nani ra smalkri nahki wark dauki kaia: ‘Upla sut wal aisaia bara lâka nani ba wapni daukaia, ai tasbaya luhpia nani lâka ba, tringsar nani lâka sin. 17Upla lâka aisi daukisma ba ra, uplika ba mawan aihka kulkpara, kulkanka sirpi bri uplika ba, kulkanka tara bri uplika lâka ba wal baku daukaia. Upla kumi sibrinka sin briaia apia, kan lâ daukaia ba Gâd warkka sa. Sakuna lâ kum man nani daukaia karna kabia kaka, baha lika yang ra laks, bara yang daukamna.’
18“Baha mai smalkatna ba piua ra, yang sin mai wîri wark wala nani ba sin sut, man nani nahki dauki kaia sma ba.
Kenan tawanka ba biki kaikaia upla 12 blikan ba
(Kul K 13.1—14.4)
19“Yawan Horeb wina takan ba wina amorreo nani ilka nani ra impakan, Dawan Gâd adar wankan ba bîla wali dauki. Baha upla iwras tasbaya tara, sibrinkira pali man nani kaikram yaba, yawan sut bâk wataukan, Cadés-barnea ra balan ba kat. 20Bahara yang bui man nani ra mai wîri: ‘Yawan amorreo nani ilka nani ra pat balan sa, Dawan wan Gâdka wina yawan ra wankan ba. 21Dawan, man nani Gâdkam, naha tasbaya maikisa. Bara naha wina kainamra tasbaya ba, Dawan, man nani Gâdkam damikam nani ra win ba baku, man nani brih iwma. Bamna man nani si bripara dring sin prui banhpara. 22Sakuna man nani bal ai wiram: ‘Kanra yamni sa, wan tila wina upla nani saki blîkka witin nani mita kuntrika ba kaikaia; bara ningkara bal wan wibia, ani yabalka ba yang nani alkaia sna, bara ani tawanka bâk yang nani dimaia sip sna ba.’
23“Yang maipara man lukankam mangkram ba pain kata, man nani tilam wina, 12 tâ upla nani wahbi sakri, kiamka bani wina kumi. 24Bara witin nani il nani tila bâk wapan, bara Escol tasbaya langnika kat wan, baha wina baha tasbaya aiska ra wan. 25Bara baha tasba wina dus mâ nani sakan ba, yang nani ra bri balan, tasbaya tânka sin wan win: ‘Dawan Gâd yawan ra tasba wankuya tasbaya ba painkira sa.’ 26Kuna man nani waia want apia kapram, Dawan wan Gâdka man nani ra adar maikan kata ba bîla lulkram.#Kli S 9.23; Hib 3.16. 27Bara man nani tintkam watla ra brukwi aisaram: ‘Dawan ba wan wantka apia sa; Idsip wina wan saki amorreo nani mihta ra wan mangkan, âpu wan daukbia dukiara. 28¿Nanara, yawan na anira waia? Wan tasbaya luhpia nani wan wisa baha tasbaya ra waitna kau karnakira nani bâra sa, witin nani sin kau yari yawan wal; tasbaya nani kir ba tawan tara nani bâra sa, baha sin purara pali kutban sa. Upla nani yari tara Anac kiamka ba sin kaikan bâra sa. Bara baha sut mita yawan sibrin wan kupia lap tiwan.’
29“Baku kan ba ra, yang pana man nani ra mai wîri: ‘Man nani bin daukpara, man nani sin si bripara. 30Dawan Gâdkam man nani kainamra wapisa, bara tâmwan sin aiklabia. Man nani kaikram witin Idsip ra nahki daukan ba 31bara upla iwras tasbaya ra sin daukan ba.#Ap St 13.17-18. Dawan Gâd ai klahkla ra mai alki mai bri taukan yabalkam aiska ra, naha tasbaya ra balram ba kat, aisa kumi ai luhpia ai klahkla ra alki buki bri ba baku.’ 32Ban sakuna, man nani lika Dawan Gâdkam ra kasak lukras kapram,#Hib 3.19. 33witin sika man nani kainamra wapi kan, man nani anira takaskaia pliska ba saki maikaia dukiara. Tihmia ra pauta klauhan playka yabalkam ra mangkan, man nani baha nina blikram, bara kakna ra lika kasbrika playka ni yabal mamrikan.
Dawan ba Israel luhpia nani ra ai kupia sauhkan
(Kul K 14.20-35)
34“Man nani brukwisma ba Dawan walan, witin kasak ai kupia sauhki naku swer taki aisin: 35‘Naha kiamka saura tila wina, upla kumi sin ai damika nani ra yabaia wîri ba tasbaya ba kaikbia apia.#Hib 3.18. 36Yang daukamna, Caleb, Jefuné luhpia waitna ba baman, bâk sakamna. Witin lika baha kaikbia, bara witin ra, ai kiamka ra sin; baha tasbaya ra witin nani ba ai mina taibi taukaia yabamna, kan witin kasak lâka ra Dawan nina blikan bamna.’
37“Kan man nani pâtkam tâwan, Dawan ba yang ra ai kupia sauhki, ai win: ‘Man sin baha tasbaya ra dimma apia. 38Man wamtlika ra Jasua, Nun luhpia waitna ba dimbia. Tâ baiks, witin tasba ba Israel luhpia nani ra yabia. 39Âu, man nani baku kasak lukram, waihlam nani ba mita luhpiam nani yaptika aikuki iki tikbia; baha tuktika nani ai tânka briras nani ba baha nani tasbaya ra dimbia ba witin nani ra ai tasbaya briaia yabamna. 40Bamna man nani upla iwras tasbaya ra kli tawi was. Man nani kli Kabu Pauni ra was.’
Waihla nani mita Israel ra pura luan
(Kul K 14.39-45)
41“Sakuna man nani pana ai wiram: ‘Yang nani Dawan mapara saura daukri, ban sakuna nanara yang nani wamna aiklabaia Dawan wan Gâdka wan blikan kat daukaia.’ Bara aiklabaia dukia nani ba briram, bara lukram karna mai munbia apia il ra ulaia ba. 42Sakuna Dawan bui ai win, man nani ra maisam pakamna: ‘Man nani aiklabaia wama apia, man nani ra waihlam nani mita puram luaia apia dukiara, kan yang lika man nani wal apia sna bamna.’
43“Yang bui man nani ra mai wîri ba man nani bîli walras kapram, Dawan ai adarka nani maikan ba mapara buram, bara sip kama luki il nani tasbaya ra uli waram. 44Sakuna amorreo nani baha ilka nani ra iwi kan ba, ulu watla baikan baku man nani wal prawaia bal takan, bara ninam bliki rau mai sauhki kan Seír wina Hormá kat. 45Man nani kli tawi balram bara Dawan mawanra inram, sakuna inankam ba witin walras kan. 46Baha tâka mita man nani piua wihka Cadés tasbaya ra iwi kapram.
Currently Selected:
Kli Smalkanka 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua