Apastil Nani Sturka 1
1
Spirit Holikira pramiska ba
1Kulkanka tara brisma Teófilo:#Lk 1.1-4. wauhtaya pas mai ulbatna ra, yang ulbri kata Jisas dîa daukan, dîa sin smalkan ba, tâ wina 2ban kasbrika purara uli wan ba kat. Ai apastilka nani wahbi saki Spirit Holikira bâk smalkan, dîa pali sika witin nani daukaia kan ba. 3Jisas pruan wina buan ningkara, yu 40 witin apastil nani ra ai wîna param taki kan. Sain nani wal mariki kata nahki witin ba raya sa, bara Gâd king aimaki ba lâka dukiara sin aisi kan.
4Witin kau apastil nani wal aikuki asla iwi kan piua ra, baha nani ra naku win:
—Man nani Jerusalem wina taki anira wapara. Aisa mita ai Spiritka yaia pramis aisin dukiara yang mai wisatna ba,#Lk 24.49. bîla kaiki bas. 5Kasak mai wisni: Jan lika upla ra lî ni baman tahbi dauki kan, ban sakuna, kainamra kau yu kulki man sa, man nani lika Spirit Holikira ni tahbi mai daukan kabia.#Mt 3.11; Mk 1.8; Lk 3.16; Jn 1.33.
Jisas kasbrika purara uli wan
6Apastil nani ba kau Jisas ai tilara bri kan ba ra, witin nani makabi walan:
—¿Naha piua pali ra man bui Israel luhpia nani ra king lâka ba kli yabaisma ki?
7Bara Jisas pana baha nani ra win:
—Man nani ra maikras sa ahkia, apia kaka dîa piua kabia Aisa mita diara nani daukaia luki ba tânka pliki kaikaia, kan witin baman sika baha diara nani daukaia karnika brisa. 8Sakuna man nani puramra Spirit Holikira balbia ba ra karnika brima, bara yang dukira witnis nani kama Jerusalem ra, Judia tawanka aiska ra, Sameria ra, ban wan tasba wala ra kau laihura ba kat sin.#Mt 28.19; Mk 16.15; Lk 24.47-48.
9Diara nani aisaia bri kan ba sut aisan ba ra, apastil nani mawan wina Jisas ba mahka kasbrika purara uli wan; kasbrika kum bâk brih dimi tiwan, bara witin nani bui Jisas ba kli sip kaikras kata.#Mk 16.19; Lk 24.50-51. 10Witin nani kasbrika purara ai nakra buki kaiki kan, Jisas uli auya kan ba ra, baha piua ra waitna wâl kwala pihni dimi witin nani lamara bal takan. 11Baha nani bila:
—Galili waitnika nani, ¿dîa kan man nani kasbrika purara kat ban kaikisma? Baha Jisaska man nani tilam wina kasbrika purara uli wan kaikram ba, baha natka kat witin kli balbia.
Judas watlika ra Matías sakan
12Bara apastil nani sut Olivet ilka ba wina kli Jerusalem ra tawi balan. Baha ilka ba Jerusalem wal baila pali kata, baha prais sika ris yua ra#Ris yua: naha sika ris yua ba. wapaia aitani kulkan ba. 13Witin nani Jerusalem ra balan ba ra, utla kum purara rum kum ra uli wih dimi takaskan. Witin nani aikuki bâra kan ba sika, Pita, Jan, Jems, Andru, Pilip, Tamas, Bartolomiu, Matiu, Alfeo luhpia Jems ba, Saiman karna Mamunra ba, bara Jems luhpia Judas ba sin.#Mt 10.2-4; Mk 3.16-19; Lk 6.14-16. 14Piua bani witin nani sut, Jisas muihnika nani aikuki asla taki kan ai pura sunaia. Witin nani ai tilara Jisas yaptika Meri bara mairin wala nani sin bâra kata.
15Baha yua nani kum ra, Pita lika wan muihni nani lilapas kat buan. Upla nani asla bâra kan ba lika 120 baku kan. Witin bila baha nani ra: 16“Muihki nani, piua ba baku aimakaia kan, piua luan Ulbanka nani ra aisi ba kat, nahki Spirit Holikira Debit bâk aisin ba Judas dukiara. Witin sika Jisas priski silak ra brih waia uplika nani tâ brin ba. 17Judas sin wan daknika na tilara kulkan kata, baha purkara witin sin naha warkka na daukaia bri kan. 18Sakuna ai saurka mana aibapan lalahka ba ni, witin wih tasba kum atkan, ningkara witin ai lal tani tasba ra kauhan, bara ai biara nani sut baiwi latara takan. 19Naha sturka na Jerusalem ra iwi uplika nani walan ba ra, baha tasbaya ba nina witin nani ai bîla ra Acéldama mâkan, baha tânka lika: ‘Tala Tasbaya.’#Mt 27.3-8. 20Pura Sunra Lawana Nani wauhkataya ra naku wisa:
‘Ai watla ba bîla upla iwras tasbaya baku swin kabia,
upla kumi sin baha ra dimbia apia.’#Law 69.25.
Baha purkara:
‘Witin wark takaia kan ba upla wala ni bribia.’#Law 109.8.
21“Bara yawan nahara upla brisa, witin nani sin yawan aikuki ban sa, Dawan Jisas wan tilara kan ba piua wina, 22Jan tahbi daukata ba wina#Mt 3.16; Mk 1.9; Lk 3.21. ban Jisas kasbrika purara uli wan piua ba kat.#Mk 16.19; Lk 24.51. Bara aitani kabia witin nani ba wina kum wan tilara briaia, Jisas raiti wina buan ba dukiara witniska kaia.”
23Bara baha waitna nani ai tilara kan ba wina wâl sakan: Josep, Barsabás mâki ba, nina wala Justo wi ba, bara Matías sin. 24Witin nani baha dukiara naku ai pura sunan: “Dawan, man baman sika upla nani kupia tânka kaikisma ba; wan mariks naha waitna wâl na wina, ani pali ba man bâk sakram 25apastil warkka ra aimakaia, kan Judas lika baha warkka ba swi si tanis tiwan sa, witin waia kan pliska ra wan bamna.”
26Witin nani lat ba lulkan, bara baha ba Matías ra kauhan, bamna baha piua wina Matías lika apastil nani tilara kulkan kan.
Currently Selected:
Apastil Nani Sturka 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua