Mmaci ma Ibrahim 3
3
Yesu laꞌa ta̱ Musa
1Ama a̱ va̱, A̱sula̱ a ɗangwa ɗu ta̱ yo oꞌwo ama a akiza a̱ yi. Adama o ndolo i yuwusan majiyan cine Yesu ri aajiya a̱ A̱sula̱, waru a̱yi ɗa aabara a nan ganu vu ucawu wo okolo a̱ tsu. 2U yuwan ta̱ a̱ɓula̱ e ili i na A̱sula̱ a ɗangwa niyi u yuwan suru, cine Musa yuwain a̱ɓula̱ e ili i na A̱sula̱ a damma niyi u yuwan suru, a̱tsuma̱ a tsugbain tsa̱ yi va aza a Israꞌila.#3:2 Na̱ Tsuheleni idanshi “Uꞌwa wa̱ A̱sula̱” urevu wa̱ yi u ɗa “Aza a Israꞌila.” 3Yesu tsura̱ ta̱ tsugbain tsa na tsa laꞌai za va Musa, cine suwi tsu tsura̱ tsugbain tsa na tsa laꞌai usaa u na u yuwain. 4Amayun a ɗa ozo o ro ɗa a suwai ꞌwaꞌa suru, amma A̱sula̱ a ɗa suwi vi ili suru. 5A̱sula̱ a lyawa ta̱ uꞌwa wa̱ yi e ekere a Musa, adama a na Musa aagbashi a̱ a̱ɓula̱ a ɗa a na a zuwaa ucira, waru iroci i ɗa i na A̱sula̱ oo roco elime. 6Zamawawa† gba waru Mawun ma̱ A̱sula̱ ma ɗa, a̱yi ɗa za na A̱sula̱ a lyawayi uꞌwa wa̱ yi. A̱tsu ɗa uꞌwa wa̱ yi na̱ tsu lyuwa elime na̱ ma̱tsura̱ mo okolo ugbamu, waru na̱ tsu zuwa ucira o uzuwu wo okolo a̱ tsu ya̱ꞌa̱ yi.
Tsu ꞌyuwan tsu ciga tsu lyuwai elime ni itoni ya̱ A̱sula̱
7U ta̱ cine Ruhu va Akiza dammai,
“Na̱ yu uwwa uɗyo wa̱ A̱sula̱ anaꞌan,
8she i da̱na̱ na aciyogbamu
cine nkaya n ɗu n da̱na̱i wan,
ana a vadalayi A̱sula̱ ucina̱,
a mantsa ma na a̱ lyungwa̱i A̱sula̱ o ogozo.
9A̱sula̱ a damma ta̱,
‘Reve a̱ lyungwa̱ mu,
adama e ene ili i na maa yuwan,
ko na wo oꞌwoi e ene ta̱ ili i na n yuwain
a̱tsuma̱ a aꞌwan amunga.
10Adama o ndolo n yuwan ta̱ upan ne ele lon,
reve n damma:
“Okolo e le a̱ tsu da̱na̱ ta̱ alanga na̱ a̱mu.
Waru a ꞌyuwan ta̱ a yuwan ili i na n damma nle a yuwan.”
11N yuwan ta̱ upan reve n kucinaa le,
“Aa uwa uba̱ta̱ u wivuwun u va̱ shi, ko keꞌen.” ’ ” #Ica 95:7-11.
12Ama a̱ va̱, i yuwan ugbozu adama she za ta̱ ɗu da̱na̱ no okolo e iwuya, a na waa ꞌyasan ɗu a ca okolo wan. Icuꞌun yo okolo o ndolo a tsu vadala ɗu ta̱ diga uba̱ta̱ wa̱ A̱sula̱ a wuma.
13I da̱shila̱i okolo ugbamu urana suru. Waru i lyuwa elime na̱ mayan ne n de nu urana wu lo. Ni i yuwan ne shi, unusu u ta̱ pusa̱a̱n ozo o ro a̱ ɗu a na e reme a zuwa le a̱tsuma̱ a aza a aciyogbamu. 14A̱tsu tsu to oɓolo na̱ Kristi Zamawawa na̱ tsu lyuwa elime hali a̱ tyo o ukosu nu ucawu wo okolo o ugbamu u na tsu ri na̱ a̱yi diga o ufaru. 15Adanshi A̱sula̱ a damma ta̱,
“Na̱ yu uwwa uɗyo wa̱ A̱sula̱ anaꞌan,
she i da̱na̱ na aciyogbamu,
cine nkaya n ɗu n da̱na̱i wan
ana a vadalayi A̱sula̱ ucina̱.”
16Nan zane ɗa a uwwai uɗyo wa̱ A̱sula̱ꞌa̱ reve a yuwaan yi aciyogbamu? Ele ɗa aza a na Musa uta̱yi a̱tsuma̱ a Masar suru. 17Nan zane ɗa waru A̱sula̱ a yuwain upan ne ele a̱tsuma̱ a aꞌwan amunga? Ele ɗa aza a na a yuwain unusu, aza a na a̱ kuwa̱i a̱tsuma̱ o ogozo. 18Waru nan zane ɗa A̱sula̱ a yuwusain adanshi ana u kucinai na aa uwa uba̱ta̱ u wivuwun wa̱ yi shi? Aza a na a ꞌyuwain a yuwaan yi tsutoni ɗa. 19Tsu ta̱wa̱ ta̱ tsu reve a na aa gura uwa uba̱ta̱ u wivuwuꞌun shi, adama a na a ꞌyuwan ta̱ a̱ usu.
Currently Selected:
Mmaci ma Ibrahim 3: tswNT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.