2 Timoti 2
2
Soja va̱ a̱ɓula̱ e Yesu Zamawawa
1Gogo mawun ma va̱, vu da̱na̱ no okolo ugbamu e isaꞌani ya̱ Yesu Zamawawa. 2Vu uwwa ta̱ ikaka i va̱, waru ama na̱ a̱bunda̱ a̱ usu ta̱ ikakaꞌa. Gogo, vu ca ama a na a gura soɗuwo ma̱tsa̱n ikakaꞌa adama o rito ozo o ro. 3Vu ɓolo aci na̱ a̱mu a̱tsuma̱ a̱ a̱tsuma̱lima̱ a na moo sowuso, ne ɗa voo oꞌwo soja va̱ a̱ɓula̱ va̱ Yesu Zamawawa. 4Nna̱ za ro aa yuwusan ulinga u soja, u tsu yuwisan ulinga u ro shi. Ne ɗa u tsu yoꞌonoto zagbain va̱ yi okolo. 5Nna̱ za ro uwa alaꞌanlai o uro wi ilaɗi, waa lyuwa aci a alaꞌanlaiꞌi shi, she nu u kuru wila̱ wa alaꞌanlai e ilaɗiꞌi. 6Cimbi na gasai ujuvu cacawu mejege a̱yi ɗa waa fara lyuwa ili i na u cuꞌwa̱in. 7Vu yuwan majiyan me ili i na maa dansa. A̱sulazuva a ta kamba wu vu reve ili i nda.
8A mantsa suru vu cuwan na̱ Yesu Zamawawa. A matsan yi ta̱ diga o ugundo u Mogono Da̱wuda waru a̱ ꞌya̱sa̱n yi ta̱ diga o ukwa̱. A̱yi ɗa Alabari a Saꞌani a na maa yuwusan alajiya. 9Waru adama a na maa dansa Alabari a Saꞌani a nda, a̱yi ɗa i zuwai moo sowuso a̱tsuma̱lima̱ a̱vu a̱ nla̱ mu na akani vadamma za vu unusu. Amma aa gura zuwaa adanshi a̱ A̱sula̱ akani shi. 10N tu ufoɓu n sowo cuꞌun va̱ a̱tsuma̱lima̱ suru, nnu u ta̱ ta̱wa̱a̱ ni iwawi uba̱ta̱ wa ama a na A̱sula̱ a ɗangwai o oꞌwo a̱za̱ a̱ yi, a̱vu waru a̱ tsura̱ tsugbain tsa babu ukotu e ekere e Yesu Zamawawa.
11Adanshi a nda amayun a ɗa:
Nna̱ tsu kuwa̱ oɓolo na̱ a̱yi,
tsu ta yuwan wuma waru oɓolo na̱ a̱yi.
12Nna̱ tsu kaɓa asuvu na̱ a̱tsuma̱lima̱,
tsu ta yuwan tsugono oɓolo na̱ a̱yi.
Nna̱ tsu wasan yi,
a̱yi fo u ta wasan tsu.
13Nna̱ tsu ri na̱ a̱ɓula̱ shi,
a̱yi u ta̱ na̱ a̱ɓula̱,
adama a na a̱yi waa wasan aciya̱yi shi.
Lingi na o soɗuwoyi ma̱tsa̱n
14Vu cuwaan za suru ili i nda, waru vu rono le atsuvu a̱tsuma̱ a ala a̱ A̱sula̱ a lyawa a yuwusan nla̱ngi adama a adanshi a nda na adanshi a̱ ndeɗe. Cuꞌun mawasan mo ndolo ma̱ ri nu urana shi, waru u ta varu aza a na a uwwa nle. 15Vu yuwan ulinga babu uro adama A̱sula̱ o soɗuwo wu ma̱tsa̱n. Vo oꞌwo lingi saꞌani, za na a uwwa wono shi, waru za na aa gura ca ucuɗuwu wa adanshi a amayun. 16Vu suma mayan ma adanshi a vanvama a na a̱ tsu ta̱wa̱a̱ A̱sula̱ na̱ tsugbain shi. Ili i ndolo i tsu zuwa ta̱ ama a̱ kuɗa̱ ca A̱sula̱ tsugbain. 17Icuꞌun ya adanshi a nda a tsu baza ta̱ vadamma mɓa̱la̱ mu ɗoɗi. Hamanaya na̱ Filita ele ɗa iroci ya ama a na aa yuwusan adanshi a nda. 18Ama a nda a lyawa ta̱ ure wa amayun, reve a̱ ka̱ra̱ a dansa a na A̱sula̱ a̱ ꞌya̱sa̱n tsu ta̱ ɗe a̱za̱ e Itoni a̱tsuma̱ a̱ a̱kwa̱kwa̱, ne ɗa a̱ lungusa̱i ucawu wo okolo a ama o ro. 19Amma amayun a̱ A̱sula̱ a̱ ta̱ lo vadamma ikyun yu usaa i na a varai na aatali a̱vu e sheꞌen ɗe udammu u nda: “A̱sulazuva e reve ta̱ aza a na a̱ ri a̱za̱ a̱ yi,” waru “Aza a na a adansa a̱za̱ a̱ A̱sulazuva a ɗa a̱ ri, a suma mayan me ili i wuya suru.”
20O uꞌwa wu utsuru, itana i na a yuwain na̱ zinariya na̱ azurufa ɗa ri pe goon shi, amma itana i ro gba shi a yuwan le ta̱ na̱ ɗanga no oloꞌo. A mantsa ma̱ a̱buki ma ɗa a tsu yuwan ulinga ni itana yi ikebe, aza a babu ikebe gba shi adama o ulinga wa anaꞌan na̱ nfaꞌan. 21Na̱ vu ka̱mba̱to ili yu uwuyanu i wuma wa̱ wu cece, vu to oꞌwo tana na A̱sula̱ aa yuwan na̱ a̱yi ili i na u cigai. Wuma wa̱ wu u ta̱ da̱na̱ cece, waru vu ta̱ da̱na̱ ufoɓu u na Zavuꞌwa aa yuwan ulinga na̱ a̱vu a̱tsuma̱ o ulinga u saꞌani suru.
22Vu suma icigi yi iwuya i tsumuwun suru na ya̱ ta̱wa̱a̱ na̱ ma̱riya̱a̱. Amma vu toni ili suru i na yaa zuwa wu vu yuwan ili i na i ri mejege. Vu zami ucawu wo okolo, ni icigi, na asuvu nden, waru vu uwwa uyoꞌo wu mmalu oɓolo na aza a na ee ɗesu ala a̱ A̱sulazuva na asuvu a̱ ta̱. 23Waru, n ta dansaa wu, she vo oto aciya̱wu a̱tsuma̱ a mawasan ma adanshi o tsulo wan, waru vu ɓolo aciya̱wu na aza a na e revei ili shi wan. Ili i nda i tsu sato ta̱ ama nla̱ngi. 24Agbashi a̱ A̱sulazuva a ciga a ꞌyuwan a yuwan mawasan wan, amma e ene iliyali ya ama suru. Waru a gura rito ozo o ro mejege, waru a yuwan ankuri na ama a na a̱ ri usa̱n wu nden. 25O rito aza a na a wasain amayun na ankuri. Ko A̱sula̱ a ta vadala okolo e le, reve a̱ ushi amayun. 26Hali ama o ndolo a fara majiyan ma saꞌani a̱vu a̱ fa̱tsa̱ diga a maza me Mekerenkesu. Adama a na hali n gogo Mekerenkesu ma̱ guza̱ le ta̱ agbashi, adama u zuwa le a yuwan ili i na u cigai suru.
Currently Selected:
2 Timoti 2: tswNT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.