Kagali ka Ibirahi 1
1
Yesu Kawauwi Maku ma Kashila̱ ma
1Caupa, Kashila̱ ka tsu dansa ta̱ na̱ nkoshi n cau n tsunu a una̱ u ntsumate a ure kau‑kau. 2Shegai gogo‑na aꞌayin a makorishi a na, Kashila̱ ka tsu yanka tsu ta̱ kadyanshi a una̱ u Maku ma ne. Kashila̱ ka yan ta̱ likimba n gba̱ ili iꞌya iꞌa̱ri pini a asuvu a ne a asu u Maku ma ne. Aya Kashila̱ ka ɗanga̱sai u woko uza u ili gba̱. 3Maku mi u laɗa ta̱ adama a tsupige tsu Kashila̱, kpam u rotso ta̱ Kashila̱ ki derere. U tsu zuwa ta̱ ko ndya wa i lyai kelime adama a akani u ne a ucira. An Maku mi ma zuwai ama a wokoi sarara a asuvu a unyushi u cingi u le, aku u dusuki a kukere ku ulyaki ku Kashila̱ Uza u Ucira Gba̱ a zuba.
Kawauwi ka la ta̱ atsumate a zuba
4Maku mi ma la ta̱ atsumate a zuba cika, Kashila̱ kpam ka na̱ka̱ yi kala ka ka lai a le cika.
5Kpaci Kashila̱ ka tonuko atsumate a zuba ili iꞌya u tonukoi Maku mi wa,
“Aɗa Maku ma va̱.
Ara n woko ɗe Tata u vunu.” #Ishp. 2:7.
U doku ta̱ dem u danai,
“Ma woko ta̱ Tata u ne,
eyi kpam wa woko ta̱ Maku ma va̱.” #2 Sam. 7:14.
6Kpam aꞌayin a ɗa Kashila̱ ka ciga ka suku maku ma kapala ma ne a likimba, u dana ta̱,
“U ka̱na̱ ta̱ gba̱ atsumate a zuba a lyaka yi kayala.” #U.Ml. 32:43.
7Ili iꞌya Kashila̱ ka danai a kaci ka atsumate a zuba iꞌya na,
“N zuwa ta̱ atsumate a zuba a va̱ a woko tyoku u uwule.
N zuwa ta̱ agbashi a va̱ a woko tyoku u aletsu a akina.” #Ishp. 104:4.
8Shegai Kashila̱ ka tonuko ta̱ Maku mi,
“Avu Kashila̱ ka, kpam tsugono tsu vunu tsa rongo ta̱ hal ubana.
Kalangu ka tsugono ka vunu ka afada a maci ka.
9Va ciga ta̱ ili iꞌya i lobonoi,
kpam va kovo ili i cingi.
Ɗa gai i zuwai Kashila̱, Kashila̱ ka vunu, u ɗanga̱sa vu vi,
kpam u na̱ka̱ vu tsupige tsa tsa zuwusa vu maza̱nga̱.
Tsupige tsu na tsu la ta̱ tsa u na̱ka̱i aza ɗa a buwai.” #Ishp. 45:6-7.
10U dana ta̱ kpam,
“Asheku, a kagita̱ vu yan ta̱ likimba,
kpam akere a vunu a yain zuba.
11Aꞌayin aꞌa̱ ta̱ a utuwa̱ a ɗa ko uza bawu wa doku wa wene iꞌya,
shegai avu va rongo ta̱ pini.
Gba̱ a ka kutsa ta̱ tyoku ɗa kunya ku tsu kotso.
12Va ka̱ta̱la̱ le ta̱ tyoku u kunya ku wambana.
A ka savaɗa ta̱ tyoku u kunya ku cau.
Shegai avu va rongo ta̱ tyoku ɗa va̱ri,
kpam uma u vunu wa kotso wa.” #Ishp. 102:25-27.
13Kashila̱ ka tonuko ko katsumate ka zuba ka te ili iꞌya u tonukoi Maku ma ne wa,
“Dusuku na a ulyaki u va̱,
hal she n zuwa atokulalu a vunu
a woko vu ili i utaɗanku aꞌene.” #Ishp. 110:1.
14Gba̱ atsumate a zuba aꞌulu a ɗa a ka gbashika Kashila̱ a ɗa, u tsu suku le ta̱ a woko aɓa̱ngi a aza ɗa a ka wusha iwauwi.
Currently Selected:
Kagali ka Ibirahi 1: kdlNT
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.