1. Mojsije 4
4
O Kain thaj o Avelj
1O Adam pašljilo pire romnjava e Evava, pa voj ačhili khamni thaj bijanda e Kaine.
E Eva askal phendas: “O GOSPOD pomognisarda manđe thaj dobisardem muško čhave!”
2Pale godova voj bijandas vi e Kainešće phrale e Avelje. O Avelj postanisarda pastiri, a o Kain zemljoradniko. 3Kana nakhli varesavi vrjama o Kain anda žrtva e GOSPODEŠĆE katar e plodurja e phuvjaće. 4A o Avelj anda majlačhe makhle kotora mas katar e životinje save prve bijandile ande lesko stado. O GOSPOD prihvatisarda e Avelje thaj lešći žrtva, 5ali e Kaine thaj lešći žrtva či prihvatisarda. Zato o Kain zurale holjajlo thaj lesko muj namrgodisajlo.
6O GOSPOD phučla e Kaine: “Sostar holjavos thaj sostar ćiro muj namrgodisajlo? 7Ako ćeres okova so si lačhe, zar či prihvativa tut? A ako či ćeres okova so si lačhe, o bezeh vrebol pe ćiro vudar, vo kamel te svladil tut, ali tu moraš te nadvladis les.”
8O Kain phendas pire phralešće e Avelješće: “Hajde džas avri ando polje.” Ali kana inkljistine avri ando polje, o Kain huklo pe piro phral po Avelj thaj mudarda les.
9Pale godova o GOSPOD phučlas e Kaine: “Kaj si ćiro phral o Avelj?”
O Kain phendas: “Či džanav. Zar sem me čuvari mungre phralesko?”
10Askal o GOSPOD phendas: “So godova ćerdan? Ake, o rat ćire phralesko andar e phuv čhol muj mande. 11Zato av prokleto thaj tradino katar e phuv, savi putardas piro muj te nakhavel o rat ćire phralesko katar ćire vas. 12Kana ćereja bući pe late, voj majbut či dela tut piro rodo. Aveja lutalica thaj begunco pe phuv.”
13O Kain phendas e GOSPODEŠĆE: “Mungri kazna si majbari nego so šaj inćarav. 14Ake ađes trades man katar akaja phuv thaj moraš te garadova katar ćiro muj. Avava lutalica thaj begunco pe phuv, thaj kogod araćhel man, mudarela man.”
15Ali o GOSPOD phendas: “Či avela gajda! Ako vareko mudarel e Kaine, aresela les efta drom majbari osveta!”
Thaj o GOSPOD čhuta po Kain znako, te či vareko mudarel les kana malavela les.
16Askal o Kain đelotar katar o GOSPOD thaj naselisajlo pe phuv Nod, istočno katar o Eden.
E Kainošće potomkurja
17O Kain pašljilo pire romnjasa thaj voj ačhili khamni thaj bijandas e Enohe. O Kain sagradisardas gav thaj dija les alav Enoh sago kaj bučhol lesko čhavo. 18E Enohešće bijandilo o Irad, e Iradešće bijandilo o Mehujael, e Mehujaelešće bijandilo o Metušael, a e Metušaelešće bijandilo o Lameh.
19E Lamehe sas duj romnja: jek akhardolas Ada, a aver Cila. 20E Ada bijandas e Javale, savo sas pradad okolengo save trajin tale šatorja thaj inćaren e stoka. 21Lesko phral akhardolas Juval a vo sas pradad okolengo save đilaben ande harfa thaj flauta. 22E Cila bijanda e Tubal-Kaine savo sas kovači thaj ćerelas alato katar o bakar thaj o sastri. E Tubal-Kainešći phen akhardolas Naama.
23O Lameh phendas pire romnjenđe:
“Ada thaj Cila, čhon kan mande,
romnjalen e Lamehešće, ašunen mungre alava.
Mudardem e manuše zato kaj ranisarda man,
e terne čhaves zato kaj dija man dab.
24Ako o Kain avela efta drom osvetime,
o Lameh avela eftavardeš thaj efta drom.”
O Sit thaj o Enoh
25O Adam palem pašljilo pire romnjava thaj voj bijandas čhaves. Dija les alav Sit thaj phendas: “O Del dija man aver čhaves umesto o Avelj, saves o Kain mudardas.”
26Thaj e Sitošće bijandilo čhavo thaj vo dija les alav Enos.
Ande godoja vrjama e manuša počnisardine te slavin e GOSPODESKO alav.
Currently Selected:
1. Mojsije 4: RČB
Highlight
Share
Copy
Want to have your highlights saved across all your devices? Sign up or sign in