Maruko 2
2
i Yēsu paka'inava kana mutuwalre'ap kuwaaleng na trau
(Matay 9.1-8; Luka 5.17-26)
1melavat lra za pidawariyan, i Yēsu marevelriyas ziya mukuwa i Kabēnum; mukalrazam lra za kazu i ruma' i intaw. 2kazuwan na trau muwazuwazuk, matemuy lra za trau i savak, arusay iniyan za lawang i sulray. i Yēsu a palalenak za vati kanazu mu, 3ulra a aapat 'emalu za sasa mutuwalre'ap kuwaaleng na trau zuwa kirepana'uwa kani Yēsu. 4'alrana kakazuwanan na trau, zi 'azi maruwa 'emalu kantaw mukuwa kani Yēsu i ngawayan nazu. kemazu zi kazu kanantu kinazuwan ni Yēsu na sa'uv i itras mivas za saya vuwang, zi na kuwaaleng na trau, pukasayaw kanantu kini'ezengan na lre'ap, papulusu. 5i Yēsu mena'u kananni na trau kanantu pakutatena'an, zi marengay kanizu na mutuwalre'ap kuwaaleng na trau: <<alrak a, mulapus lra nannu pinamelriyan.>>
6ulra a papida na sinsi kana Sēsiyo kemayan i kazu, kema kemianganger marengay: 7<<ini na trau kemuda zi maruwaruwa palalavat kemamatras marengay! nu amelri na Viruwa i itras mu, i eman na mikezang melapus za pinamelriyan ziyamaw?>>
8i Yēsu payas malrazam mena'u kanazu za a eman tu niranganger nazu, zi marengay kanazu: <<kemuda zi mianger mu za kemani awa? 9marengay kanini na kuwaaleng na trau <mulapus lra nannu pinamelriyan> kalre'ayan nay? zi za marengay <karahan, elaku nannu lre'ap kakawang> kalre'ayan nay? 10uwasay ku kanmu na Alrak na trau kazu i punapunan mikezang melapus za pinamelriyan.>> kemazu zi i intaw kema marengay kanizu na mikuwalengan mutuwalre'ap na trau: 11<<patalru ku kannu, karahan, elaku nannu lre'ap, uruma' lra!>>
12marahan izu na trau, payas melak kana lre'ap, kazu kanantu ina'una'u mapapiya kemakawang mupatraran. pasalaw maherareher mapiya, semenay puitras kana Viruwa i itras marengay: <<'azi mi ziyan mena'u za kemani na lremak!>>
i Yēsu demaulr kani Lēvi
(Matay 9.9-13; Luka 5.27-32)
13i Yēsu masalr mukuwa i Galili kana danaw, mulepun na trau muwazuk kantaw i paliyuliyus, zi panadam kanazu i intaw. 14a kemakawang ziya mungawayan i intaw mu, mena'u za sasa a kisasata, maw tu alrak ni Alefē i Lēvi, kemayan kana pusasatayan. marengay i Yēsu kantaw: <<alamu kurelrang kaninku!>> zi marahan i Lēvi, kurelrang lra kani Yēsu.
15i likuzan mu i Yēsu kazu kana ruma' ni Lēvi maekan, ulra kazuwan na kisasata zi na kuwaatrengan na trau kemazu kurelrang kantaw; i kazu ulra kazuwan a trau kurelrang kani Yēsu zi kanantu temakesi mukasa mekan. 16ulra papida na sinsi kana Sēsiyo zi na Palisay na trau mena'u kani Yēsu za kurelrang kana kuwaatrengan na trau zi na kisasata mukasa mekan, zi payas kiyumalr kanantu temakesi: <<i intaw kemuda zi mukasa mekan kana kisasata zi na kuwaatrengan na trau ziyamaw?>>
17kinger lra i Yēsu, zi marengay: <<na dalikedikan na trau 'azi kiyana'u kana ising, na mikuwalengan na trau mu kiyana'u kana ising. nanku iyazuwa tu pauwayan mu amelri demadaulr kana 'inava na trau, a mawna demadaulr kana kuwatrengan na trau.>>
na kiyaumalran kana 'a'iwayan
(Matay 9.14-17; Luka 5.33-39)
18ulra a paresan, tu temakesi na semasuwap i Yohanē zi na Palisay na trau penauwa za kazu 'ema'iway. ulra a trau zuwa kiyumalra kani Yēsu: <<kemuda zi 'emiway i Yohanē zi na Palisay na trau tu temakesi, zi nannu temakesi 'azi 'emiway?>>
19temuvang i Yēsu: <<na pinakaetim na ma'inayan anu kazu ziya kana semasaharan mu, 'a'iway na zuwa semasaharana na lavang ziyamaw? nu kazu ziya na pinakaetim na ma'inayan mukasa kanazu, zi 'azi 'a'iway nazu. 20mawmu uri raredek lra na wari, na pinakaetim na ma'inayan tu i aurungaw muveruk kemay kanazu i savakan, nu azu mu 'a'iway lra nazu.
21<<iniyan za trau melak kana vekal na inuwan tremapang kana maluman na kavang, nu kemani mu, na vekal na inuwan tu i papirisaw na maluman na kavang, ka'a'izang na mupiris. 22zi iniyan za trau melak kana vekal na kutra mavak kana maluman na kalritr na luvuk. nu kemani mu, na vekal na kutra papalretruk kana maluman na kalritr na luvuk, na kutra zi na kalritr na luvuk kakuwaatreng. semeneng, na vekal na kutra avaken kana vekal na kalritr na luvuk i savakan!>>
na kiyaumalran kana katalaulepan na wari
(Matay 12.1-8; Luka 6.1-5)
23ulra a saya na katalaulepan na wari, makalrang kana emi na 'uma i Yēsu. nantu temakesi marelrang kantaw; nazu kemakawang, zi hemitri melak za saema kana emi. 24kemazu zi na Palisay na trau marengay kani Yēsu: <<na'uwi i inu, nannu temakesi kemakuda lra kana 'azi ta maruwa kemakuda na lremak nu katalaulepan na wari!>>
25temuvang i Yēsu: <<i Davidē nu raanger za aekanan mu kemakuda lra za eman, 'azi mu miip ziyamaw? i intaw zi nantu pakarunan mu savavelawan lra, 26zi musavak kanantu ruma' na Viruwa i itras, mekan kana ipatavang kana Viruwa i itras na pang. ini na lremak mu maw mureha a mutu tinuma'izang na rahan i Abiyatar a azu. kurelranganay kananta kuret, mawmau na rahan na karuwa mekan kanini na pang; mawmu i Davidē mekan i intaw, zi panini ziya paekan kanantu pakarunan.>>
27kemazu zi marengay i Yēsu: <<na katalaulepan na wari maw muramawan kana trau zi pinatikezir; na trau mu amelri muramawan kana katalaulepan na wari zi pinialrak. 28semeneng, Alrak na trau kemazu maw a Luzu kana katalaulepan na wari.>>
Currently Selected:
Maruko 2: TPN
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023
Maruko 2
2
i Yēsu paka'inava kana mutuwalre'ap kuwaaleng na trau
(Matay 9.1-8; Luka 5.17-26)
1melavat lra za pidawariyan, i Yēsu marevelriyas ziya mukuwa i Kabēnum; mukalrazam lra za kazu i ruma' i intaw. 2kazuwan na trau muwazuwazuk, matemuy lra za trau i savak, arusay iniyan za lawang i sulray. i Yēsu a palalenak za vati kanazu mu, 3ulra a aapat 'emalu za sasa mutuwalre'ap kuwaaleng na trau zuwa kirepana'uwa kani Yēsu. 4'alrana kakazuwanan na trau, zi 'azi maruwa 'emalu kantaw mukuwa kani Yēsu i ngawayan nazu. kemazu zi kazu kanantu kinazuwan ni Yēsu na sa'uv i itras mivas za saya vuwang, zi na kuwaaleng na trau, pukasayaw kanantu kini'ezengan na lre'ap, papulusu. 5i Yēsu mena'u kananni na trau kanantu pakutatena'an, zi marengay kanizu na mutuwalre'ap kuwaaleng na trau: <<alrak a, mulapus lra nannu pinamelriyan.>>
6ulra a papida na sinsi kana Sēsiyo kemayan i kazu, kema kemianganger marengay: 7<<ini na trau kemuda zi maruwaruwa palalavat kemamatras marengay! nu amelri na Viruwa i itras mu, i eman na mikezang melapus za pinamelriyan ziyamaw?>>
8i Yēsu payas malrazam mena'u kanazu za a eman tu niranganger nazu, zi marengay kanazu: <<kemuda zi mianger mu za kemani awa? 9marengay kanini na kuwaaleng na trau <mulapus lra nannu pinamelriyan> kalre'ayan nay? zi za marengay <karahan, elaku nannu lre'ap kakawang> kalre'ayan nay? 10uwasay ku kanmu na Alrak na trau kazu i punapunan mikezang melapus za pinamelriyan.>> kemazu zi i intaw kema marengay kanizu na mikuwalengan mutuwalre'ap na trau: 11<<patalru ku kannu, karahan, elaku nannu lre'ap, uruma' lra!>>
12marahan izu na trau, payas melak kana lre'ap, kazu kanantu ina'una'u mapapiya kemakawang mupatraran. pasalaw maherareher mapiya, semenay puitras kana Viruwa i itras marengay: <<'azi mi ziyan mena'u za kemani na lremak!>>
i Yēsu demaulr kani Lēvi
(Matay 9.9-13; Luka 5.27-32)
13i Yēsu masalr mukuwa i Galili kana danaw, mulepun na trau muwazuk kantaw i paliyuliyus, zi panadam kanazu i intaw. 14a kemakawang ziya mungawayan i intaw mu, mena'u za sasa a kisasata, maw tu alrak ni Alefē i Lēvi, kemayan kana pusasatayan. marengay i Yēsu kantaw: <<alamu kurelrang kaninku!>> zi marahan i Lēvi, kurelrang lra kani Yēsu.
15i likuzan mu i Yēsu kazu kana ruma' ni Lēvi maekan, ulra kazuwan na kisasata zi na kuwaatrengan na trau kemazu kurelrang kantaw; i kazu ulra kazuwan a trau kurelrang kani Yēsu zi kanantu temakesi mukasa mekan. 16ulra papida na sinsi kana Sēsiyo zi na Palisay na trau mena'u kani Yēsu za kurelrang kana kuwaatrengan na trau zi na kisasata mukasa mekan, zi payas kiyumalr kanantu temakesi: <<i intaw kemuda zi mukasa mekan kana kisasata zi na kuwaatrengan na trau ziyamaw?>>
17kinger lra i Yēsu, zi marengay: <<na dalikedikan na trau 'azi kiyana'u kana ising, na mikuwalengan na trau mu kiyana'u kana ising. nanku iyazuwa tu pauwayan mu amelri demadaulr kana 'inava na trau, a mawna demadaulr kana kuwatrengan na trau.>>
na kiyaumalran kana 'a'iwayan
(Matay 9.14-17; Luka 5.33-39)
18ulra a paresan, tu temakesi na semasuwap i Yohanē zi na Palisay na trau penauwa za kazu 'ema'iway. ulra a trau zuwa kiyumalra kani Yēsu: <<kemuda zi 'emiway i Yohanē zi na Palisay na trau tu temakesi, zi nannu temakesi 'azi 'emiway?>>
19temuvang i Yēsu: <<na pinakaetim na ma'inayan anu kazu ziya kana semasaharan mu, 'a'iway na zuwa semasaharana na lavang ziyamaw? nu kazu ziya na pinakaetim na ma'inayan mukasa kanazu, zi 'azi 'a'iway nazu. 20mawmu uri raredek lra na wari, na pinakaetim na ma'inayan tu i aurungaw muveruk kemay kanazu i savakan, nu azu mu 'a'iway lra nazu.
21<<iniyan za trau melak kana vekal na inuwan tremapang kana maluman na kavang, nu kemani mu, na vekal na inuwan tu i papirisaw na maluman na kavang, ka'a'izang na mupiris. 22zi iniyan za trau melak kana vekal na kutra mavak kana maluman na kalritr na luvuk. nu kemani mu, na vekal na kutra papalretruk kana maluman na kalritr na luvuk, na kutra zi na kalritr na luvuk kakuwaatreng. semeneng, na vekal na kutra avaken kana vekal na kalritr na luvuk i savakan!>>
na kiyaumalran kana katalaulepan na wari
(Matay 12.1-8; Luka 6.1-5)
23ulra a saya na katalaulepan na wari, makalrang kana emi na 'uma i Yēsu. nantu temakesi marelrang kantaw; nazu kemakawang, zi hemitri melak za saema kana emi. 24kemazu zi na Palisay na trau marengay kani Yēsu: <<na'uwi i inu, nannu temakesi kemakuda lra kana 'azi ta maruwa kemakuda na lremak nu katalaulepan na wari!>>
25temuvang i Yēsu: <<i Davidē nu raanger za aekanan mu kemakuda lra za eman, 'azi mu miip ziyamaw? i intaw zi nantu pakarunan mu savavelawan lra, 26zi musavak kanantu ruma' na Viruwa i itras, mekan kana ipatavang kana Viruwa i itras na pang. ini na lremak mu maw mureha a mutu tinuma'izang na rahan i Abiyatar a azu. kurelranganay kananta kuret, mawmau na rahan na karuwa mekan kanini na pang; mawmu i Davidē mekan i intaw, zi panini ziya paekan kanantu pakarunan.>>
27kemazu zi marengay i Yēsu: <<na katalaulepan na wari maw muramawan kana trau zi pinatikezir; na trau mu amelri muramawan kana katalaulepan na wari zi pinialrak. 28semeneng, Alrak na trau kemazu maw a Luzu kana katalaulepan na wari.>>
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023