Susana 1
1
Vumbhurhi bya Susana byi naveta vaavanyisi vambirhi
1A ku ri ni wanuna loyi a a tshama eBabilona. Vito ra yena a a ri Yoyakimi. 2A a tekile Susana n'wana Hilkiya, wansati wo saseka swinene, loyi a a chava Xikwembu. 3Vatswari va Susana a va lulamile, kutani a va dyondzisile n'wana wa vona wa xisati ku hanya hi nawu wa Muxe. 4Loko a ri yena Yoyakimi a a fumile ngopfu. A a ri ni ntanga lowukulu lowu a wu khomane ni yindlu ya yena; kutani Vayuda a va hamba va ta eka yena, hikuva a a fundzhiwa ku tlula hinkwavo. 5Hi lembe rero ku hlawuriwile vakulukumba vambirhi ku va vaavanyisi. Mayelana na vona HOSI Xikwembu xi te: “Ku homboloka ku nghenile eBabilona hi vakulukumba lava a va fanele ku fambisa vanhu hi nawu.” 6Vavanuna lava a va tala ku kumeka emutini wa Yoyakimi, kutani hinkwavo lava a va ri ni timhaka a va ya ka vona ku ya avanyiseriwa tona.
7Loko vanhu va hangalakile ninhlekanhi, Susana a a tolovele ku famba-famba a tiolola entangeni wa nuna wa yena. 8Masiku hinkwawo vakulukumba lava vambirhi a va n'wi vona a ri karhi a nghena ni ku famba-famba kwale entangeni, kutani va sungula ku n'wi navela. 9Va sungula ku taleriwa hi ku n'wi navela lero va kala va lahlekeriwa hi vukhongeri ni ku rivala ntirho wa vona wa vuavanyisi. 10Hi vumbirhi bya vona a va taleriwe hi ku n'wi navela, kambe a va nga byelani leswi a va titwisa xiswona, 11hikuva a swi va khomisa tingana ku tipaluxa, va kombana ku navela ka vona ku etlela na Susana. 12Kutani a va hisekela ku n'wi vona masiku hinkwawo.
13Siku rin'wana ninhlekanhi va byelana va ku: “A hi muke hikuva i nkarhi wa ku dya.” 14Hi loko va huma va hambana; kambe hi vumbirhi bya vona va ya tlhela endleleni, kutani va ta va ta hlangana. Loko va konanisanile lexi xi va tlheriseke, va boxelana ku navela ka vona. Kutani hi vumbirhi bya vona va kungahata nkarhi lowu va nga kumaka Susana ha wona a ri yexe.
Vaavanyisi lavambirhi va ringeta ku etlela na Susana.
15Kuteloko va ha rindzele nkarhi lowu, Susana a nghena entangeni ku kota masiku hinkwawo a ri ni malandza ya xisati mambirhi ntsena, a navela ku titimula, hikuva a ku hisa ngopfu. 16A ku nga ri na munhu entangeni handle ka vakulumba lavambirhi lava a va tumberile va ri karhi va n'wi languta. 17Susana a ku ka malandza ya yena ya xisati: “Ndzi tiseleni mafurha ni switolwa, kutani mi pfala tinyangwa ta ntanga leswaku ndzi ta hlamba.” 18Ma endla hilaha a vuleke hakona: ma pfala tinyangwa ta ntanga, kutani ma huma hi nyangwa ya le tlhelweni ku ya n'wi tisela leswi a ma leriseke swona. A ma vonanga vakulukumba lavayani, hikuva a va tumberile.
19Loko malandza ya xisati ma humile, vakulumba lava va humelela, va tsutsumela eka Susana va ku: 20“Vona, tinyangwa ta ntanga ti pfariwile, a ku na munhu la hi vonaka; ha ku rhandza, kutani pfumela ku etlela na hina. 21Loko u ala, hi ta ku lumbeta, hi vula leswaku hi ku kumile u ri ni jaha rin'wana, kutani leswi hi swona swi endleke leswaku u humesa malandza ya wena ya xisati entangeni.”
22 #
Levh. 20:10; Dut. 22:22 Susana a hefemulela henhla, kutani a ku: “A ku na ndlela yin'wana. Loko ndzo endla leswi mi swi lavaka i rifu eka mina; naswona loko ndzi ala, ndzi nga ka ndzi nga poni emavokweni ya n'wina. 23Kambe ndzi hlawula ku mi alela, hambileswi ndzi nga ta ka ndzi nga poni eka n'wina, ku ri ni ku dyohela Xikwembu.” 24Hiloko Susana a huwelela, vakulukumba lavambirhi va ri karhi va huwelela na vona, va n'wi lumbeta. 25Kutani un'wana wa vona a tsutsuma a ya pfula tinyangwa ta ntanga.
26Loko malandza ya muti ma twa ku huwelela entangeni, ma huma hi ku tsutsuma ma ya nghena hi nyangwa ya le tlhelo, ma lava ku vona leswaku Susana ú humeleriwile hi yini. 27Kuteloko vakulukumba va hlamuserile mhaka ya vona, malandza ma khomiwa hi tingana ngopfu, hikuva a ku nga si tshama ku vuriwa swo tano hi Susana.
Vaavanyisi vambirhi va lumbeta Susana
28Hi siku leri tlhandlamaka, loko vanhu va hlengeletanile emutini wa Yoyakimi nuna wa Susana, vakulukumba lavambirhi na vona va ta va tiyimiserile ku dlayisa Susana hi ku n'wi lumbeta. 29Emahlweni ka ntshungu va ku: “A ku landziwe Susana, n'wana Hilkiya, nsati wa Yoyakimi.” 30Kunene Susana a landziwa, a ta ni vatswari va yena, ni vana va yena, ni maxaka ya yena hinkwawo. 31Susana a a vumbekile swinene, a a ri mbhurhi. 32Leswi a a funengetiwile xikandza, vavanuna lava vo homboloka va lerisa leswaku a fununguriwa, leswaku va ta titlonya hi vumbhurhi bya yena. 33Kambe va ndyangu wa yena, vanghana ni hinkwavo lava n'wi voneke, va rila.
34Kutani vakulukumba lavambirhi va suka va yima emahlweni ka ntshungu, va tlhandleka mavoko ya vona enhlokweni ya Susana. 35Loko a ri yena a a languta ehenhla etilweni a ri karhi a rila, hikuva mbilu ya yena a yi tshemba HOSI Xikwembu. 36Vakulukumba lavambirhi va ku: “Loko hi ri karhi hi tifambela entangeni, wansati loyi ú nghenile kona ni malandza mambirhi ya xisati, a pfala tinyangwa, kutani a ma humesa hi leya le tlhelo. 37Hiloko jaha rin'wana leri a ri tumberile, ri ta eka yena, kutani va etlela swin'we. 38Hina a hi ri etlhelweni rin'wana ra ntanga, kutani loko hi vona vubihi lebyi, hi tsutsuma hi ya eka vona. 39Hi va vonile va singarhelana,#Kumbe: angarhana, kumbe: vukarhana kambe a hi kotanga ku khoma wanuna loyi, hikuva a a hi tlula hi matimba, kutani ú pfurile tinyangwa a baleka. 40Hiloko hi khoma wansati loyi hi n'wi vutisa leswaku jaha leri i mani, kambe a nga hi byelanga. Vumbhoni bya hina hi byona lebyi.” 41Ntshungu wu tshemba vumbhoni lebyi, hikuva a byi huma eka vakulukumba lava a va ri vaavanyisi va vona; loko a ri Susana, va n'wi avanyisela rifu.
Daniele a ponisa Susana.
42Kutani Susana a khongela hi rito leri tlakukeke a ku: “We Xikwembu xa minkarhi hinkwayo, wena Mupaluxi wa swihundla, la tivaka swilo hinkwaswo swi nga si humelela, 43wa swi tiva leswaku vavanuna lava va ndzi hehla hi vumbhoni byo hemba. Kutani sweswi ndzi fanele ku fa! Kambe a ndzi endlanga nchumu xa leswi va ndzi lumbetaka ha swona.”
44Xikwembu xi twa xirilo xa Susana. 45Loko a ri karhi a yisiwa eku dlaweni, Xikwembu xi pfuxa Moya lowo Kwetsima eka jaha leri a ri vuriwa Daniele; #Kumbe: Xikwembu xi nyika jaha leri va nge i Daniele emoya wo saseka 46kutani a huwelela a ku: “A ndzi na nandzu wa rifu ra wansati loyi!” #Kumbe: “A ndzi pfumeli ku halata ngati ya wansati loyi.”
47Vanhu hinkwavo va hundzulukela eka yena va ku: “U ri yini?” 48Daniele a ku tsetserhele exikarhi ka vona a ku: “Mo va swiphukuphuku xana, n'wina Vaisraele? Xana manana loyi wa Muisraele, mi n'wi avanyisela rifu handle ka ku rhanga mi kambisisa ni ku lavisisa timhaka ta kona ke? 49Tlhelelani ehubyeni, hikuva vavanuna lava va n'wi hehlile hi vumbhoni byo hemba.”
50Vanhu hinkwavo va hatlisa va tlhelela ehubyeni. Kutani vakulukumba va tiko va ku ka Daniele: “Tana, u ta tshama na hina u hi hlamusela timhaka, hikuva Xikwembu xi ku nyikile vutlhari byo fana ni bya hina.”
51Hiloko Daniele a ku ka vona: “Hambanisani vaavanyisi lava vambirhi, kutani ndzi ta va vutisisa.” 52Loko vaavanyisi lava vambirhi va hambanyisiwile, Daniele a vitana un'we wa vona a ku ka yena: “Wena mukhalabye wa lunya, vubihi lebyi u byi endleke ku sukela khale byi humerile erivaleni namuntlha. 53#Eks. 23:7A wu nga avanyisi vanhu hi ndlela yo lulama; a wu boha lava nga riki na nandzu, u ntshunxa lava nga ni nandzu. Kasi HOSI Xikwembu xi te: ‘U nga tshuki u dlaya loyi a nga riki na nandzu kumbe loyi a lulameke.’ 54Sweswi ke, loko hakunene u vonile jaha leri, ndzi byele leswi: xana a va ri hansi ka murhi wihi loko u va vona va etlele swin'we?” Yena a hlamula a ku: “A va ri ehansi ka murhi wa ximapana.” #Kumbe: vurimba
55Kutani Daniele a ku: “Hi swona! Vunwa bya wena byi ku petile nhloko, hikuva Xikwembu xi lerisile ntsumi ya xona ku ku pandza #pandza: rito leri hi Xigriki ri fambelana ni rito ra ‘ximapana’ hi le xikarhi sweswi.”
56Kutani Daniele a n'wi yimisa etlhelo, a va lerisa leswaku va tisa lo un'wana. Daniele a ku ka yena: “Wena wo hanya hi mikhuva ya Vakanana, hambiloko u ri Muyuda, #Kumbe: “Mukanana ndziwena, a wu Muyuda, kumbe: “Wena wo hanya hi Xikanana, u ri Muyuda vumbhurhi byi ku xisile ni ku navela ku thyakisile mbilu ya wena. 57Leswi hi swona leswi n'wina vambirhi a mi endla vanhwana va Israele, va sindziseka ku etlela na n'wina hi ku chava; kambe nhwana loyi wa Muyuda a nga byi tiyiselanga vubihi bya n'wina. 58Hiswona ke, ndzi byele: xana a va ri hansi ka murhi wihi loko u va kuma va etlele swin'we?” Yena a hlamula a ku: “A va ri ehansi ka nkuhlu wa rihlaza.”
59Kutani Daniele a ku ka yena: “Hi swona, na wena vunwa bya wena byi ku petile nhloko, hikuva ntsumi ya Xikwembu yi yimile ni banga ra yona ku ku pulukanyisa #pulukanyisa: rito leri hi Xigriki ri fambelana ni rito ra ‘nkuhlu wa rihlaza’ hi le xikarhi, leswaku yi mi herisa hi vumbirhi bya n'wina.”
60Kavaloko ntshungu hinkwawo wu huwelela hi matimba wu dzunisa Xikwembu lexi ponisaka lava va xi tshembaka. 61Kutani va pfukela vakulukumba lavambirhi, hikuva Daniele a a va bohile hi ku vulavula ka vona loko va humesa vumbhoni byo hemba. 62#Dut. 19:16-21Hiloko va va endla hi ku biha loku a va kungele ku endla warikwavo: hi ku landza nawu wa Muxe, va va dlaya. Kutani siku rolero ku ponisiwa eku feni munhu loyi a nga riki na nandzu. 63Kavaloko Hilkiya ni nsati wa yena xikan'we na Yoyakimi nuna wa Susana ni maxaka ya vona hinkwawo va dzunisa Xikwembu, hikuva Susana ú kumekile a ri hava xisandzu. 64Kutani ku sukela siku rero, Daniele a va ni ndhuma leyikulu exikarhi ka varikwavo.
Currently Selected:
Susana 1: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.