HEBREOS 1
1
Reꞌ Dios xitakꞌa̱ꞌ cho i rAcꞌu̱n chi rikꞌormojic keh riCꞌuhbal
1Chiwach take cho kꞌi̱j naxicꞌacharic take cho kama̱m katiꞌt, reꞌ Dios qꞌuih woꞌ take raj kꞌorol ricꞌuhbal xitakꞌa̱ꞌ take cho cu̱cꞌ. Maꞌ xa ta junpech xkꞌormojic queh cꞌuhbal, qꞌuih laꞌ pech eh ru̱cꞌ juꞌjun pech xkꞌormojic cho queh, rehreh wach rikꞌormojic xbanaric cho queh. 2Raj yuꞌna chipam take ricuxꞌic wach take kꞌi̱j wilco̱j wi̱ꞌ wili, reꞌ Dios xitakꞌa̱ꞌ cho i rAcꞌu̱n ku̱cꞌ i hoj ra̱ꞌ riꞌsil cho maꞌ Israhel reh chi reꞌ chic reꞌ narikꞌoric keh riCꞌuhbal.
Nok maꞌ jaꞌxta nak bih wilic wach acꞌal on ar pan taxa̱j, reꞌ Acꞌunbe̱s reꞌreꞌ, reꞌ aj woꞌ reꞌ xipahba̱ꞌ i Dios chi aj tikꞌinel reh chiꞌnchel wilic ayuꞌ wach acꞌal chꞌi̱l wilic ar pan taxa̱j. Jeꞌ woꞌ xipahba̱ꞌ chi Ajabe̱s china̱ chiꞌnchel nicꞌ paꞌ nimal tikꞌimaj cho ruꞌum. 3Jeꞌ woꞌ chic, reꞌ Acꞌunbe̱s reꞌreꞌ sutumaj woꞌ ri̱j ru̱cꞌ riholonquilal wach sakom sutumaj wi̱ꞌ ri̱j i Dios eh ru̱cꞌ reꞌreꞌ ncꞌutunic woꞌ chi manlic nicꞌ wach riwi̱ꞌ i Dios. Reꞌreꞌ kꞌe̱ꞌ woꞌ rajawric rikꞌorbal wilic chi quina̱ take nicꞌ paꞌ nimal wilic ayuꞌ wach acꞌal chꞌi̱l woꞌ take wilque̱b ar pan taxa̱j. Jeꞌ reꞌ riwi̱ꞌ maj narikꞌor queh chi naquitikim juꞌ wihꞌic jeꞌ ricab quitikꞌinjic bano̱j, quicahnic woꞌ chi jeꞌ reꞌ quiwi̱ꞌ eh jeꞌ woꞌ maꞌ niqꞌuic ta wach chaj bih nquicamanej.
Jenaj chic kꞌoric enikꞌor chiri̱j rAcꞌu̱n i Dios. Reꞌreꞌ nok ricꞌulum chic tiꞌcꞌaxic chiki̱j i hoj chi ricuyuric kamahc, xcꞌamaric johtok pan taxa̱j eh ar xyeꞌeric woꞌ reh jenaj wach lokꞌil chꞌi̱l i Dios jeꞌ ricab nanyeꞌeric rilokꞌil jenoꞌ cꞌacharel nantzꞌuhkic cok chi riche̱l jenoꞌ kꞌatal kꞌoric. 4Reꞌ rilokꞌil xicꞌul reꞌreꞌ, kꞌe̱ꞌ woꞌ chic rinimal wach chiwach i yeꞌo̱j queh take raj tzꞌeꞌ wa̱ch i Dios. Jeꞌ reꞌ nikꞌor ruꞌum chi reꞌ lokꞌ laj kꞌoric kꞌoro̱j chiri̱j rAcꞌu̱n i Dios, kꞌe̱ꞌ woꞌ chic lo̱kꞌ chiwach i kꞌoric kꞌoro̱j chiqui̱j take raj tzꞌeꞌ wa̱ch ar pan taxa̱j.
Reꞌ rilokꞌil racꞌu̱n i Dios
5Chipam i lokꞌ laj hu̱j reꞌ wilic wi̱ꞌ riCꞌuhbal i Dios nkilow chi reꞌ Dios jeꞌ wili xikꞌor reh rAcꞌu̱n:
“Reꞌ hat, hat wacꞌu̱n.
Chiwach i kꞌi̱j wili tinipahba̱ꞌ yuꞌna chi kꞌatal kꞌoric, nqui reh.
Pan junkꞌat chic reh Lokꞌ laj Hu̱j reꞌreꞌ, reꞌ Dios jeꞌ wili rikꞌorom cho:
“Reꞌ hin xa wilqui̱n woꞌ cho chi hin awaja̱w
eh reꞌ hat xa wilca̱t woꞌ cho chi wacꞌu̱n, nqui reh.
Reꞌ take kꞌoric wili maꞌ jancꞌal ta kꞌi̱j rikꞌorom cho Dios chiri̱j jenoꞌ raj tzꞌeꞌ wa̱ch.
6Jeꞌ woꞌ chic, ar chipam i lokꞌ laj hu̱j reꞌreꞌ nkilow i kꞌoric xikꞌor cho i Dios chiri̱j i xa jenaj chi rAcꞌu̱n reꞌ wilic rajawric chi quina̱ chiꞌnchel. Jeꞌ wili xikꞌor nok qꞌuisi̱n maꞌ chic ritakꞌa̱ꞌ cho ayuꞌ wach acꞌal:
“Reꞌ chiꞌnchel take waj tzꞌeꞌ wa̱ch quiyew rilokꞌil ruꞌ, nqui xikꞌor.
7Ar woꞌ chipam i lokꞌ laj hu̱j reꞌreꞌ nok xkꞌoric i Dios chiqui̱j take raj tzꞌeꞌ wa̱ch jeꞌ wili rikꞌorom cho:
“Reꞌ take waj tzꞌeꞌ wa̱ch reꞌ wilque̱b chi ribanaric nicamaj,
xnitikꞌa̱ꞌ take chi xa nicꞌ yuꞌ enijal quiwi̱ꞌ jeꞌ ricab ncꞌuluric ru̱cꞌ i te̱w chi xa haj paꞌ eriban chi ricora̱ꞌ je,
on jeꞌ ricab i kꞌa̱kꞌ chi xa rupuj ri̱b i xak, nqui xikꞌor cahnok.
8Ra̱j laꞌ naxkꞌoric cho ru̱cꞌ rAcꞌu̱n, jeꞌ wili tzꞌihmbimaj chi xikꞌor reh:
“Reꞌ hat reꞌ wilca̱t woꞌ chi hat Dios chi junelic kꞌi̱j sakom,
wilic awajawric chi kꞌatoj kꞌoric eh maꞌ haj ta ticalajic nechꞌ ok ru̱cꞌ i kꞌatoj kꞌoric naꞌn.
9Jeꞌ woꞌ, kꞌe̱ꞌ nponic chawach chi naribanaric i coric wach noꞌjbal,
raj i cꞌahbil laj noꞌjbal chꞌiꞌc nawilow.
Jeꞌ woꞌ chic, jeꞌ ricab nanchihiric wach i cꞌacharel noquic chi kꞌatal kꞌoric
cu nbuchꞌuric i wach na̱ ru̱cꞌ ncꞌohnic laj ikꞌo̱m,
jeꞌ woꞌ reꞌ xniban aweh i hin Dios, xatnichih woꞌ chi quixilac take awich kꞌatal kꞌoric
eh xniyew aweh jenaj nim laj sukquil cꞌuxlis maꞌ jaruj ta cꞌuhlel wach, nqui xikꞌor.
10Jeꞌ woꞌ chic chipam i lokꞌ laj hu̱j reꞌreꞌ, tzꞌihmbimaj woꞌ cho chi reꞌ Dios jeꞌ wili xikꞌor reh rAcꞌu̱n:
Reꞌ hat Ajabe̱s, reꞌ hat xat-tikꞌinic reh wach acꞌal jeꞌ woꞌ i taxa̱j.
Hat xat-tikꞌinic cho queh reꞌreꞌ nok jaꞌ npꞌuhtic ta cho i cꞌacharic ayuꞌ wach acꞌal.
11Reꞌ hat xa wilca̱t woꞌ cho eh xa na̱wihꞌic woꞌ chi junelic kꞌi̱j sakom.
Raj i wach acꞌal chꞌi̱l i taxa̱j, reꞌ take reꞌ xa narisahchic woꞌ quiwach.
Jeꞌ ricab nsahchic wach take tzꞌih quikꞌecherbic, jeꞌ woꞌ reꞌ narisahchic quiwach take reꞌ.
12Jeꞌ ricab ncꞌuluric ru̱cꞌ i cꞌacharel chi narijal risoꞌ chi pa reh chic ricoj chiri̱j naresaj lok i jenaj chic,
jeꞌ woꞌ reꞌ naricꞌuluric ru̱cꞌ taxa̱j acꞌal chi narijahlic woꞌ wach.
Raj i hat xa awi̱ꞌ woꞌ na̱cahnic eh reꞌ rikꞌijil acꞌacharic maꞌ jaruj ta cꞌuhlel wach, nqui Dios.
13Jeꞌ woꞌ chic, maꞌ jancꞌal ta kꞌi̱j rikꞌorom cho Dios chiqui̱j take raj tzꞌeꞌ wa̱ch reꞌ rikꞌorom cho chiri̱j i rAcꞌu̱n chi jeꞌ wili:
“Jeꞌ ricab naricꞌul rilokꞌil jenoꞌ cꞌacharel chi ntzꞌukunjic cok chi riche̱l jenoꞌ kꞌatal kꞌoric,
jeꞌ aj woꞌ reꞌ nachacꞌul alokꞌil wili i hat:
Reꞌ hat na̱wihꞌic chiniche̱l cu rehtal nawilow chi reꞌ take awaj ixowonel
naquiwihꞌic riꞌsil awo̱k, nqui rikꞌorom cho chiri̱j.
14Reꞌ Dios maꞌ jancꞌal ta kꞌi̱j xikꞌor cho chi jeꞌ reꞌ queh raj tzꞌeꞌ wa̱ch maj reꞌ take raj tzꞌeꞌ wa̱ch xa uxlabal take, xa wilque̱b woꞌ chi ribanaric i camanic yeꞌo̱j queh ruꞌum i Dios eh reꞌ quicamaj yeꞌo̱j cho reꞌreꞌ, reh chi naquitoꞌbem take aj niminel reꞌ naquehtric chi naquicoꞌljic chiwach i tiꞌcꞌaxic nariyeꞌeric chi tojbal wach quimahc take aj mahc.
Currently Selected:
HEBREOS 1: poh
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.