Habakòka 1
1
1Izao no hafatra nampitondrain’Andriamanitra an’i Habakòka mpaminany.
Ny mpaminany miantso vonjy amin’Andriamanitra
2Mandra-pahoviana, TOMPO ô,
no hiantsoako vonjy aminao
nefa tsy henoinao aho?
Mandra-pahoviana tokoa re
no hitarainako ny amin’ny herisetra
nefa tsy vonjenao izahay?
3Nahoana no ampahitanao faharatsiana maro aho?
Nahoana no mijery fotsiny ny fahoriana Ianao?
Fa ny hany manodidina ahy dia famoretana sy herisetra;
ary fitsarana sy fifandirana no mipoaka hatraiza hatraiza#1.3 Dkt hafa raha misy fitsarana, mihamafy ny fifandirana. .
4Noho izany, dia tsy manan-kery ny lalàna;
ary tsy mivoaka mandresy ny rariny.
Tsy mahaleo ny ratsy fanahy ny olo-marina,
ka izany no ivoahan’ny fitsarana miangatra.
Ny valin-tenin’Andriamanitra: fanafihan’ny Babilônianina
5«Banjinonareo ny hafa firenena, hoy ny Tompo.
Ary aoka ianareo ho talanjona tokoa
fa amin’izao andronareo izao no hanaovana asa
izay tsy hinoanareo na dia holazaina aminareo aza#1.5 Toy izay ny hoe ny hafa firenena ny dkt grika tranainy kosa dia manao hoe ny mpaniratsira; ary toy izay ny hoe hanaovana izy kosa manao hoe hanaovako. Ity and ity dia raisin’ny Asa 13.41 amin’ny endrika ahitana azy ao amin’ny dkt grika tranainy..
6Fa indro antsoiko ny Babilônianina#1.6 Ny fanjakana babilônianina vaovao dia nanomboka tamin’ny taona 626 ka hatramin’ny taona 539 tal J.K. ary dia nivelatra nahazo iny faritra atsinanana iray manontolo amoron’i Mediteranea iny, indrindra fa tamin’ny andro nanjakan’i Nebôkadnetsara.,
dia ilay firenena masiaka sy tsy mivatravatra;
mitety faritra midadasika ireo
hakàny ny tanin’ny sasany.
7Mahatsiravina sy mahatahotra izy,
fa ny tenany ihany no fenitra
ipoiran’ny zony amam-pahefàny.
8Faingam-pandeha noho ny leôparda ny soavaliny,
ary kinga noho ny amboadia miremby takariva.
Avy lavitra ny mpitaingin-tsoavaliny no mitsamboamboatra
ary mirimorimo toy ny voromahery miantoraka amin-kaza.
9Handroba no ahatongavan’izy rehetra,
ka ijereny fatratra ny eo anoloany#1.9 Dkt hafa momba ity andalana ity: Mahamay toy ny rivotra avy any atsinanana ny fiaviny.
ary anangonany babo maro tahaka ny fasika.
10Tsy raharahany akory izay mpanjaka,
ary dia ihomehezany ny mpanapaka.
Tsy mampihontsina azy izay tanànamimanda;
tovon-tany no asavovony, dia afany ireny.
11Mitombo hafanampo izy,
ka mbola manao heloka hatrany#1.11 Dkt hafa: Mihavao ny hafanampony ary manohy ny diany izy sady mihameloka hatrany. .
Izany heriny izany no andriamaniny.
Antso vaovao ataon’ny mpaminanin’Andriamanitra
12Hatrizay hatrizay tokoa dia Ianao no TOMPO,
Ianao no Andriamanitro masina sady tsy mety maty#1.12 tsy mety maty araka ny lovan-tsofina tranainy teo amin’ny Jiosy; ny RM dia manao hoe: tsy ho faty izahay. !
Ry TOMPO Vatolampy miaro ahy ô,
notendrenao sy nohatanjahinao
ny Babilônianina fahavalonay
mba ho famaizana sy fananarana anay.
13Nefa madio loatra ny masonao ka tsy mahajery ny ratsy;
ary tsy tantinao koa ny mitazana fahoriana.
Koa nahoana no jerenao fotsiny izay ataon’ny mpamitaka?
Ary nahoana no mangina Ianao, Andriamanitro ô,
raha aripaky ny olon-dratsy ny marina noho izy?
14Nahoana re ny olombelona no ataonao
toy ny trondro any an-dranomasina
dia toy ireo biby mifanaretsaka tsy misy mpitarika?
15Toy ny trondro azom-pintana na voafandrika am-bovo
na voasarika amin’ny harato tarihina
no amaboan’ny Babilônianina ireo olombelona;
ary ifaliany sy iravoravoany tokoa izany.
16Koa izany haratony izany no anaovany sorona
izay dorany hanetona ho mari-panajana azy,
satria fitaovana ahazoany sakafo matsiro sy matavy.
17Mbola hanatsoaka sabatra#1.17 hanatsoaka sabatra: araka ny stf iray momba ny bokin’i Habakòka, hita tao Komrano; ny RM dia manao hoe hanaisotra ny ao anaty haratony. hatrany ve ry zareo,
ka handringana tsisy indrafo ny firenena maro?
Currently Selected:
Habakòka 1: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.