Hezrà 1
1
Avelan’i Kirôsa haorina indray ny tempoly
1Tamin’ny taona voalohany nanjakàn’i Kirôsa amperôran’i Persia no tanteraka ny teny nampilazain’ny TOMPO an’i Jeremià mpaminany#1.1 Ny and 1-2 sy ny fanombohan’ny and 3 dia mamerina ara-bakiteny ny rijan-teny famaranana ao amin’ny 2 Tan 36.22-23. –I Kirôsa dia amperôran’i Persia, taona 558-528 tal J.K. Tamin’ny fararanon’ny taona 539, rehefa nahazo an’i Babilôna i Kirôsa, dia nisantatra fanjakana vaovao amin’ny maha «mpanjakan’i Babilôna» azy; ny taona voalohan’io fanjakana vaovao io (taona 538 tal J.K.) no tsahivin’ny and 1. –nampilazain’ny...mpaminany: jereo Jer 25.11-12; 29.10.. Nanaitra fanahy an’i Kirôsa manko tamin’izay ny TOMPO ka nahatonga azy hampiely an-kabary sy an-tsoratra eran’ny fanjakany manontolo ireto hafatra ireto: 2«Izao no lazain’i Kirôsa amperôran’i Persia. Ny TOMPO Andriamanitry ny lanitra dia efa nanome ahy ny fanjakana rehetra ambonin’ny tany ary efa nandidy ahy hanorina tempoly ho Azy any Jerosalema, izay ao amin’ny tanin’i Joda#1.2 Jereo Is 44.28.. 3Koa aoka ianareo rehetra anisan’ny vahoakan’ny Tompo mba hiakatra any Jerosalema, ao amin’ny tanin’i Joda, ka hanorina indray ny tranon’ny TOMPO Andriamanitr’i Israely, dia ilay Andriamanitra Izay ivavahana ao Jerosalema. Homba anareo anie ilay Andriamanitrareo! 4Na aiza na aiza onenan’ireo sisa tavela amin’izany vahoaka izany dia aoka ny tompontany hanome azy volafotsy sy volamena ary koa fananana hafa sy biby fiompy mbamin’ny fanatitra an-tsitrapo ho an’ilay tranon’Andriamanitra any Jerosalema.»
5Dia nioman-kiainga ny loham-pianakaviana tamin’ny fokon’i Joda sy ny fokon’i Benjamîna mbamin’ny mpisorona sy ny levita, izany hoe izay rehetra nampirisihin’ny TOMPO Andriamanitra hiakatra hanorina ilay tranony any Jerosalema. 6Ny olona rehetra nifanakaiky taminy dia nanampy azy tamin’ny fanaka volafotsy sy volamena, fananana hafa sy biby fiompy ary zavatra sarobidy mbamin’ny fanomezana an-tsitrapo ho an’ny tempoly.
7Nasain’ny amperôra Kirôsa navoaka ireo fanaky ny tranon’ny TOMPO, dia ny fanaka nalain’i Nebokadnetsara tany Jerosalema#1.7 Jereo 2 Mp 25.13-15. ka efa napetrany tao an-tranon’ireo andriamaniny. 8I Mitredata, mpitahiry ny harem-panjakana, no nasainy namoaka ireny fanaka ireny sy nanisa azy ary nanolotra azy tamin’i Sesebatsàro, taranaky ny mpanjakan’i Joda. 9Izao no isany: lovia volamena telopolo; lovia volafotsy arivo; antsy 29#1.9 antsy: tsy azo antoka loatra ny hevitry ny voambolana hebreo.; 10koveta volamena telopolo; koveta volafotsy 410; fitaovana hafa arivo. 11Ny isan’ny fanaka volamena sy volafotsy rehetra dia 5 400; ka nentin’i Sesebatsàro ireo, fony niakatra avy tany Babilôna ho any Jerosalema ny voasesitany.
Currently Selected:
Hezrà 1: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.