OBEDIA 1
1
1He: zigi myhang: thang yoem: so' Aseing gi Edom yi da" khyoo: cisu" ga: tid to" ziri Obedia gi lapi: pe: to" zi nghoid.
Aseing gi Edom ri Shen" Yhen Loo wa Khyoo:
Aseing gi nya: lagyoo: ri byumyu" yi jhang khyoo: nhang: kaid byid: bye: wigi
«Soin' ge' too' loo shang- nyhang" Edom ri gyi zain: boem loo: shang» ga: da" nya: mungdang: ri
ngoonu" shoug" gyoo: bye:.
2Edom ri Aseing tid zigi
«Ngoo gi nang ri yoem: neing: loo" nhang: wa
yugkhang" moo" gi nang ri aphoug" akhyoid koid loo boem wa nghoid.
3Re" da" nghoid boin: khyoo: gi nang ri mhoid" jhoem" pyam, bye:.
Re" da" voomoo" zeing gi lug moo" boem su" geung: jo, da" gyidab nghoid-
re" da" yhoem: gi boem joem tho' moo jo, wigi nang nanya: gung ri nanyang: tid nyid zigi
«Ngoo ri hang" wigi yo" lang: khyo' wa la"» ga: tid nyid.
4Zoin bung: da" soid yo' dakhyoo" ti" myhang: joyoo moo re" yhoem: ri koid to" lho:
hau: zigi kyi: joem da" agung moo jo, to" ti" du nyid nghoid loug we'
ngoo gi nang ri she: khyo' pyam wa zi nghoid.
5Myen" ayo, moo khoug" mo, re" uri nyangnu" vho: ja: ri za: yu lo" ago".
Voobyu yi we' zabyid shi" phyo' zeung" uri nyangnu" gi khanham we' da jhi' dathang: teung too" kho'.
Nghoid loug we' re" gyivoo joem gi nang ri jhoid shang sho' shoem" thu pyam loo" wa.
6Eso da" amyed: ashen' yi we'
nanu" da" jonu" joem gi lhoid yu pyam zi shau" boem bye:.
7Re" da" seing" tain" bidnoem yi dangain" gi
nang ri mhoid" jhoem" pyam bye:.
Nyangnu" gi re" da" mungdain: mo wigi nang ri khaid thu pyam loo bye:.
Nang yo' myenjham" za: danyid nyid da" byumyu" yigi akhid" nang ri zain: oung: yu pyam bye:.
Nang yo' dazoo: dashug danyid da" byencang" yigi nang ri myhi wa shid re" lhid thung: to" boem abye: go".
Nyangnu" gi re" khyoo: ri «Nya: nheigboo oung: gyeung: zigi khayoo: lha"» ga: tid.
8Edom ri ngoo shen" yhen da" bidnyid moo ngoo gi
nyangnu" da" se'- koung- byu yiri phyo' shoin' pyam loo wa nghoid lho:
nyangnu" da" phajhi" juyhi: dangain" ziri shoem" thu pyam loo wa nghoid.
9Teman da" gyi zain: bang: gi gyoug nain" zi shoug" lo wigi
Edom mo gyizoo: yi dangain" we' said pyam zi shau" boem wa nghoid.
Edom ri Shen" Yhen ca" da" Yooboo Ayang: Joem
10Nang gi Yaku da" amyed ashen re" da" mang: nhung" yiri lhoid yu lho:
said loo bye: yoo mo nang rigi apyaid atoo: moo phyo' shoin' pyam zi shau" wigi
asho' ashid: bue" zi shoug" loo" wa nghoid.
11Gyivoo joem gi nyangnu" da" voogung khoem" moo" duang: joem ri
yhe: baid phyo' pyam da" bidnyid moo nang gi ayam moo bo yab jo, abye:.
Yerusalem da" ziyoo jonu" joem ri pyoung" thu lo" lho:
hau: ziri nyangnu" kho' gam yu go" lo" da" tungbau byu yi yhang: ti"
nang gi areing nghoid da:.
12Yuda mung" mo re" mang: nhung" yi da" nheig byu jang: ajo, loo bue" lo" ziri
nang gi yu" gau nyid wa zigi a eung: nghoid da:.
Nyangnu" byo, yoin" lo" da" bidnyid moo nang gi age yu" gau nyid nghoid da:.
Nyangnu" da" nheigloem: gi yoem: shoin: zi shoug" nyid jang" moo
nang gi nyangnu" da" atho' moo yi juang" wa zigi a eung: nghoid da:.
13Nyangnu" gi yau: khe" kyi" khyeug zi shoug" nyid da" bidnyid moo
nyangnu" da" yau: khe" kyi" khyeug shoug" ziri yu" gau lho:
ziyoo jonu" joem ri yhe: lhoid yu wa shid re"
nang gi nga" byumyu" yi da" voomoo" khyoo: vang yhi: wa a eung: nghoid da:.
14Nang gi phang: thu loo" wa ga: lu: nyid bang: ri myheig yu wa shid re"
khyoo: kang" khang" moo" moo yab jo, lho: lang" nyid zigi azei: eung: da" moo" nghoid nyid.
Nyangnu" da" nheigloem: gi yoem: shoin: zi shoug" nyid da" bidnyid moo
nang gi nyangnu" ri gyivo lo, khyoo: age kaid byid:.
Mangsoo gi Byumyu" yiri Dang: Phyed loo wa Khyoo:
15Ngoo Aseing gi byumyu" yi bain sho' bang: ri
dang: phyed loo wa da" bidnyid gi jhang loo bye:.
Edom we" nang koid lid loo bye: ziyo' dakhyoo" ti" nang moo doem bue" loo wa zi nghoid.
Nang byid: pyam bye: ziyo' dakhyoo" ti" nang doem shoug" yu wa zi nghoid.
16Nga" byumyu" yigi nga" da" gyeung" shang: bouggung tho' moo
shen" yhen da" khu khoo" ri shoug" nyid boem abye: go".
Nghoid loug we' loem: lheing khab' mo da"
byumyu" yi dangain" gi je" kho" da" shen" yhen khu khoo" ri shoug" shau" boem goo" wa nghoid.
Nyangnu" gi hau: khu ri bain sho' shug wigi doem thang loo" nhang: wa zi nghoid.
Israela da" Oung: Doid lo" Khyoo:
17Nghoid loug we' Ziun boem tho' moo dayham" gi yo" phang: loid loo" wa nghoid wigi
hau: joyoo gi gyeung" shang: joyoo daloem: bue" loo wa.
Yaku byumyu" yigi nyangnu" yoo" eung: da" mungdain: ri shoug" seung: lo" boem wa zi nghoid.
18Yaku yo' Yoseb da" byumyu" yigi myi: yhang: ti" bue" loo" wa.
Myi: gi khoofoo: nghoid joem ri nge" pyam yhang: ti"
nyangnu" gi Eso da" byumyu" yiri phyo' shoin' pyam loo wa nghoid.
Eso da" amyed ashen yigi nyid deing loo wa zi anghoid ein:
ngoo Aseing gi tid nyid bye:.
19Moug: pyi: shoid mo da" Yuda mung" byu yigi
Edom ri zain: oung: yu wa zi nghoid.
Bidvang shoid boem khyid: cang nyid mo, gi
Philisti byu yiri zain: oung: yu pyam boem wa nghoid.
Israela byumyu" yigi Ephrim yi' Samari yi da" mougmyid joem ri
seung: pyam lho: Benyamin byumyu" yigi Gilead ri yo" yu pyam loo" wa nghoid.
20Mougzhung: shoid Israela mungdain: mo pyoung" she: loo" shau" da" gyizoo: yi doem thu lo lho:
Phonisha mo moug: zhoung: shoid khyoo: jo, da" Zarephaid moo ju" sho' zain: oung: yu loo" wa zi nghoid.
Yerusalem mo pyoung" loo" shoug" lho:
Sardi moo nyid nyid mo, gi Yuda mung" mougpyi: shoid mo voogung joem ri
zain: seung: yu lo" boem wa nghoid.
21Yerusalem mo meing: zain: oung: loo" mo, gi Edom ri zain: oung: lho:
vhoebkhang" nyid boem wa zi nghoid. Hau: lho: Aseing nyang: gi khokham bue" loo wa zi nghoid.
Currently Selected:
OBEDIA 1: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.