THUFIM 1
1
Thufim Sunlawinak
1David fapa, Israel siangpahrang,
Solomon ih thufim tla:
2Fimnak, ruahnak ṭha le thudik
simmi theih theinak na neih
theinak dingah a lo bawm
theitu ding thufim a um a si.
3Cuih thufim cun umtlan thiamnak
le dingnak,
Fimkhur zet le tlaitluang zetih
nun theinak a lo zirh ding.
4Ruahnak mal pawl kha a fimter
thei ih,
Mino pawl kha theihthiamnak le
ruahthiamnak a pe.
5Hi thufim in mifim pawl kha an
fimnak a karhter ding ih,
Mithiam pawl khal lam a hruai ding
a si.
6Curuangah mifim pawl ih an suahpi
mi thufim simfiangnak thukzet
pawl le,
Thu harsa pawl kha an thei suak
ding.
Mino Pawl Ruahnak Pekmi
7Pathian ṭihzah cu fimnak ih
hramthoknak a si,
Mi aa pawl in fimnak le zirnak
kha ziang an siar lo.
8Ka fapa, na nu le na pa ih simmi
thu kha ṭhatein ngai aw.
9An lo zirhmi thu in na nuncan
ziaza a ṭhatter ding ih
na lu hrangah lupawng mawizet le,
na hngawng hrangah ṭhi mawi an
si ding.
10Ka fapa, misual pawl in an lo
lemsiah tikah lung aw hlah.
11Annih in, “Ra awla mi pakhat
tal that dingah hawl uhsi,
Sualnak a nei lotu pawl kha bawh
thup uhsi!
12Mithi khua in mi a dolh bangin
an nungcungin dolh uhsi,
Sualnak an nei lo naón khur sungih
a vung tla bangtuk si hai seh.
13Thilri mankhung pawl kha kan
lak ding ih,
Kan inn pawl kha thilri mankhung
thawn khatter uhsi!
14Kan hnenah ra tel ve awla,
Kan firmi pawl kan lo zem ve
ding,” tiah an lo ti tikah,
15Ka fapa, cuvek mi pawl hnenah
feh aw hlah,
An lamzin kha va hrial aw.
16Thil ṭha lo tuah ding ahcun
an zam a rang ih,
Mi that dingah an ralring cia
ringring.
17Vate hmuh cingih suurthang kam
cu zianghman a ṭhahnem lo ding.
18Asinain hivek mi ṭha lo pawl in
anmah le anmah thang an kam aw ih,
Cuih thangkammi sung ahcun an awk
that aw leh ding.
19Neh-lon ih mi thil a longtu pawl
cun cubangtuk in thihnak an hawlh
aw ṭheu.
Fimnak Ih Kawhnak
20Ngai hnik uh! Lamzinpi le thil
zuarnak hmun ihsin fimnak au
aw cu!
21Khawpi kotka le mi tonkhawmnak
hmun ihsin napi in a au.
22Mi aa pawl, ziangtik tiangso
nan aat hrih ding?
Ziangtik tiangso fimnak hmuhsuam
hi nuam nan ti ding ih,
Fimnak hi nan huat hrih ding?
23Nun ka lo sim laiah ṭhatein
ngai uh,
Ruahnak ṭha ka lo pe ding ih,
Ka fimnak kha ka lo seu ve
ding a si.
24Ka hnenah ra dingin ka lo ko
naón nan ra duh lo;
Ka kut ka lo zaap ih nan
ngaisaang lo.
25Ruahnak ṭha ka lo pekmi pawl
tla ziangsiar loin nan um ih,
Nan nuncan ziaza remsak ding khal
nan duh lo.
26Curuangah harsatnak nan ton
tikah ka lo hnihsan ding ih
ṭihnung rapthlak in a lo tlunhnawh
tikah ka hni thup ding.
27Harsatnak cu thlisia bangin a ra
thlen tik le,
ṭihnungza in phusiing bangin a lo
nuai tikah,
Vansang le thinlung rethei in na
um ding.
28Cutik ahcun in ko ding,
Asinain ka lo sawn lo ding;
Hmunkip ah in hawl ding naón
in tong lo ding.
29Thutheihnak cu nan hua ih,
Bawipa ṭihzah cu nan hril lo a si.
30Ruahnak ka lo pekmi pawl tla
nan duh lo ih,
Nun ka lo sim tikah nan ngai
duh fawn lo.
31Curuangah nanmah ih ṭuanmi
vekin nan ngah leh ding,
Nan tuahmi pawl in natnak a lo
pe ding a si.
32Ruahnak mal deuh pawl in fimnak
an hnon ruangah an thi,
Mi aa pawl cu an daithlannak in
a siatsuah a si.
33Asinain ka thu a ngaitu pawl cu
an him ding ih,
ṭihphannak zianghman an nei
lo ding.
Currently Selected:
THUFIM 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.