LUKA 6
6
Sabbath Ni Thu Thusuhnak
(Mat 12.1-8; Mar 2.23-28)
1Jesuh cu Sabbath ni ah lo lakin a feh. A dungthlun pawl in sangvut vui an zuut phah ih an zaphak sungih an nuai hnuah a fang cu an ei. 2Farasi mi ṭhenkhat pawl in, “Kan Daan in Sabbath ni ah tuah lo ding, timi cu ziangah so nan tuah?” tiah an sut.
3Jesuh in an hnenah, “David le a ralkap pawl an ril a rawn tikah David in ziang a tuah ti kha nan siar dah lo maw? 4Pathian inn sungah lut tahratin Pathian hnenih pekmi sang a lak ih a ei; cule a ralkap pawl tla a pek a si. Puithiam pawl siar lo cuih saang ei cu kan Daan in a duh lo a si kha!” tiah a ti.
5Cule Jesuh in a netnak ah, “Milai Fapa cu Sabbath ih Bawi a si,” tiah a ti.
Kutzeng Pa Ih Thu
(Mat 12.9-14; Mar 3.1-6)
6Voikhat ah Sabbath ni ah Jesuh cu sinakok ah a feh ih thu a zirh. Cunah cun a kut vorhlam a zengmi pa pakhat a um. 7Farasi mi ṭhenkhat pawl le Daanthiam ṭhenkhat pawl in Jesuh ih sual hawl an duh ruangah Sabbath ni ahhin a damter pei maw, tiah cat loin an zoh. 8An ruahnak cu Jesuh in a theih ruangah mipa cu, “Tho awla hmailam ahhin ra suak aw,” tiah a ti. Kutzeng pa cu a tho ih hmaiah cun a ra ding. 9Cule Jesuh in an hnenah, “Thu ka lo sut hai ding: Kan Daan in Sabbath ni ih tuah dingah ziangso in on? Mi bom ding maw, mi tuahmawh ding so? Mi nunnak humhim ding maw, siatsuah ding so?” tiah a ti. 10Cule cu pawl cu a zohhliah vivo hnuah kutzeng pa hnenah cun, “Na kut hawi aw,” a ti. A kut cu a hawi ngaingai ih a dam ngah.
11Farasi le Daanthiam pawl cu an thin a heng tuk ih Jesuh an siatsuah theinak dingah thu an ron aw ciamco.
Tirhthlah Hleihnih A Hril
(Mat 10.1-4; Mar 3.13-19)
12Culai ah Jesuh cu thlacam dingin tlang parah a kai ih Pathian hnenah zanvar thla a cam. 13Khua a hung vaan tikah a dungthlun pawl a ko khawm ih anmah sungin mi hleihnih a hril; cupawl cu ‘Tirhthlah pawl’ tiah a ko. 14An hmin cu Simon (Piter tiah a kawhmi) le a nau Andru, Jeim le Johan, Filip le Bartholomeo, 15Matthai le Thomas, Alfias ih fapa Jeim le Simon (Phunṭantu tiih kawhmi), 16Jeim ih fapa Judas le Jesuh phiar lehtu Judas Iskariot tla an si.
Jesuh In Thu A Zirh, Mi A Damter
(Mat 4.23-25)
17Jesuh cu a dungthlun pawl thawn tlangpar ihsin an rung suk ih a thluntu tampi pawl thawn hmun rawn ah an ding. Mitampi cutawkah cun an ra; Judea ram pumpuluk ihsin siseh, Jerusalem khua in siseh, tipikap ih a ummi Taiar le Sidon khawpi tla in an ra. 18Jesuh thusimmi ngai duh ah le an natnak tla dam duh ah an ra. Thlarau thiang lo pawl ih zonzaihtermi pawl tla a damter. 19Mi hmuahhmuah in amah kha tham an duh; ziangahtile a sung ihsin huham a suak ih a damter ṭheh hai ruangah a si.
Rawn-ih Jesuh Thuzirhnak
20Jesuh in a dungthluntu pawl a zoh hai ih,
“Mi farah pawl cu mi thlawsuak
nan si,
Pathian Uknak cu nanmah ih ta
a si!
21“Atu laiih rilrawng pawl cu
mi thlawsuak nan si,
nan khopkham leh ding a si!
“Atu laiih mitthli a tlami pawl
cu mi thlawsuak nan si,
nan lungawiin nan hni leh ding.
22“Mi in an lo hua, an lo hnong ih Milai Fapa ruangah an lo hmuhsuam, an lo relsiat asile mi thlawsuak nan si! 23Cubangtuk a si tikah nan thin nuam in um uhla lungawiin laam uh; ziangahtile nan hrangah tuarman tampi vancungah retcia in a um zo. Cubangtuk cu an pupa pawl khal in profet pawl parah an rak tuah zomi a si.
24“Atuih milian pawl cu zaangfakza
nan si;
nunnuam nan comi a cem zo!
25“Atuih a khopkham pawl cu
zaangfakza nan si;
rilrawngin nan vakvai leh ding.
“Atuih a hni rero pawl cu
zaangfakza nan si;
nan ṭap nan ai leh ding.
26“Mikip ih porh le fakmi cu
zaangfakza nan si;
Ziangahtile an pupa pawl khal in
cuvekin profet deu pawl kha
an rak porh dah a si.
Nan Ral Pawl Duhdaw Uh
(Mat 5.38-48; 7.12a)
27“Sikhalsehla ka thu a theitu nannih pawl: Nan ral duhdaw uh; a lo huatu pawl parah ṭhatnak tuah uh; 28a lo camtu pawl khi thlawsuah pe uhla a lo hremtu pawl hrangah thla cam uh. 29Mi pakhatkhat in na biang a lo beng asile khatlam khal tun hrih aw; mi pakhatkhat in na kawt angki lenghruk a lak ahcun na angki sunghruk khal pe cih aw. 30Na thilri pakhatkhat a lo diltu an um ahcun va pe aw; cule mi pakhatkhat in na thil an lak le va dil sal nawn hlah. 31Na hrangah tuah hai sehla ti na duhmi kha midang hrangah va tuah aw.
32“Nangmah a lo duhdawtu lawng na duhdawt a si ahcun ziangah so thlawsuah malsawm ngah ding cu na zum? Misual pawl khal in anmah a duhdawtu cu an duhdawt ve a sisi! 33Nangmah parah ṭhatnak a tuahtu hrang lawngah ṭhatnak na tuah ve ahcun ziangah so thlawsuah malsawm ngah ding cu na zum? Misual pawl hman in cuvek cu an tuah ve a sisi! 34Ka ngah sal ding tiih na zummi hnen lawngih na coih ahcun ziangah so thlawsuah malsawmnak ngah ding cu na beisei? Misual pawl hman in an ngah sal ding ahcun misual dang pawl hnenah an coih ve a sisi! 35Cutiin a si lo! Nan ral pawl duhdaw uhla an parah ṭhatnak tuah uh. Coih uhla ngah sal ding ruat duh hlah uh. Cuticun ṭhatman tampi nan ngah ding ih Cungnungbik Pathian ih fa nan si ding. Ziangahtile amah cu miṭha lo le lungawi hna hman a thiam lomi par khalah a ṭha a si. 36Nan Pa cu mi zaangfah thiam a si vekin nannih khal mi zaangfah thiam va si ve uh,” tiah Jesuh in a ti.
Midang Va Soisel Hlah
(Mat 7.1-5)
37Mi va soisel hlah, Pathian in a lo soisel ve lo ding. Midang va hnong hlah, Pathian in a lo hnong ve lo ding. Midang ngaidam awla Pathian in a lo ngaidam ve ding. 38Midang hnenah thil ṭhen aw, Pathian in a lo ṭhen ve ding. Tamzet in, liam thluahthlo in, na kut sungah pek na si ding ih na zawi thei nawn lo tiangin burh na si ding. Midang parih na hmanmi tahnak khi Pathian in na parah a hmang ve ding,” tiah a ti.
39Cule Jesuh in hi tahṭhimnak hi a sim: “Mitcaw pakhat in a dang mitcaw a hruai thei lo ding. A hruai asile an pahnih in korhrum sungah an tla ding. 40Tlawngta cu a saya hnakin a thiam sawn dah lo; asinain tlawngta cu a zirnak a ṭheh tikah cun a saya bangtuk a si ding.
41“Nan mit sungih thingtum a ummi sawn hman ruat loin ziangah so na unau mit sungih mit-hnawm fate lehlam na zoh? 42Na unau hnenah ‘Unau, zaangfahte in na mit sungih mithnawm kha ka lo coih sak pei,’ tiah ziangtinso na ti thei? Nangmah mit sungih thingtum hman na hmuh thei si lo! Mi titer aw pawl! Hmaisabik ah nan mit sungih thingtum kha suahta uhla cuih hnuah nan unau mit sungih mithnawm kha coih dingah ṭhatein nan hmu ding,” tiah a ti.
Thingkung Le A Rah
(Mat 7.16-20; 12.33-35)
43Thingkung ṭha in rahsia a rah dah lo; thingkung ṭha lo in rah ṭha khal a rah thei ve lo. 44Thingkung hmuahhmuah khi an rah in theih thei an si: hlingkung par ihsin thei rah nan lo dah lo; cuvekin theihmu kung ihsin sabit rah nan lo fawn lo. 45Mi ṭha in a thinlung sungih a ummi thil ṭha kha a suahter; mi ṭha lo in a thinlung sungih a ummi thil ṭha lo pawl kha a suahter ve. Ziangahtile minung cu a thinlung sungih a ummi kha a kaa in a suak a si,” tiah a ti.
Inn Saktu Pahnih
(Mat 7.24-27)
46Jesuh in, “Ziangah so ‘Bawipa, Bawipa,’ tiah in ti ih ka lo sim mi cu nan tuah fawn lo? 47Ka hnenah ra in ka thusimmi a ngai ih a thluntu pawl cu mi ziangvek an si, ti ka lo hmuhhnik ding. 48Cupa cu lungpi parah khur thukpi lai in ṭhuam a bun ih inn a saktu pa bangtuk a si. Tiva a hung lian ih cuih inn cu a sawh ciamco naón a hnin thei lo; ziangahtile fekteih sakmi inn a si. 49Sikhalsehla ka thusimmi a thei naón a thlun lotu pa cu ṭhuam ṭhateih phun loin leilung meen ih inn a saktu pa vek a si. Tilian in a cuih inn cu a run pah tikah hmakhatte ah inn cu a tlu ih ziangtluk ṭihnungza so a si!” tiah a ti.
Currently Selected:
LUKA 6: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.