EZRA 6
6
Sairas Thupekmi An Hmu Sal
1Curuangah siangpahrang Darias in Babilon ih siangpahrang thuhminsinnak cabupi sungah cuih thu cu hawl dingin thu a pek. 2Cule Media peng, Ekbatana khua ah cazual pakhat an hmu ih a sungah:
3“Siangpahrang a can kum khatnak ah, siangpahrang Sairas in thawinak peknak ah le mei-ur thawi peknak ah Jerusalem ih Biakinn cu saksaal dingin thu a pek. Cuih Biakinn cu pi sawmkua a sang ding ih pi sawmkua a kau ding. 4A phar pawl cu lungto le thing in an tuah dingih lungto thuah thum ah thing thuah khatión a si ding. Inn saknak ih a cemmi hmuahhmuah cu siangpahrang tangka sungin pek a si ding. 5Siangpahrang Nebuchadnezzar in Babilon ih a retmi sui, ngun le beelkheng pawl cu khirh thluh a si ding ih Jerusalem Biakinn ih an rak retnak hmun ciar ah ret sal a si pei,” tiih nganmi an hmu. 6Cutikah siangpahrang Darias in hiti in ca a khirh:
“Eufrates Nitlaknak lam peng uktu Mangki bawi Tattenai, Shethar Bozenai le Eufrates Nitlaknak lam pengih a ummi bawi upa pawl:
“Biakinn kiangkapah tla rak um hlah uh; 7an hnaṭuan tla rak hnaihnok hlah uh. Judah peng uktu bawi le Judah mi hotu pawl in Pathian Biakinn cu a rak dinnak keel ah sak ko hai seh. 8An ṭulnak kipah rak bawm sawn uh. Ka thupekmi cu hiti in a si: Cawlbaang loih hna an ṭuan theinak dingah Eufrates Nitlaknak lam ihsin siangpahrang hrangih an pekmi siah sungin inn saknak ih an cemmi hmuahhmuah cu zamrangin anmah nan rak pe pei. 9Jerusalem ih puithiam pawl in an lo dil tikah an hnenah nitinte pelh loin an ṭulmi pawl-cawcang, tuu a si lole tuu faate pawl Van ih Pathian hnenih mei-ur thawinak an pek dingah sangvut, cite, sabitti le olif hriak pawl tla nan rak pe pei. 10Van ih Pathian hnenah a cotlak in thawinak an pek ih keimah le ka fapa pawl hrang tla ah thlaza in camsak theinak dingah a tlunih ka thupekmi pawl cu nan rak tuah tengteng pei. 11Hi ka thupekmi a thlun lotu cu a inn ihsin kaan nan zuuk pei ih nan zum hnuah amah cu nan dawt pei. 12Jerusalem cu Amah an biaknak hmun si dingih a hriltu Pathian in hi ka thupekmi a eltu le hi Biakinn siatsuah a tumtu siangpahrang le miphun cu siatsuah seh. Keimah Darias in hi thu cu ka pek a si. Ka thupekmi cu kimtein thlun thluh ding a si,” a ti.
Biakinn Cu Pathian Hnenah An Hlan
13Eufrates Nitlaknak lam ram uktu Mangki bawi Tattenai le Shethar Bozenai le a dang bawi upa pawl in siangpahrang Darias thupekmi vek cun taimak suah in an tuah thluh. 14Judah mi hotu pawl in Biakinn cu an sak ih profet Haggai le profet Zekhariah thuphuanmi thawngin an hnaṭuan cu a sawtzet. Cule Israel ih Pathian le Persia siangpahrang Sairas, Darias le Artakzaksis pawl ih thupek vekin an ṭheh. 15Darias in siangpahrang a ṭuan kum ruknak Adar thla#Adar thla cu an nithla siar in thla hleihnih thla a si ih, February thlahrek le March thlahrek a ceem. ni thum ni ah Biakinn cu an sak ṭheh. 16Cutikah Israel mi pawl - puithiam le Levi mi le Babilon saltaannak ihsin a rakirmi hmuahhmuah in - lungawi zetin Biakinn cu Pathian hnenah an hlan. 17Cuih ni ah Pathian hnenih thawinak hrangah cawcang zakhat, tuucang zahnih le tunote zali an pek; cuih tlunah Israel miphun hleihnih hrang sualthlah thawinakah me hleihnih an pek. 18Moses cabu sungih tuah ding daan a um vekin Jerusalem Biakinn sungih hnaṭuantu dingah puithiam pawl le Levi mi pawl cu a bur a bur in an ṭhen.
Lantak Puai
19Babilon saltaannak ihsin a kirmi pawl in thla khatnak thla#thla khatnak thla cu Nisan an ti ih March thlahrek le April thlahrek a ceem. ni hleili ni ah Lantak Puai an tuah. 20Puithiam hmuahhmuah le Levi pawl hmuahhmuah in thianfainak an tuah ih an thiangfai ṭheh. Levi mi pawl in saltaannak ihsin a ra kirmi pawl hrang le puithiam pawl le anmah ih hrangah Lantak Puai hrang thawinak rannung pawl an that. 21Thawinak ih an pekmi sa cu a rakirmi Israel mi hmuahhmuah le Judah ram sungih a ummi khuavang betu pawl ih biaknak a dungtun tu pawl le Bawipa Israel ih Pathian bia dingih a rami pawl in an ei. 22Ni sarih sung, Thilnu tello Sang Puai cu lungawi aipuang tein an tuah. Bawipa in Assiria siangpahrang #Assiria siangpahrang timi hi Israel ih ral a si ṭheu ruangih timi a si; culai ram uktu siangpahrang ngaingai cu Persia siangpahrang a si. Assiria ram cu 612 BC ah a net zomi ram a si. cu Judah mi parah thinlung ṭha a neihter ih Israel Pathian ih Biakinn sak sal hnaṭuannak ah tampi a bom hai ruangah a hlei in an lung a awi cuang.
Currently Selected:
EZRA 6: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.