1 SIANGPAHRANG 1
1
David A Tar Zo
1Siangpahrang David cu a tarzet zo ih puan an thuah rero naón a khua a hlum thei lo. 2Curuangah a kuthnuai ih bawi pawl in, “Siangpahrang bawipa, na hnenih um dingah le a lo tuamhlawmtu dingah fala pakhat kan hawl pei. Na hnenah a it pei ih na khua a hlum ding,” tiah an ti. 3Israel ramsung hmuahhmuah ah fala mawi an hawl ih Shunem khua ah Abishag timi fala an hmu ih siangpahrang hnenah an rak keng. 4Abishag cu fala mawizet a si ih siangpahrang bawipa cu ṭhatein a zoh ih a tuamhlawm. Asinain siangpahrang bawipa cun nupi vekin a ihpi lo.
Adonijah In Siangpahrang A Cuh
5-6Absalom a thih hnuah David le Haggith ih fapa Adonijah cu a nungmi lakah fapa upa bik a si. Mi piangzet a si ih siangpahrang can a tum ringring mi a si ih “Siangpahrang ka si ding” a ti ṭheu. Asinain ziangthu hmanah David in a kawk dah lo. Adonijah in amah ih hrangah rang le rangleng pawl a ret ih, amah kilvengtu dingah minung sawmnga a ret. 7Adonijah in Zeruiah fapa Joab le puithiam Abiathar tla a tong ih annih khal in a tummi cu an lungkimpi. (Zeruiah cu Joab ih nu a si.) 8Asinain puithiam Zadok, Jehoiada fapa Benaiah, profet Nathan, Shimei, Rei le David kilvengtu ralkap pawl cu Adonijah lamah an ṭang lo.
9Voikhat ah Adonijah in Enrogel tikhur kiangih a ummi Roheleth Lungpi an timi hmunah thawinak a pek ih tuu le caw le a thau zetmi caw faate tampi a that ih, rawl ei dingah a unau dang pawl le siangpahrang David kuthnuai ih bawi pawl a sawm thluh. 10Asinain a nau Solomon le profet Nathan le Benaiah cu a sawm lo. Siangpahrang kilvengtu pawl khal zohman a sawm lo.
Solomon Siangpahrang A Cang
11Cule Nathan cu Solomon ih nu Bathsheba hnenah a feh ih, “Haggith fapa Adonijah siangpahrang a cang zo a si tihi na thei zo lo maw? Cuih thu cu siangpahrang David in zianghman a thei lo. 12Nangmah ih nunnak le na fapa Solomon ih nunnak na hum duh a si ahcun na tuah dingah thu ka lo sim ding. 13Siangpahrang David hnenah zamrangte in va feh awla a hnenah, ‘Maw Siangpahrang bawipa, ka fapa Solomon cu nangmah ih ai-awhtu si dingah thu i kam zo a si lo maw? Ziangtin so atu ah Adonijah sawn siangpahrang ih a can riangri?’ tiah va ti aw. 14Cutiih siangpahrang bawipa na biak laiah cun keimah khal ka rung lut ding ih na thusimmi a dik a si tinak ka ra sim ve ding,” tiah a ti.
15Curuangah Bathsheba cu siangpahrang ihnak khaan ah David tong dingah a feh. David cu a kum a upa zet thlang a si ruangah Shunem mi falanu Abishag cun a rak tuamhlawm rero. 16Bathsheba cu Siangpahrang David hmaiah a kun ih David in, “Ziang so na hai?” tiah a rak sut.
17Cutikah Bathsheba in, “Siangpahrang bawipa, ka fapa Solomon cu nangmah ih ai-awhtu siangpahrang si dingah Bawipa na Pathian hmin saal in thu na kam zo a si. 18Sikhalsehla atu-ah Adonijah siangpahrang a cang zo ih nang in cuih thu cu zianghman na thei lo. 19Caw tampi le tuu le a thaumi caw faate tampi that in thawinak a pek ih, rawl eitlangnak ah na fapa pawl, puithiam Abiathar le ralkap hotu bawi Joab pawl a sawm a si. Asinain na fapa Solomon cu a sawm lo. 20Maw Siangpahrang bawipa, nangmah hnuah zoso siangpahrang a ṭuan ding ti theih duh ah, ziangtikah so siangpahrang bawipa in thu in than ding tiah Israel mi hmuahhmuah in nangmah lawng an lo zoh a si. 21Na simta lo a si ahcun, na thih hnuah keimah le ka fapa Solomon cu mi zuarthlaitu tlukah in tuah ding a si,” a ti.
22Cutiih a ṭong rero lai ahcun, 23profet Nathan a ra thleng, tiah siangpahrang bawipa cu an sim. Cule Nathan cu a vung lut ih, siangpahrang hmaiah cun a kun ih, 24siangpahrang bawipa cu, “Maw Siangpahrang bawipa, Adonijah cu nangmah ai-awh dingah na than zo maw si? 25Tuih sunah thawinak hmunah a feh ih caw tampi le tuu le a thaumi caw faate tampi that in thawinak a pek; na fapa pawl, na ralkap hotu bawi Joab le puithiam Abiathar a sawm. Atu-ah hin rawl einak puai an tuah ih, ‘Siangpahrang Adonijah a nunkhua sauseh,’ tiah an au ciamco. 26Asinain keimah le, puithiam Zadok le, Benaiah le, Solomon cu in sawm lo. 27Na kuthnuai bawi pawl hman nangmah ih ai-awhtu zo a si ding ti na sim hrih lo ih hibangtuk thil an tuah hi siangpahrang bawipa nangmah ih lungkimmi a si maw?” tiah a ti.
28Cutikah Siangpahrang David in, “Bathsheba hei ko sal uh,” a ti. Bathsheba cu a rung lut ih David ih hmai ahcun a ding. 29Cule Siangpahrang David in Bathsheba hnenah, “Harsatnak a phunphun ihsin i humhimtu Bawipa hmin saal in thu ka lo kam a si: 30Na fapa Solomon cu keimah ai-awhtu siangpahrang a si ding, tiah Israel ih Pathian Bawipa hmin saal in thu ka lo kam cia mi cu tuih sunah ka kimter ding,” tiah a ti.
31Cutikah Bathsheba cu a kun ih, “Siangpahrang ka bawipa cu a nunkhua sau hram seh,” tiah a ti.
32Siangpahrang David in Zadok, Nathan le Benaiah ko dingin thu a pek. An ra thleng ih, 33an hnenah, “Ka kuthnuai ih bawi pawl thawn feh uhla ka fapa Solomon cu ka rang parah toter uhla, Gihon Tivate ah vun thlun uh. 34Cutawkah puithiam Zadok le profet Nathan in Solomon cu Israel siangpahrang ah hriak nan culh pei. Cule tawtawrawt nan tum pei ih, ‘Siangpahrang Solomon a nunkhua sau hram seh,’ tiah nan au pei. 35Cun hitawk ah nan hun thlun sal pei ih ka siangpahrang tokham parah a to pei. Solomon cu Israel le Judah uktu dingih ka hril zomi a si ruangah keimah ai-awhtu a si pei,” tiah a ti.
36Cutikah Jehoiada fapa Benaiah in, “Na sim vekin tuah a si pei. Bawipa na Pathian in hngetter hram seh. 37Bawipa Pathian cu nangmah siangpahrang bawipa hnenih a um vekin Solomon hnen khalah um hramsehla, a uknak cu nangmah ih uknak hnak hman in ṭhangso sin hram seh,” tiah a ti.
38Cule Zadok le Nathan le Benaiah le siangpahrang kiltu ralkap pawl in Solomon cu Siangpahrang David ih rang parah an toter ih Gihon Tivate ahcun an vun fehpi. 39Puanthlam thianghlim sung ihsin a rak kenmi olif hriak dur cu Zadok in a lak ih Solomon hriak a culh. Cuthluh in tawtawrawt an tum ih an zatein, “Siangpahrang Solomon a nunkhua sau hram seh,” tiah an au. 40Siangpahrang Solomon cu an zatein siangpahrang inn ah an hun thlun sal ih, phirivau tum phah in, lungawi aipuang in an au ciamco ih cuih an thawmvang ruangah leilung tiang a hnin ṭheh.
41Adonijah le a sawmmi pawl in an rawl ei an ṭheh zawng ah cuih thawmvang cu an thei. Joab in tawtawrawt tummi cu a theih tikah, “Khawsung ih thawmvang cu ziangso a si?” a ti. 42A ṭong hman a cem hlanah puithiam Abiathar ih fapa Jonathan a ra thleng. Cule Adonijah in Jonathan hnenah cun, “Rung lut aw. Nang cu rinsantlak na si ih thu ṭha na rak keng hmang ding,” a ti.
43Jonathan in, “Thu ṭha a si lo. Siangpahrang bawipa David in Solomon cu siangpahrang ah a tuah zo. 44David in Zadok le Nathan le Benaiah le siangpahrang kiltu ralkap pawl a thlah ih Solomon an thlun. Siangpahrang ih rang an toter ih, 45Gihon Tivate ah Zadok le Nathan in hriak an culh. Cule an kir ih mi hmuahhmuah lungawi in an au ih khawpi sung cu a buai celcel a si. Nan theih mi cu cuih thawmvang a si. 46Solomon cu siangpahrang a si zo. 47Cuih tlunah siangpahrang kuthnuai ih bawi pawl siangpahrang David hnenah an feh ih upatnak an pek hnuah, ‘Na Pathian in Solomon cu nangmah hnakih hminthang deuh ah tuah hram seh. A uknak cu nangmah ih uknak hnakin ṭhangso hram seh,’ an ti. Cule Siangpahrang David cu Pathian upat in a ihkhun parah a lu a kun ih, 48‘Ka sungsuak ka faate pakhat cu keimah ai-awhtu siangpahrang ih a tuah ruangah le cumi hmuta ding ih ka nunnak i zuah ruangah Israel ih Pathian, Bawipa cu thangṭhat in umseh,’ tiah thla a cam,” tiah a ti.
49Cutikah Adonijah ih rualpi pawl cu thinphang in an pok ih anmah ih duhnak ciarah an tlung. 50Adonijah khal Solomon a ṭih ruangah a thin a phang ih Puanthlam Thianghlim sungah a feh ih biakṭheng ki pawl a va pom.#Biakṭheng ki a pom - Biakṭheng kilah ki vek a si mi thingzum pali an bun ih cumi pomtu cu thah daan a si lo. 51Adonijah in Solomon a ṭih ruangah biakṭheng ki a pom ti kha Siangpahrang Solomon an sim. Adonijah in, “Hmaisabik ah, keimah that lo dingin Siangpahrang Solomon in ka hnenah thu kamseh,” tiah a ti ih cumi khal Siangpahrang Solomon hnenah an sim.
52Cutikah Solomon in, “Ka hnuai ih a dor a si ahcun a lu parih samphang khat hman dai a si lo pei. Asinain ka hnuai ih a dor lo ahcun a thi pei,” tiah a ti. 53Cule Siangpahrang Solomon in Adonijah cu a ko ih biakṭheng ihsin an va hruai. Adonijah cu a ra ih siangpahrang hmaiah cun a kun. Solomon in, “Inn ah va tlung aw,” a ti.
Currently Selected:
1 SIANGPAHRANG 1: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.